Accueil
Envoyer à un ami
Version imprimable
Partager

Michael Cimino, una certa idea di l’America

Autori di parechji filmi ormai entruti in a cultura universale, Michael Cimino s’hè spentu. Figura maiò di u settanta, u cineastu hà ancu arricatu in e so opera una certa idea di l’America.



Michael Cimino, una certa idea di l’America

Natu in lu 1939, Michael Cimino sbarca in Los Angeles in u cuntestu di u Novu Hollywood favurevule à a contra-cultura. Cimino face prima e so arme in tantu ch’è scenaristu nantu à un episodiu di Dirty Harry. Hè tandu ch’ellu face a cuniscenza d’un certu Clint Easwood, forse u primu à sustene lu.

In u 1974 esce dunque u so primu filmu Thunderbolt and Lightfoot incù Clint Eastwood è Jeff Bridges. Assaghju efficace duve imbuleghja pulizzeru, western, road-movie è ancu cumedia, purtatu da u ventu di u settanta. Ma st’introitu simpaticu ùn annunziava mancu appena u terramotu da vene…


Pè stu secondu filmu, u cineastu hà un più grossu bilanciu è face girà una distribuzione di prestigiu (Robert De Niro, Christopher Walken, Meryl Streep, John Cazale). Fatta fine, The Deer Hunter (1979) hè un capu d’opera di più di trè ore. U filmu conta a storia di trè operaii chì si ritrovanu ciuttati in a guerra di u Viêt Nam. Incù Apocalyspe Now di Coppola esciutu listessa annata, sicuramente u più grande filmu nantu à u cunflittu.


Filmu solu nantu à a guerra di u Viêt Nam ? Sicura ch’è nò ; u cunflittu ùn raprisenta à dilla franca ch’è un quartu di l’opera. D’ampiezza assai più larga, The Deer Hunter arrizza una pittura magnifica di u grembiu pruletariu di l’Ohio, mettendu d’altronde in ballu unu di i temi maiò di u cineastu : u fattu cummunità è a leia umana. Affari chì strabiombanu pè isse muntagne duve a banda parte à caccicghjà u cervu. Quandu a prima parte si passa durante un matrimoniu in un ambiu di festa è di spartera, a quarta mostra isse leie ormai sciappate, cum’una metafora nantu à ciò qui face o disface a nazione americana. Immensu sucessu criticu è publicu, u filmu vince cinque oscars.

Solu un’annu dopu, Cimino, ormai lanciatu, mette in ballu u so novu prugettu Heaven’s Gate, per quale ottene a cunfidenza di l’United Artists. Western fiume nant’à u latu scuru di a cunquista di u Punente è i basamenti razzisti di a custruzzione di i Stati Uniti, stu filmu duvia esse per ellu quellu di a cunsecrazione. Ma tuttu ùn si passerà micca cum’è privistu...

Durante a girera, Cimino scuppia u bilanciu cunfidatu à l’iniziu. À a so surtita americana, u filmu si face scempià da a critica. U studio decide tandu d’ammuzzà lu, cacciendu più d’un’ora di rush. Pè un bilanciu iniziale di 44 millioni di dollar, u filmu raporta solu 4 millioni nantu à u terrioriu americanu. È sopr’à tuttu cunduce u studio United Artists ver’di a bancarotta. Cimino fermerà cusì unu di i soli cineasti à avè affondatu un studio sanu cù un solu filmu ! Ci vulerà à aspettà a fine di l’anni 1980 pè vede a reabilitazione è a ricuniscenza di issu capu d’opera maladettu.

Da vede quì

Cimino ùn si rimetterà mai di stu fiascu tremendu. Cinque anni dopu, rivene cù Year of the Dragon (1985), nantu à a crescenza di a mafia chinese in e cità americane. Mickey Rourke face miraculi in sta bellissima opera pulizzera, spessu vista cum’è u so ultimu grande filmu.


Di fatti, e trè opere chì seguiteranu testimunieranu di l’infussamentu di a so carriera. À principià cù The Sicilian esciutu in lu 1987. Adattatu da a vita di Salvatore Giuliano, u filmu hè un fiascu cummerciale ma dinù artisticu. Ma bon, in ogni manera cumu si pudia riesce un opera nantu à a mafia taliana incù Christophe Lambert à a so testa ?


In u 1990, ritrova à Mickey Rourke pè Desperate Hours, remake d’un filmu di William Wyler riceve un accogliu spartutu. Sei anni dopu, l’esciuta di The Sunchaser, odissea à prò di l’indiani cù Woody Harrelson hè pocu rimarcata.



Dapoi quellu ultimu filmu, Cimino s’hè fattu raru, campendu pè issu Colorado vicinu à iss’indiani è cow-boy chì li piacianu tantu. In u 2001, esce un rumanzu accoltu bè, Big Jane, annantu à una motociclista in fughjera.

Nantu à un periudu di più di 20 anni, Michael Cimino hà esciutu 7 filmi, ciò chì ghjè pocu è assai. Puru u sinemà ùn l’hà mai tralasciatu è omu puderà rigrete u prugettu nantu à quale travagliava dapoi anni è anni : una adattazione di u rumanzu La Condition Humaine di André Malraux chì nisunu studio ùn hà vulsutu finanzà per via di a reputazione di cineastu ingestibule chì li tenia in corpu dapoi Heaven’s Gate. Cù a so morte è l’interru definitivu di quellu prugettu, ghjè forse un’antra manera di ripensà a communità chì s’hè spenta dinù.

Seguitate à Tilone nant'à Facebook, a pagina di u sinemà in lingua corsa

u 4 di Lugliu 2016
Tilone



1.mandatu da musupestu u 06/07/2016 15:24
à quandu stu ghjocu di a pistola viota à colpi à u cunsigliu generale: u colpu à Polo, un colpu à Gamba, un colpu à Djivas, un colpu à Domi, un colpu à Jacosta, firmerà à tirà dui cartucci cù u Nagant M 1895...

Novu cumentu :