Accueil
Envoyer à un ami
Version imprimable
Partager

I peghju ghjucadori di u Sporting

U Sporting ùn hè micca solu Claude Papi, Jonnhy Rep è Lubomir Moravcik. A storia di u club bastiacciu hè fatta di partite annuiose, di buts fragichi, di passe mancate, di pienti è di lamenti. Eccu una piccula scelta di i peghju ghjucadori di a gluriosa storia turchina.




1. Laurent Weber

I peghju ghjucadori di u Sporting
Ùn hè statu ch'è una stagione à u Sporting (1996-97), ma l'hè bastatu per firmà cum'è unu di i guardini i più pèssimi di st'ultimi anni. Hè sèmplice : à ogni partita, una cacata.


2. Greg Vanney

Hè Robert Nouzaret chì hà fattu vene l'americanu à u Sporting. Unu di i trasferimenti i più misteriosi di a storia di u club. Renditevi contu, u difensore hè passatu da Los Angeles à Bastia. Quì vene per cunnosce u peghju di u futbol corsu. Quattru anni goffi. Una prima stagione in u 2001/2002 cù una finale di cuppa di Francia persa in e cundizione ch'ellu si sà. È un'ultima (2004/2005) cù una falata è tante storia (cuntestazione di i sustenidori, affari ghjudiziarii, affare Chimbonda...)

U poveru Greg duvia dumandassi ciò ch'ellu facia quì. È noi dinù...
I peghju ghjucadori di u Sporting

3. Jamie Fullarton

Stu ghjucadore ci hè venutu direttamente da Scozzia, è nunda ch'è per quessa i sustenidori l'anu pigliatu in simpatia. Hà fattu una stagione in Bastia (1996/97). Nant'à u terrenu si ricunniscia à u so fìsicu più vicinu di u pastizzeru ch'è di u ghjucadore di ballò. Era l'idule à u bar à l'ora di l'apperitivu, è era digià bè.
I peghju ghjucadori di u Sporting

4. Bernard Lambourde

Prima partita in Furiani, prima mancata, prima disfatta di a stagione di u Sporting. È hè stata cusì tuttu l'annu. Ùn era tantu un ghjucadore pessimu, ma ci hè sempre vulsutu chì durante una partita Lambourde fessi una zappata chì metti a squadra in difficultà. Una stagione difficiule per i nervi.

Eppo cumu ghjucà cù una maglia chì pare un t-shirt pè turistu ?
I peghju ghjucadori di u Sporting

5. Andrade William

I peghju ghjucadori di u Sporting
U difensore bresilianu ci venia direttamente da u grande Benfica cù un solidu palmarès. Tuttu ognunu vidia in ellu u famosu "grande libero" chì duvia stabilizà è fà ingrandà u Sporting. Un cornu ! Prima titularizazione in Furiani contr'à Gueugnon è prima calzetta chì permette à un attaccante di i "Forgerons" di marcà è di vince. Firmerà in a storia cum'è quellu chì hà permessu à Gueugnon di vince in Furiani. Una stagione d'infernu.

6. Eric Dewilder

Grossa sperienza (più di 200 partite in D1 cù Lens, Bordeaux, Sochaux...). Sceltu da Léonce Lavagne per u ritornu di u Sporting in u 1994, hè venutu à scaldà u bancu di i rimpiazzenti è quellu di l'Apocalypse. Hè dunque di manera logica chì l'annu dopu ghjoca à u GFCA, in terza divisione.
I peghju ghjucadori di u Sporting

7. Raynald Pedros

Trista sorte ch'è quella di Pedros, ex grande stella di u ballò francese è di a scola nantaise. Titulare à l'Euro 96, prumessu à una grande carriera, hà ghjucatu per l'OM, Lyon, Parma è Napuli. Venutu in Bastia per rilanciassi, ùn ci la ferà micca. Finiscerà in l'anonimatu di i before di u portu di Toga.
I peghju ghjucadori di u Sporting

8. Pierre Deblock

I peghju ghjucadori di u Sporting
Sbarcatu in Corsica a trista annata di Lambourde è Nouzaret, fù un scumpientu tutale à u so postu. O quantu passe mancate è cuntrolli zappati ! Fù di siguru titulare pè a chjibba memurèvule pigliata à Lens quist'annu (disfatta 7 à 0).

