Accueil
Envoyer à un ami
Version imprimable
Partager

Innò, Pasquale Paoli ùn hà micca datu u dirittu di votu à e donne (è piantate di rompeci i stifali cun quessa)

Dapoi sempre, ma sopr'à tuttu sti ultimi mesi, si sente in giru di manera guasi insistente chì e donne avianu u dirittu di vutà quandu a Corsica era indipendente, ciò chì face di noi un populu di pezzò. A storia ci piace è ci muntemu a sega abbastanza. Senza vulè esse azeze (ma quantunque appena), noi, zitelle corse, vulemu stabilisce a verità !



Innò, Pasquale Paoli ùn hà micca datu u dirittu di votu à e donne (è piantate di rompeci i stifali cun quessa)
Da u 1755 à u 1766, a Corsica hè à l’avanguardia incù u suffragiu universale ma st’ultimu ferma quantunque maschile :

« uomini che siano maggiori di anni 25 finiti* » dice u testu.

Micca meufs à l’urne, eh !

À partesi da u 1766 : nova lege eletturale è ritornu à l’idea digià impiantata nant’à l’isula, u votu à i capi di famiglia. È in generale, à l’epica, u capu di famiglia era un omu. Solu in qualchì raru casu, una veduva chì ùn avia figlioli (maschi) di più di 14 anni pudia ritruvassi « capa » di famiglia è solu tandu pudia vutà !

S'è tù ere una donna è ch'è tù vulie vutà, ci vulia dunque chì u to maritu sia mortu, è ci vulia à fà in furia chì à 14 anni, u to figliolu piglierà a to piazza (stu muccicosu). Face subbitu menu sunnià.

Ùn si tratta micca di un fattu di sessu è di una rivuluzione suciale ! È solu un statu di fattu, una cunsequenza. Ùn hè micca in tantu ch'è donne ch'elle vutavanu ! E donne eranu siguramente menu lese ch'è in altrò (RIP Olympe de Gouges pover'à ella) ma pudemu (duvemu per piacè) falla finita di fantasmà nant’à una pseudo sucetà ugualitaria è à l’avanguardia….

Piuttostu ch'è di sunnià di miti passati, fidighjemu ciò chì si passa oghje. U mercatu di l’impiegu per esempiu : A Corsica hè a regione di Francia incù a prupurzione a più debbule d'attività di e donne è a sola induve u disimpiegu di e donne hè più forte ch'è quellu di l’omi.

« Tamanta strada » da percorre nanzu di diventà svedesi...


Fonte *
Dorothy Carrington Pascal Paoli et sa constitution, (Lettre circulaire de convocation de la Diète de 1764.) 1974
1. Un ringraziu speziale à u prufessore Jean-Yves Coppolani per l’infurmazioni storiche
2. INSEE

u 20 di Maghju 2016
SD, LF, LMS



1.mandatu da sasha u 20/05/2016 11:23
Brave zitelle di avè ristabilitu a verità. A ringraziavvi.

2.mandatu da higgins di lupinu u 20/05/2016 15:29
hè tempu di falla finita cù i miti se no vulemu avanzà
cio chi ùn scambia nunda a u fattu chi tandu, nant'à stu puntu, a Corsica era in avanzu nant'à a Francia..... e u restu di l'Europa

Novu cumentu :