Accueil
Envoyer à un ami
Version imprimable
Partager

Hantz 2010-2012, dui anni di frebba

Truvate ch'è no ne femu troppu cù Frédéric Hantz ? Purtantu, s'hè veramente passatu qualcosa di speziale in giru à u Sporting. Trà u mumentu ch'ellu piglia a squadra à e porte di l'infernu è a cullata in L1, a Corsica hà ripigliatu cunfidenza è s'hè messa à sunnià.



Ritrattu spiritu-turchinu.com
Ritrattu spiritu-turchinu.com
Bon và bè, quelli chì ùn sò micca passiunati di ballò è l'anti-Sporting truveranu chì tuttu què hè eccessivu.

Per tutti l'altri, i dui anni chì videranu à Hantz purtà u club bastiacciu da u National à a L1 firmeranu stampate in a so mente per sempre.

Da a deprima simu passati à a paura di vede u Sporting smarisce : a DNCG chì manda u Sporting in infernu, i dibattiti à a CTC à mezanotte per truvà una suluzione, l'attesa.

Durante sti dui anni, ci hè statu una mubilizazione cum'ellu ùn si n'hè mai vistu daret'à u club : spiazzamenti in Cannes, Parigi, Fréjus, Monaco, Lens... Tifo è spetàculi magnifichi in Furiani.

Durante dui anni, simu passati da a paura di vede u Sporting smarisce per sempre, à un ritornu triunfale à u livellu u più altu. Durante sti dui anni, i Corsi anu speratu, sunniatu, cunnisciutu u sintimu di a vittoria cullettiva, anu ripigliatu cunfidenza in elli.

Hè cusì rara, ch'ella ci pare digià luntana. L'artigianu di sta grossa pagina di a storia di u Sporting hè un tippettu chì si chjama Frédéric Hantz.

2010-11 : a rinascita è a cullata in L2

25 maghju 2010, Hantz firma à u Sporting, chì vene di falà in National. In Bastia i sustenidori sò in depressione. A missione-commandò di Faruk Hadzibegic ùn hà viaghjatu.

Arricurdatevi : l'addisperu d'una partita persa contr'à Dijon, a sperenza in "Faruk", Pentecôte chì marca contr'à Strasbourg... è un macciacciu contr'à Vannes.

U bosniacu ùn hà vulsutu stà in Bastia, è assai eranu attaccati à ellu. U SCB hè à paghjolu. Nant'à i cunsigli di Paul Marchioni, i dirigenti sceglienu à Frédéric Hantz.
Hantz 2010-2012, dui anni di frebba

15 ghjugnu 2010, Bastia si piglia un pattone : a DNCG manda u Sporting in CFA. U Sporting volta à u livellu amatore.

Serà l'estate u più longu di a storia di u Sporting. E casce sò viote, ci vole à truvà i soldi in pocu tempu. Serà a CTC chì salverà u club cù un votu di a CTC. Parechji eletti sò contr'à st'aiutu eccezziunale. Serà u travagliu di Mighele Castellani, Pierre Ghionga è Jean-Charles Orsucci chì permetterà stu votu.

Ma i guai ùn sò finiti. U 6 di lugliu a DNCG cunfirma a sanzione. Ùn hè ch'è u 23 di lugliu, à duie settimana di a ripresa, chì u Sporting hè reintegratu di manera officiale in National.

L'estate 2010 era quellu di l'angoscia per i sustenidori bastiacci.

28 ghjugnu 2010. Allora ch'ellu ùn si sà sì u club participerà à u campiunatu di National o s'ellu cascherà in l'anonimatu di u CFA, Hantz prepara i so ghjucadori per una lotta chì s'annunzia difficiule. Per a so prima surtita, porta a squadra nant'à u GR20, à dorme in i stazzi di Vaccaghja, in u Camputile.
Hantz 2010-2012, dui anni di frebba

6 Agostu 2010. Bastia - Amiens 1 - 0 (El-Azzouzi) Prima ghjurnata contr'à Amiens. Bastia scopre u campiunatu di National, chì hà vistu smarisce tanti clubs prufessiunali (Tulò, Martigues, Mulhouse...) è ùn sapemu ciò chì ci aspettu, sapendu chì a preparazione ùn s'hè fatta in bone cundizioni. U Sporting strazia ma vince 1 à 0.