9. Flavio Donizete Camargo

Titulare senza discussione di a squadra di e più grande zappe di u Sporting. Annunziatu cum'è un attaccante di Champion's League, u brasilianu firmerà cum'è una di e più grande magagne di Furiani. Hè statu presentatu à u publicu bastiacciu à a fine di a stagione 1993/94 è hà fattu un giru d'onore sott'à l'acclamazioni di u publicu scatinatu chì cantava "Brasil". Ma à l'intrenamentu si ferrisce subbitu. Si piglia una strambacata per via di e radighe di i i pini di a Marana. Tandu, i ghjucadori di u Sporting andavanu à corre à U Casone.

E so statistiche sò impressiunanti : 4 partite, 0 but in duie stagioni. Nunda à aghjustà.
I peghju ghjucadori di u Sporting

10. Mariusz Piekarski

Duvia esse u "grande numeru dece" chì mancava à u Sporting dapoi tanti anni. Perchè u pulunese hà signatu in Bastia ? A so sola reputazione era di ghjucà u Flamengo cun Romario è d'esse u maritu di miss Brasile. Eccu ciò chì tuttu u mondu dicia in Bastia. Salutemu a perfurmanza di l'agenti di ghjucadori chì anu riesciutu à burlà i dirigenti corsi cun què.
I peghju ghjucadori di u Sporting

11. Nicolas Dieuze

O chì stagione di lacrime ! À a fine d'ogni partita i sustenidori pregavanu perch'ellu arresti u futbol. Era titulare sott'à l'epica Nouzaret, è riescerà à mette solu dui picculi buts. Partutu da Bastia, u so intrenore capisce ch'ellu ùn hè fattu pè marcà i buts è u face rincullà à u postu di mezuterrenu di recuperazione. À stu postu ferà una carriera onesta. Ma in Bastia, chì suffrenza...
I peghju ghjucadori di u Sporting

Averianu pussutu figurà in sta squadra :

Paulo Alvès :
Unu di i trasferimenti i più cari di a storia di Bastia (1998-99). L'attaccante purtughese mette un buttone pè u so primu macciu, è dopu più nunda.



Pascal Chimbonda :
U ghjucadore di Bastia u più odiatu di tutta a storia di u Sporting. À ellu solu riesce à mette a puzza frà ghjucadori è à mettesi u publicu à dossu. Quand'ellu hè partutu da u so anzianu club (Le Havre), i sustenidori eranu cuntenti cum'è pichji di sbarazzassi d'ellu. Forse, ci vulia à stalli à sente...
I peghju ghjucadori di u Sporting

Bjorn Kvarme :
Si sperava di vede in Bjorn Tore un viking prontu à taglià l'anche di l'attaccanti nemichi. Ma ùn si passò cusì è ùn finiscerà mancu a stagione à u Sporting.


I peghju ghjucadori di u Sporting

David Mazzoncini :

Era bè d'avè un ghjucadore cù un nome in "i" per facci guasi crede ch'ellu c'era un ghjucadore corsu di livellu L1. Ma innò, mancu.
I peghju ghjucadori di u Sporting

José Clayton :

Un futbalore bresilianu naturalizatu tunisianu, hè suspettu.
I peghju ghjucadori di u Sporting

Ermin Siljak :
Era slovenu è averia pussutu entre in a storia, qualifichendu Bastia contr'à u Steaua Bucarest in cuppa di l'UEFA 1997-98. Ma hà messu u ballò à cantu, st'assassinu.
I peghju ghjucadori di u Sporting

Brandão :

Per sta frasa :


A storia cuntinuveghja.

u 31 di Maghju 2017



1.mandatu da GWM u 06/02/2009 09:42
Vanney, Fullarton è Dewilder: ùn aderiscu micca. Anu fattu cio ch'elli anu pussutu.
Eppo Dewilder hè per sempre ligatu à un mumentone di a storia di Furiani.

