Accueil
Envoyer à un ami
Version imprimable
Partager

I chjassi di Bastia

Sott'à a cità muderna, ci sò sempre e tracce di l'antichi chjassi campagnoli. Da Terra Nova à Cardu, da Lupinu à Monserratu, passendu pè San Ghjisè è San Ruccucciu, ùn mancanu i camini. Testimoni d'un tempu quandu Bastia ùn era ancu una cità ma un grande paese, s'è vo ùn i cunniscite micca, hè ora di lascià a vittura per scopreli.



Circate di figuravvi à Bastia ind'i tempi. Cacciate e vitture, e strade in catramu, i casali muderni.

Imaginate a cità cù u so centru : u Vechju Portu è A Marina (Terra Vechja), a Citatella (Terra Nova), San Ghjisè, U Mercà.

Imaginate a so periferia campagnola : in Lupinu è in a valle di U Fangu ci sò i giardini è l'orte cù e so lenze, e so casette, e so aghje, i so mulini.

Imaginate stu spaziu cù i so lochi di fede, cappelle, lochi di pelerinagiu è oratorii : Monserratu, San Gaitanu, Sant'Antò, E Capannelle.

Infine, pensate à e so furtificazioni : i forti di A Croce (diventatu u "Fort Lacroix"), è quellu di Monserratu (induv'ellu c'era u castellu di Belgudè), e torre di a Vètrice (vicina di Cardu) o quella di A Falcunaghja (in Lupinu).

È pè circulà in stu spaziu, una rete di chjassi, di ricciate, di viòttuli. Qualchidunu ci hè sempre. S'è vo ùn i cunniscite micca, lasciate a vostra vittura induv'ella hè. Partite à spassu, pisate u capu. "Bastia hè una cità strana" scrivia Sebastianu Dalzeto in Pesciu Anguilla. Pigliate u tempu di fidighjalla, chì Bastia hè bella...

A Filippina

Hè a via chì colla da l'entrata di a Citatella à Sant'Antò.

San Ruccucciu

O in bastiacciu "San Ruccù". Parte da San Ghjisè per ghjunghje à A Croce (diventatu "Fort Lacroix")

Trà u Tribunale è A Filippina

In piena cità vi si pare d'esse in paese.


Da U Machjò à Monserratu

À dui passi di i casali novi è di l'HLM, si scoprenu e tracce di u mondu "di nanzu".




Da cullà in Cardu

Trà Monserratu è A Vètrice.


Da Lupinu à Monserratu

Quessu parte da a residenza "Les Sitelles" è ghjunghje in Monserratu.

Bastia hà fiascatu a so urbanizazione ? Siguramente. Ma i chjassi chì purtavanu à l'orte ùn sò micca luntani da i lochi tutti incimentati.

Perchè micca una riabilitazione ?

Pè i lucali (è puru i turisti), sti chjassi sò una carta maestra per scopre e bellezze di Bastia. Certi meriterrebbinu d'esse puliti è intrattenuti (ùn parlemu mancu di u spaziu publicu chì hè statu privatizatu in certi lochi...).

Un ghjornu, forse ?



u 16 di Farraghju 2017



1.mandatu da Ghjuvanluca u 17/02/2017 16:46
Bella e Fiera Bastia!

2.mandatu da giacomoni u 07/03/2017 09:47
in Porti Vechju anu fattu in piena cità un bellu percorsu cù parechje difficultà, ghjè un veru piacè...ma hè vera hè PORTI VECHJU....

Novu cumentu :