22 settembre 2010. CDL Sochaux - Bastia 0 - 2 (Suarez, Sans) Primu grossu colpu di u Bastia di Hantz : un macciu di cuppa di a Lega in Sochaux, chì ghjoca in L1, u 22 settembre 2010. Nant'à a maglia di u Sporting, micca sponsor. Solu "uniti vinceremu". A surpresa hè tremenda, Bastia vince 2 à 0. Un gruppu hè natu. Tuttu ognunu si mette à sunnià. Forse, stu Sporting pò cullà in altu. Bastia torna à ripiglià cunfidenza. Ancu Mathieu Robail !
Hantz 2010-2012, dui anni di frebba

4 ottobre 2010. Paris FC - Bastia 1 - 2 (Suarez, Diallo

Bastia ùn face micca un principiu di stagione straordinariu sin'avà (hà digià persu duie volte, à Cannes è à Niort, 0-0 in casa contr'à Rouen). Hè un primu test impurtante contr'à u PFC, presentatu cum'è unu di i grandi di National.

In sta dumenica dopu meziornu, sò 600 i sustenidori corsi per sta partita. I turchini vincenu 2 à 1 (Suarez, Diallo) è colla nant'à u podium, ùn ne falerà mai più.

In Puretta, si piglia l'abitutine d'andà à accoglie i ghjucadori...
Hantz 2010-2012, dui anni di frebba

5 nuvembre 2010. Beauvais - Bastia 1 - 4 (Choplin, Suarez x2, Robail U Sporting di Hantz cummencia à cullà in pressione è à sciaccà e chjibe : 3 à 0 contr'à Colmar, 5 à 0 contr'à Gap, 4 à 1 in Gueugnon, 6 à 1 contr'à Plabennec, è sopr'à tuttu 4 à 1 in Beauvais, tandu in quarta pusizione. Bastia diventa un orcu chì si manghja à tutti.

12 feraghju 2011. Bastia - Cannes 0 - 0 Partitissima in Furiani contr'à Cannes induve circa 8 000 persone sò venute à sustene u Sporting. Facia parechji anni ch’ellu ùn s’era vistu tanta ghjente in Armand Cesari. I turchini averianu meritatu una vittoria, ma tandu Cannes hè sempre in a corsa è s’hè difesu cù u so gigante Koller. Finisce 0 à 0.
Hantz 2010-2012, dui anni di frebba

18 ferraghju 2011. Guingamp - Bastia 2 - 5 (Suarez x2, Robail x2, Diallo) Bastia và à ghjucà ind'è u terzu, Guingamp, chì hà u doppiu di u bugettu di u Sporting. A partita finisce in macellu à u Roudourou. A via versu a L2 hè libera avà.

22 aprile. Fréjus - Bastia 1 - 1 (Robail) 500 Bastiacci partenu à Fréjus à u stadiu Eugène Pourcin per dì à vedeci à u National. A partita finisce 1 à 1, basta à Bastia per assigurà matematicamente a cullata in L2.

7 maghju 2011. Bastia - Créteil 2 - 1 (Suarez, Sylla). A partita di u tìtulu contr'à Créteil. Ci vole à vince per esse campioni, ma u club di a banlieue parigina tene forte (1-1). Una volta di più, si pensa chì Bastia hà mancatu l'appuntamentu, cum'è spessu in e partite impurtante... Ma Idrissa Sylla marca un but imprubabile à l'ultima segonda, in un tazzu infernale. Di memoria di parechji, ùn s'hè mai intesu un trostu sìmile in Furiani. Bastia diventa campione di Francia di National è pò fà a festa.

Ma chì tazzu quella sera in Furiani...

21 maghju 2010. Bastia - Orléans 0 - 0 Bastia festighjeghja i so campioni.
Quella sera rende omagiu à l'anziane glorie, quelli di u tìtulu di campione in u 68, quelli di a vittoria in cuppa di Francia in u 81. Furiani torna à fà u pienu. Focu d'artifiziu è Chariots de feu quella sera piena d'emuzioni. U populu turchinu torna à sunnià. I campioni simu noi !

