Accueil
Envoyer à un ami
Version imprimable
Partager

Ottanta suluzioni contr’à u riscaldamentu glubale

Ci ne serà una chì puderia ispirà a ghjente di u lucale ?



In u so libru Drawdown, Paul Hawken è una squadra di scentìfichi anu messu à a prova (incù mudelli matemàtichi) e suluzioni da luttà contr’à u scumbuglimentu climàticu è l’anu classificate da a più à a menu efficace. Allora chì ci hè da fà per economizà 1000 millarde di tunellate di carbone ?

Ottanta suluzioni contr’à u riscaldamentu glubale

Eccu u top 10 di e suluzioni e più efficace perchì ghjuntu à un piccu (drawdown), ùn si puderà più rincullà u riscaldamentu.

1/ Pate a sciappittana senza mancu una biera fresca o ghjacci in lu pastizzu ?
Turnà à apre e ghjaccere di Brandu o d’altrò ? Innò, ma, arricoglie, purificà, riciclà o rimpiazzà i gas HFC chì ghjovanu in i frigò, e clim, i cunghjalatori saria benissimu pè u clima. Top 1 !

2/ Utilizà l’energia di u ventu nant’à u liturale.
n s’agisce micca di fà appena di ventu incù un giurnale d’incrucittimi sott’à u parasole ma di pruduce elettricità. In Capicorsu u ventu ci hè natu, nò ?

3/ Fidighjà i vostri figlioli in caterochju quand’elli ùn finiscenu micca u so piattu ?
Inùtule o guasi. Ma sapè, chì u terzu di tuttu ciò chì hè pruduttu da l’agricultura hè ghjittatu nanzu di ghjunghje nant'à u tavulinu. Stu frazu rapresentà 8 % di l’emissioni di CO2.

4/ Nutriscesi di torta à i ceci è d'insalate ?
Micca solu. Ma manghjà di menu carne saria bè. L’allevu hè rispunsevule di 20 % di l’emissioni.


Ottanta suluzioni contr’à u riscaldamentu glubale

5/ Prutege e fureste tropicale
(ma dinù e fureste timperate)

6 & 7/ Educà è prumove u planning familiale
A liberazione di e donne di u Terzu Mondu ci puderia salvà à tutti !

8 & 10 Utilizà l’energia di u sole da pruduce l’elettricità
Ci ne serà sempre abbastanza per abbrunzà.

9/ Incuragisce u silvuppasturislismu
Fà u pastore in furesta : ci vuleria à cappià i porci sott’à l’arburi pè u sempre ?  Lascià e capre smachjà i castagneti ? L’affare serà più cumplessa ma dà à riflette.


A squadra di Paul Hawken hà studiatu d’altre suluzioni. Praticà un'agricultura chì rigenera a terra, fà chì e cità fussinu di più pedone, custruì in legnu o bambù, prutege e zone umide, utilizà u plasticu vegetale... S’è vo vulete sapene di più ed avè u classamentu cumplettu (in inglese) pichjate quì.

u 31 d'Aostu 2018
Zenbucucciu


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta