Accueil
Envoyer à un ami
Version imprimable
Partager

U macellu di Bastia - Monaco in 1994...

Arricurdatevi di stu macciu. U Sporting hà fattu u so ritornu in prima divisione è a piccula squatra bastiaccia si face arrubbà tutti i sabbati. L'ambianza pare calma nanzu di riceve à u grande Monaco. Ma e decisioni di l'àrbitru feranu scimisce in veru u pùblicu è Furiani di cunnosce une di e so più belle serate di st'ultimi vint'anni...




U Sporting hè dunque di ritornu in prima divisione ma l'affari ùn si passanu tantu bè. Bastia hè innù u fondu di u classamentu. Di manera paradussale, u SCB ghjoca megliu for'di casa è in Furiani hà pigliatu l'abitutine d'ùn pigliassi ch'è conce.

Furiani ùn hè più quellu è ùn face più paura à nimu.

Stu sabbatu di nuvembre si riceve a grossa squatra di Monaco cun tutte e so stelle internaziunale : Emmanuel Petit, Youri Djorkaeff, Sonny Anderson, Lilian Thuram...

Anu previstu di manghjassi u Sporting in quatr'è trè sette. Ma sta sera s'hà da passà qualcosa di speziale...

Tandu, ogni dumenica, hè cù un gran piacè chì Thierry Roland annunzia a disfatta di u Sporting in casa soia.

Ùn piatta più a so gioia di dì chì Furiani ùn hè più quellu è chì i bastiacci piglianu u caminu di a segonda divisione.

À tal puntu chì in Bastia, più nimu fideghja à Téléfoot a dumenica matina, per un avè più à vede sta faccia à pattoni sprime a so cuntentezza di vede i Corsi esse ghjucati à a risa in casa soia.

Ma sta sera...

Contr'à a ricchissima squatra di Monaco u Sporting ùn hà micca u livellu è strazieghja.

À u capu d'un quartu d'ora, perde 2 à 0.

L'àrbitru de Pandis hà datu un penalty bellu generosu à Monaco è Furiani cummencia à bolle.

In stu mumentu precisu, tuttu ognunu si dice chì sta sera ne pigliemu cinque è chì l'annu chì vene si turnerà à ghjucà in segonda divisione contr'à Gueugnon è Laval.

Ma qualcosa hà da cambià u corsu di l'evenimenti...

U Sporting punta.

Nant'à un attaccu, Antò Drobnjak marca un but... Subbitu ricusatu da l'àrbitru per hors-jeu,. Ma ghjustu nanzu, c'era un penalty per noi.

O ci hè but, o ci hè penalty !

Nò, nunda dice de Pandis.

U troppu stroppia ! Pè l'ottu milla spettatori di sòlitu cusì calmi ci n'hè una techja di fassi ghjucà à a risa di sta manera !


Ghjucadori è spettatori mughjanu. A pressione colla in Furiani chì avà hè più ch'è caldu.

In a piccula tribuna Nord, u cerbellu di i spettatori gira è certi decidenu d'andà à spiegassi elli stessi cun de Pandis.


Ma in Est dinù si spazienteghja !


Avà sò qualchì unu nant'à u terrenu à circà di tirà l'arechje à stu purcellacciu d'àrbitru anti-corsu chì hà decisu di mandà a Corsica in segonda divisione (infine, hè ciò chì ognunu si dice...).


Un barbutu in survet' hà riesciutu à chjappà à de Pandis pè u so collu è ùn lu vole cappià...

Quant'à mè falanu cutrate.

L'àrbitru ellu, ùn vole cappià u so fischjettu di fliccacciu...

Cumplettamente à l'addisperu, sbragagliulatu è a camisgia in pezzi, de Pandis ùn sà più chì fà.

U celu li hè cascatu à dossu à stu gallese solu solu è persu à mez'à tutti sti bàrbari corsi chì li ne volenu.

Avà Furiani s'hè transfurmatu in vulcanu chì s'hè discitatu dop'à parechji seculi insunnuliti, più scemu ch'è mai. L'ora di a rivolta hà sunatu !

Ci hè tuttu chì sorte : a gioia di Thierry Roland chì annunzia e disfatte di u Sporting a dumenica, l'inghjustizie di de Pandis, u disprezzu francese per a Corsica, è ci n'hè ancu stu connu di principe Albert...

Furiani si scatena, sò e quattru tribune chì ughjuleghjanu cum'è mai.

Una vera isteria culletiva s'hè impatrunita d'Armand Cesari.

Tutti, giovani sgaiuffi è babbi di famiglia rispettevuli, spazzini è sgiò, si sò trasfurmati in animali arrabbiati.

Furiani hà vintu : l'omu in neru capituleghja.

Ùn pensa più ch'è à una cosa : FUGHJE è mettesi à l'agrottu.

Si lancia innù un sprint d'antuluglia pè piattassi innù i vestitoghji.

Prublema : ci vole à passà davant'à a tribuna Est, tribuna pupulare induv'è l'animali arrabbiati, l'ochji sburlati, anu anch'elli qualcosa à dì à de Pandis.


Si puderia chjamà quessa intifadà : piove di tuttu nant'à u terrenu.


Peccatu, firmavanu dui minuti à ghjucà in prima parte.

In stu mumentu hè a cunfusione tutale in Furiani.

L'àrbitru hà corsu pè piattassi, nant'à u terrenu ci hè di tuttu, nimu sà ciò chì si passa è si u macciu hà da ripiglià un ghjornu.

De Pandis puderebbe arrestà u scontru.

Ma chì si saria passatu s'ellu s'avia dettu à tutta sta ghjente, 8.000 parsone scatinate, chì a partita era finita è ch'elli si ne entrinu in casa soia ?


I ghjucadori sò nervosi anch'elli...


...Nasce una baruffa cun sta closcia di DI Méco chì face u maccu...


Intervene Laurent Moracchini...

è Eric Di Meco, à l'epica u difensore u più gattivu è u più temutu di prima divisione, si piglia una capata...

Sott'à l'incuragimenti di a Est inscimulita...

U macciu hè piantatu durante 20 minuti. In Furiani accade qualcosa cun s'hè mai vistu. Allora chì i ghjucadori sò innù i vestitoghji, ch'ùn si sà ciò ch'ellu s'hà da passa, u publicu canta cum'è ùn l'hà mai fatta, e quattre tribune in listessu tempu, à strappassi i pulmoni.




Si face ancu una "olà" chì dura parechji giri, allora ch'ellu ùn ci hè NIMU nant'à u terrenu, qualcosa di cumplettamente SURREALISTU, cumu si sta sera 8.000 parsonne s'eranu date appuntamentu pè un delirium tremens cullettivu.

Finalmente u ghjocu ripiglia pè 2 minuti, eppo ghjè a pausa di a 'mi-temps'.

In u segondu tempu, hè tandu hè un'antra partita ch'ellu si vede. Luc Sonor rimpiazza à Di Meco, u nasu rottu. Ma i rossi ùn ghjocanu più. Casanova marca è vultemu à 2 à 1. Armand Cesari schjatta.



Cun u so publicu resu cumplettamente istèricu, i turchini si mettenu à ghjucà cum'è lioni. Vai chì sta volta à stu mullizzu di Thierry Roland l'avemu da caccià a voglia di ride !

Monaco ùn tocca più u ballò, induve seranu passati l'internaziunali cusì rinumati ? Facenu pietà, parenu una squatra d'amatori è u Sporting punta cù un Stéphane Ziani è un Ousmane Soumah di prima trinca.

Tutti i Bastiacci sò d'attaccu, è i Rossi tutti in difesa.

U lupinaghju Bruno Rodriguez segna una rete d'antulugia è vultemu à 2 à 2.

Furiani lascia schjattà a so gioia in un tazzu indescrittibile...


Chì serà allora u ghjornu induve a Corsica vince a cuppa di u mondu di ballò...



Durante parechji minuti hè a panicca nera...



Furiani piglia un'aria d'America Latina.

Finisce a partita à 2 à 2. Sta sera quelli chì anu fattu a scelta di vene in Furiani n'anu avutu per u so contu d'emuzioni è di carne pullina.

Cù un scenariu cumplettamente scemu, u Sporting hà ghjucatu una di e so più grosse partite di st'ultimi 20 anni.

U pùblicu, impazzitu da l'inghjustizie d'un àrbitru incumpetente è à prò di i munegaschi, hà riesciutu à pisà nant'à u ghjocu è à purtà i soii, purtante più debbuli, à u livellu di i rossi è bianchi.

A seguita a cunniscite : a Lega hà datu macciu persu à u Sporting è hà suspesu Furiani per una partita (chì serà persa 3 à 0...).

Ma di poi quella sera, u Sporting ùn lascerà più filà tanti punti in casa soia è e squatre frestere veneranu à ghjucà cù a paura.

Ma sopr'à tuttu, Thierry Roland ùn si ne riderà mai più di noi, a dumenica matina...

u 7 d'Aprile 2008
u webmaestru



1.mandatu da Mazzone u 07/04/2008 10:47
Ah ! Dopu à quellu d'a Bistuca è 'ssa storia di Dahu, eccu infine un articulu interessante nantu à a caccia à l'usu nustrale !

Ma cumu parlà di sta partita senza mintuvà stu famosu "trattu" chì attaccava senza vargogna stu carnavà di Thierry Roland è tutti sti pinzuti chì ci rumpianu e stacche !
http://ultrasbastiacci.free.fr/photos/bastia-monaco_94/le-tract2.jpg

Què pò sì chì ghjeranu ghjucatori : chì mittianu u pede, chì puntavanu u goal, chì scuzzulavanu l'arbitru... chì sciaccavanu e capate per pigliassi mese di suspensione è chì à u so vultà nantu à u tarrenu ne facianu altr'è tanti !

D'ogni manera saremu sempre una squadra di sgranchji fatta per fiascà, tandu, femuci omancu u piacè di marturià à quelli ch'affaccanu fieri fieri per i nostri lochi !

Ci vole à minà !
CQFD.

ps : da rimarcà dinù induve s'era ghjucatu u macciu di suspensione contru à Metz : in Tours, l'ochju mirlinu d'a Francia.
Tandu chì i Marsegliesi elli in listessa circunstanza ghjocanu per Montpelier...

Da riflette no ? ;)

2.mandatu da GWM u 07/04/2008 11:12
un esempiu tippu di un prublema più largu: cum'è fà per esse rispettati in casa nostra ?
St'articulu hè veramente unu di quelli ! per tutti i lettori chi eranu à sta partita, ci ghjunghjenu e lacrime di sicuru ! mi pare ch'ellu fussi eri...

Bravu Mazzone chi ci ha ramentatu u famosu "trattu" ! è postu chi nè simu à a rivista di stampa, sarebbe ottimu di buscà l'articuli di tandu parlendu di l'azzuffi è sopratuttu di u traumatisimu di i ghjucatori munecaschi.

>>>>>>>>ah iè, ghjé vera, ci hè un situ UB.


3.mandatu da circinelludiguagnènativupèliguagnesusosanguaversatu u 07/04/2008 13:06
Quissa si, chi era una partita di ballò !!!!!!!!
FOOOOOORZA BASTIIIIIIIIIIIIIIIIIIAAAAAAAAAAAAAA !!!!!!!

4.mandatu da Yvanuterribule u 09/04/2008 17:01
mi face pensà à quell'epica à un certu SLOGAN chi e tribune sane ripigliavanu: "Charlot falle fà la" l' aria era quella di a marsegliesa. Da crepa nè?

5.mandatu da anto di sarrula u 12/04/2008 13:19
popopo un mi ne inviniu guasgi piu di stu macciu , sogu cuntentu du m'aveddu rimissu in mimoria .

6.mandatu da Isulacciu u 13/04/2008 21:58
Leghju pé a prima volta su blog é cascu nantu un di sti matchoni d'antologia di u Sporting. Mi revene a stizza quandu vegu sta faccia di "palette" di Di Meco, ma ancu di grazia, c'era su bravu Moracchini !! Gloria a tè Lurenzu !!

Novu cumentu :