2011-12 : a cullata in L1

29 lugliu 2011. Bastia - Istres 3-1 (Suarez x2, Khazri Prima ghjurnata è ritornu in L2 in Furiani. Grazia à Suarez è Khazri u Sporting batte à Istres, sempre in u lanciu di a so stagione in National.

A squadra hè sempre a listessa, ci hè solu Jérôme Rothen in più. Invece cambia a fisionomia di Furiani cun l'apertura di a tribuna Sud è sò circa 9000 persone à empie u stadiu.

Pè a segonda ghjurnata Bastia và à vince à Nantes (2 à 0, Khazri è Suarez).

12 agostu. Bastia - Le Mans 1-0 (Choplin) A terza ghjurnata viderà Le Mans (chì fala da L1) fassi scuzzulà in Furiani. Per fassi appena paura, Bastia si paga una pulèmica cù u presidente Legarda (v'arricurdate di u dibattitu in l'emissione CFoot ?) chì parla di "climat de terreur" in Corsica.

Cù trè vittorie in trè partite, i sustenidori si mettenu à sunnià, ma ghjustu appena.
Hantz 2010-2012, dui anni di frebba

16 settembre. Bastia - Monaco 1-1 (Maoulida) Primu grossu test per sapè sì u Sporting hè à u livellu di i più grandi. Nant'à u bancu di l'ASM ci hè Marco Simone. Bastia ùn vince micca, ma Toifilou Maoulida marca u so primu but è ci mostra chì i turchini sò à u livellu di i più grandi in stu campiunatu.

Ma a stagione hè dura. Dop'à a so disfatta à Reims (1-0) à a 7a ghjurnata, u Sporting hè settesimu, à 8 punti di u leader.


15 ottobre. Bastia - Lens 2-2 (Maoulida, Diallo) A partita ch'ellu ùn ci vulia à mancà. Lens ghjoca à un livellu sopr'à quellu di Bastia è sciacca dui buts in u primu tempu. Ma Maoulida (45u) è Diallo (83u) strappanu a partita para. Ma si parlerà sopr'à tuttu di l'azzuffu in fine di macciu è di u calciu di Cichero à un dirigente bastiacciu.

Allora chì a partita ùn hè mancu finita, Thiriez lancia u so cummunicatu : "Ces incidents répétés nuisent gravement à l'image du football français".

28 ottobre. Bastia - Arles Avignon 3 - 0 in Créteil (Genest, Khazri x2) A sanzione casca, u SCB riceve à Arles in Créteil è vince quantunque. Un mondu scemu aspetterà a squadra in Puretta, tardi in a notte

14 ghjennaghju. Metz - Bastia 0-1 (Maoulida Bastia ùn si sfiata micca, ma u primu, Clermont hè luntanu in davanti è Reims ùn cappia micca. U FC Metz hè un cuncurente direttu, hà l'occasion di vutlà à l'altura di Bastia... o micca. Maoulida manda Metz in a deprima nera cù a so rete.

Ma pocu dopu hè u spleen. Una disfatta à Clermont (2 à 1) contr'à Der Zakarian mette a pression à a squadra di Hantz


13 feraghju. Monaco - Bastia 0-1 (Diallo). L'ultima volta chì Bastia avia vintu in Monaco, era in u... 1972. Ma quist'annu à u Sporting li riesce tuttu. Una capata di Diallo chì più nimu aspettava à 5 minuti di a fine permette di strappà a vittoria. Bastia piglia a prima piazza. Sta volta, si pò sperà in veru...

17 ferraghju. Bastia - Reims 1 - 0 (Khazri) Bastia primu, riceve u segondu Reims. E duie squadre anu 42 punti. Ma u Sporting ùn ci la face, u guardianu sorte tuttu... sin'à u 91u minutu, u mumentu ch'ellu sceglie Khazri per marcà una rete chì firmerà sta stagione cumu unu di i più impurtanti.

Perchè tandu u SCB sceglie di marcà sempre à l'ultimu, per stumagà ancu di più i so avversarii (Maoulida contr'à Metz 90u, Rothen contr'à Le Havre 82u, Diallo à Monaco 86u...)

U Sporting piglia solu a prima pusizione, è ùn scambierà più sin'à a fine.

12 marzu. Lens - Bastia 1 - 3 (El-Azzouzi, Rothen, Maoulida) Quelli chì c'eranu s'arricurderanu sempre di stu mumentu scemu quandu Bastia marca trè volte in dece minuti, di u silenziu di i nurdisti è di i canti corsi chì rimbombau in Bollaert... Gervais Martel avia prumessu l'infernu, hè stata una spassighjata.

23 aprile. Bastia - Châteauroux 2 - 1 (Khazri, Maoulida) Eccu, u Sporting ritrova a L2, hè guasi officiale dop'à una stagione incredibile.

L'hà scritta Maoulida : "Le Sporting est immortel". Chì si pò dì di più ?


1u maghju 2012. Bastia - Metz 3 - 0 (Diallo x2, Maoulida) Altra stonda furtissima di sti dui anni, a partita contr'à Metz, à qualchì ghjornu di l'anniversariu di i vint'anni di a catastrofa di Furiani. Stu mumentu quandu i ghjucadori entrenu nant'à u terrenu, in un silenziu tutale, cù u tifo in Est è e sciarpe tese in l'altre tribune.

Da vede dinù :

Sempre vivu, Vincent Alix, giurnalistu spurtivu, feritu in Furiani u 5 di maghju 1992, ferà un bellissimu ducumentariu nant'à sta stagione cusì particulare, di stu club micca cum'è l'altri.
I ritratti di a festa di u tìtulu in cità
Videò quì è dinù quì.
L'omagiu nant'à Spiritu Turchinu
È nant'à So Foot Pourquoi la Corse aime tant Frédéric Hantz


u 16 di Maghju 2014



1.mandatu da papybroussard u 17/05/2014 14:13
Avà piazza à i "barbus"

2.mandatu da anto u 17/05/2014 14:21
Induve ci so i soldi da piglià, elli sò qui. Avà anu da cumincià i penseri.

Grazie per tuttu o Hantz. Un grande omu chi ci hà salvatu

3.mandatu da Infurmazione Libera u 17/05/2014 16:56
Dunque quelli chì anu permessu di fà vutà i soldi à a CTC sò Ghionga, Castellani è Orsucci, è solamente elli !
Grazie per l'altri chì sò sciappatu u culu à salvà u club à a CTC è l'altrò !

Infurmazione Libera

4.mandatu da anto u 17/05/2014 17:04
u votu di a CTC so elli 3 chi anu puntatu à Giacobbi

Cummunisti e diritta eranu contru

5.mandatu da skoda u 17/05/2014 17:14
un grande coach. sapemu cio che no perdimu, micca cio chi ha da vene
A RINGRAZIAVVI PER TUTTU FRED

6.mandatu da oscarucciu u 18/05/2014 10:43
speremu chi u scb ( incu i barbutti di u borgu) un diventerà micca "résiduel" cume u Fronte d'oghje....lol

7.mandatu da plus rien ne bétonne u 18/05/2014 11:09
Chi si passa a u sporting ????

8.mandatu da uspagnulacciu u 18/05/2014 17:48
quelli chì avianu messu u scb à caternu serianu di ritornu, eu s'ella hè cusì ùn pigliaraghju più a mo carta pè un altru annu...

9.mandatu da ghjacumu u 18/05/2014 18:55
ùn si sà micca o ghjente.... ognunu dice a soia. attenti à e voce, un'ci vole micca sempre à ascultà cio chi si dice !

aspittemu

10.mandatu da oscarucciu u 18/05/2014 23:03
O ghjente...Quelli chi anu messu u scb a caternu anu fattu ancu di piu, anu messu u naziunalisimu a caternu.( mi dicerete un si micca i soli)....mà pe quessa un li ne vulete tantu.....alora un vi scurdate chi u sporting hè un squadra pè fà u colle e falla.

11.mandatu da sardu u 19/05/2014 11:29
chi bella storia!

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta