I pastori fora

In a grande seria "campemu in un paese di scemi è ne simu fieri" eccu a storia di u parking di Sant'Antuninu.

Sò l'agricultori di a FDSEA chì anu palisatu l'infurmazione. U 17 settembre, anu bluccatu a circulazione in Balagna pè prutestà contr'à a spatrunizazione d'un agricultore.

À a piazza di un terrenu di 14.000 m² chì un pastore sfrutta cù u so figliolu dapoi trent'anni, a merria di Sant'Antuninu ci vole mette un parking per pudè accoglie di più vitture l'estate.

U prefettu hà firmatu l'arrestu di spatrunizazione « Au nom de l’utilité publique », da leghje nant'à u situ di U Levante.

Segondu à U Ribombu ci saria ancu una cumbrìncula pè rende custruttìbili d'altri terreni di sta cumuna.

Ma sta trista storia ùn hè chè un esempiu di a pressione forte chì i terreni agrìculi incontranu di pettu à frebba immubiliare chì a Corsica cunnosce.

Mette fora un pastore è e so pecure, distruce un terrenu agrìculu per metteci un bellu parking incatramatu, cusì si passa in u nostru paese oghje.

Tuttu cuntinuveghja d'andà benissimu.