Accueil
Envoyer à un ami
Version imprimable
Partager

Una carta di i chjassi di Bastia

Partite à scopre i lochi, a storia, u patrimoniu bastiacciu à traversu i so chjassi. Aprite l'ochji, pisate u nasu, è pigliate u vostru tempu chì Bastia hè cusì bella !



Si sente spessu dì chì i Bastiacci si vergognanu di a so cità. Micca abbastanza bella à cantu à a dulcezza di u golfu d'Aiacciu, micca abbastanza corsa pè i paisani chì a fughjenu l'estate, micca abbastanza ricca, o troppu brutta.

Ma un ghjornu, capisceranu chì Bastia hè bella. Cità carca di storia, aperta à tempu nant'à u mare (a stampa ghjenuvese hè forte) è nant'à l'internu (hè stata fatta da i paisani), hà parechje identità chì ne facenu a so originalità è a so ricchezza.

À traversu i so chjassi, i so carrughji, e so vie, è i so nomi (certi scurdati) vi prupunimu di scoprene a so anima.

È chì ci hè di megliu per scopre una cità ch'è di parte à pedi ? Eccu unepoche di pruposte d'itinerarii. Fatene ciò ch'è vo vulete, a cità hè vostra. I chjassi sò cumunali, u duminiu publicu appartene à tutti. In certi lochi ci dispiace d'avè vistu stu spaziu chjosu è privatizatu.

Forse, pudemu ancu sperà di vede un ghjornu i puteri publichi piglià cuscenza di l'impurtanza di stu patrimoniu. Forse, un ghjornu tutti sti chjassi seranu messi in valore è puliti cum'ellu si deve ? (è ancu resi à u publicu per quelli chì sò stati privatizati ?)

Ah iè, un'ultima cosa : Bastia hè bella. Merita ch'è vo apriite l'ochji. Pisate u nasu è... pigliate u vostru tempu per scoprela. U piacè serà ancu più grande...

Eccu dunque una prova di carta, chì serà arricchita pocu à pocu.

Fidighjate bè, à ogni icona di a carta hè assuciatu un ritrattu cù una corta spiegazione !

Ci ponu esse sbagli è aspettemu e vostre riazzione.

Pè avè direttamente a leia di a Google Map


Da leghje dinù : I chjassi di Bastia

Ma vi ramintemu chì stu travagliu ùn hè compiu è ch'ellu serà cuntinuvatu à esse arricchitu.

Tanti ringrazii à Cisariu Raffini pè u so aiutu preziosu.

Una carta di i chjassi di Bastia

u 5 di Marzu 2017



1.mandatu da bastiacciu u 06/03/2017 10:27
chi peccatu chi a municipalità di BASTIA ùn appia capitu chi stu patrimoniu hè una RICCHEZZA

2.mandatu da 50 nuances de rosé bien frais u 06/03/2017 11:53
E à a merria, cosa aspettanu?

3.mandatu da giacomoni u 07/03/2017 09:45
aspettanu chì e salcicce spuntanu nant'à l'arburi...è intantu giranu i caffè u sabbatu sera ...forza o Pè chì l'ai in punta...

4.mandatu da F. u 07/03/2017 10:13
ci vuleria à fà listessu in ogni paese, in ogni pieve

Novu cumentu :