Deblock: capitanu di sta squadra, sopratuttu dopu à l'episodiu "di a suppa".

2.mandatu da filidatu u 06/02/2009 11:24
è di paulo alvès vi ne site scurdati?

3.mandatu da GWM u 06/02/2009 11:40
sughettu apertu à cuntribuzione, per esempiu: i sustituti ?

4.mandatu da Sporting u 07/02/2009 02:57
Un vi ricurdade micca di Andres Grande ? Chjera u piu grande sumeracciu d'a creazione ...

5.mandatu da un naziunale u 07/02/2009 13:28
e dinnu ferrigno xavier ch'avia mercatu contr'a u sporting u but di quelli meuh meuh! mais contre son camp e po d'altri...

6.mandatu da Pastacciu u 08/02/2009 14:42
Sta squadra hé un veru scumpientu !! Eu prupongu dinù Paulo Alvès, Pasqua Chimbonda, Bjorn Kvarme, Uras tutti maravigliosi ghjucatori. Cume capitanu pensu à Chimbonda per u so spiritu esemplare.

7.mandatu da Donne ch'ùn caspiscenu nunda u 08/02/2009 16:09
O zitè eiu ci capiscu pocu ind'u ballò, forse perchè sò donna è ind'u nostru cerbellu ùn ci hè micca codice da capicci qualcosa. Ma ditemi appena, induve sò i Corsi inde issa squadra??? Perchè s'elli fussinu nostri, forse si puderia dì : i pachemu pocu, perchè simu una piccula squadra, ma quì, fà vene tippi da u Brasile, da a Pulogna è chì sà da induve, per facci perde: pensate chì ne vale a pena?

8.mandatu da Pasqua Chimbonda u 08/02/2009 18:54
Ringraziu à u mio amicu Pastacciu per stu cumplimentu. Effetivamente seraghju un bonu capitanu. Ringraziu ancu à a piazzetta chì un m'ha micca messu in sta pechju squadra di u Sporting. ( Aghju fattu u mundiale 2006 )

9.mandatu da casinchese u 11/02/2009 18:15
Induve sò passate 'sse capre di Dobrijevic, di Cesto, d'Alnoudji, Di Delaye, Ogbeche, Saveljic, Maraval, Krupnikovic, Andres Grande, Garrido, Kozniku, Bruno Alicarte ? Ind'e peghji, sò i meglii...

10.mandatu da Calimerò u 13/02/2009 23:44
è Félix Burdino, è Oliveira jenisson? ùn sò s'elli eranu narpie o zapponi ma ... In fatti, si poniu fà omancu duie squatre. Cù tutti sti disgraziati sò capaci di fà zeru à zeru ...

11.mandatu da zampaglinu u 16/02/2009 07:59
E quiddu Debu, induva u lasceti? Soca vi ni seti scurdati di ssa mansetta ghjunta à tempu à Darras é Leonce Lasagne!

12.mandatu da Fifou u 24/02/2009 16:12
un vi scurdade micca di Dolci

13.mandatu da u zappochju u 04/03/2009 13:34
Ci vole a mette ¨Paulo Alvès,

14.mandatu da PICCHJACCANTU u 29/03/2009 23:44
o' ghjente! vi arricurdate di a prima partita di Paulo Alves in Furiani??
Ci avia messu un "but" incredibule, é tuttu mondu si dicia chi u teniamu quellu grande ghjucatore di ballò....
A seguita di a storia ci face sempre ride d'avà....

15.mandatu da A Volpa u 14/04/2009 18:53
e quelli negri Africanu chi jugava cun i "basquets" mi naricordu micca di u nome, cusinu cun ghjucatori di u sporting "M' "??? quercosa mi pare, qué torna quella Zappà

16.mandatu da A Volpa u 14/04/2009 19:37
Pensu chi si sciamu M'BIDA

17.mandatu da Ghjuvanfrancescu u 09/06/2009 21:07
O ghjenti, vi seti scurdati di Philippe Lalanne quellu chi avia missu un "but" contra u FC Nantes(ci era Makelele, Karembeu, Pedros...) in coppa di liga in 1995. Questu ghjucatori hè per mè a piu bella zappa di u SCB. Pudetti fighjà u but nant'à dailymotion: http://www.dailymotion.com/relevance/search/lalanne/video/x53ozv_nantes-bastia-18-cdl-9495_sport

18.mandatu da Bastiacci u 19/09/2010 22:41
E Karembeu dinno !!

19.mandatu da U Panaghju u 25/11/2010 16:01
Ci n'erani d'altri ch'erani debuli.

C'era patrick moreau, josé clayton, damian manso (chi ghjucava in menu di 15 in vescuvatu), daye prince (le jongleur de bamako), christian quarante deux (ans)...
Eccu a lista di sti pedi torti che mi ramentu.
FOOORRRRRRRZZZZZZZZZZAAAAAA BACHTIA PA SEMPRI!!!

20.mandatu da U Panaghju u 25/11/2010 16:04
aghju sminticatu u terzu cucinu di maorlaye soumah: ousmane soumah chi faccii i pizzi in palneca. AH Hè!!!

21.mandatu da Sborgnak u 04/07/2011 18:40
E E.Siljak induve u mettite?

22.mandatu da Lisandru Mattei u 14/09/2011 13:28
U 11 titulare:

Piveteau - Darras, Andrade Williams, Burnier, Leclair - Mazzoncini, Dewilder, Lalanne, Piekarski - Paulo Alves, Flavio Camargo

Sustituti: Weber, Van De Casteele, Pedros, Chimbonda, Alicarte

23.mandatu da Furianacciu u 31/05/2017 18:42
FRANCOIS MARQUE

LINDSAY ROSE

ANU A SO PIAZZA

24.mandatu da croce di bastia u 31/05/2017 19:01
Junior TALLO

APODI !!!

l'orribile Djibril Cissé

Yassine JEBBOUR !!!


Jesper HANSEN (u corciu)

Hervin ONGENDA


25.mandatu da Antò u 31/05/2017 19:07
Chì sò sti cummenti ? Aiò micca Karembeu! E Patrick Moreau era forte. Dopu hà avutu prublemi di salute.

26.mandatu da Antò u 31/05/2017 20:14
Mi ne vene d'altri : Salim Arrache e Malek Cherrad

Pe i corsi Laurent Casanova

27.mandatu da Ozerfil u 04/07/2018 14:49
Laurent CASANOVA...

Anto, un ti sbagli micca di ghjucadoru ?!!

28.mandatu da Ozerfil u 04/07/2018 14:53
Grazie à "A Piazzetta" d'avè messu Lambourde e Dieuze, chi piacenu tantu nantu à "Camperemu", indè i peghji ghjucadori di U Sporting...!!

29.mandatu da Ozerfil u 04/07/2018 15:40
Per mè, u peghju ghjucadore corsu hè statu P. Olmeta, micca ch'ellu era un gattivu ghjucadore, a u cuntrariu, mà un n'avia nulla per U Sporting in u so core...

E u piu buffu hè statu Y. Lorenzi che a fughjitu un ghjornu induve i spettatori so entrati nantu u terrenu di Furiani - soga si sentia culpevule di qualcosa !!

E ni vogliu appena à GL Leca e Cahu d'avè lasciatu U Sporting cusi bassu senza avè fattu unu sforzu per aiutallu. U Sporting ch'avia fattu d'elli ghjucadori prufezziunale...

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta