Accueil
Envoyer à un ami
Version imprimable
Partager

Perchè ci vole à esse fiera d'esse una strega

A ghjuvanetta o a giuvanotta decisa, emancipata, chì piglia u so volu, a donna di trent'anni chì ricusa d'esse solu una mamma o una moglia o puru di maritassi è di parturì, a donna di cinquant'anni chì ùn vole diventà invisibile, tutte assumanu a làscita di e prime donne ribelle, quelle chì a sucetà chjamava streghe. Ùn aspittemu micca l'8 di marzu per festighjalle.



« E streghe si tenianu arritte sole sole, fiere è indipendenti hè per quessa chì l'anu brusgiate ». E streghe persunificheghjanu a liberazione, a putenza invinta di e donne, scrive Mona Chollet in lu so libru Sorcières.
Perchè ci vole à esse fiera d'esse una strega

Cosa rimbiccava a sucetà patriarcale à ste donne chì sò state perseguitate, ghjudicate è tombe? Sopra à tuttu di liberassi di numerose custrizzioni suciale è d'esse autònume.

Ramintemu di ciò chì Dorothy Corrington scrivia à prupositu di e mazzere nustrale : « si suppone chì u mazzerìsimu offria un scappatoghju à a discriminazione sessuale è permettìa à e donne d’esercità i so doni psìchichi (ùn si sà perchè ci vuleria chì e donne avìssinu doni particulari, aghjunghje Carrington, irònica) ma era cusì. Sti doni occulti purtava à u rispettu ma dinù à a paura è certe volte sti doni eranu ripressi cù viulenza.»
Perchè ci vole à esse fiera d'esse una strega

A caccia à e streghe fù una guerra contr'à e donne. À u dicessettèsimu sèculu funu accusate d'esse streghe malèfiche e donne chì ricusavanu chì e terre cumune fussinu privatizate.

A fine di e forme cummunitarie di travagliu lasciavanu i povari senza risorsa è rendianu e donne dipendenti da u maritu. L'Inchisitori attaccavanu quelli chì ùn si pudianu micca difende : i poveri. E frà i poveri i più poveri : e donne. E frà e donne e più povere : e veduve, chì à a morte di u maritu, cunniscianu a sbratesca, a miseria assuluta.

A listessa èpica, a scienza hà screditatu i rimedii tradiziunali. A cunniscenza di e piante medicinale era una spezialità feminile ed eranu parechje e donne chì priparavanu infusione è decotti : certe funu brusgiate da l'Inchisizione accusate d'elaburà puzione màgiche ispirate da u Diavule.
Perchè ci vole à esse fiera d'esse una strega

L'Inchisizione trattava male e donne perchè eranu donne è basta : donne indipendente, ribelle o sapiente, veduve fiere, celibatarie senza figlioli, donne avanzate piene di sigurezza è di cunfidenza in sè, tutte pudianu esse trattate di streghe.

Oghje chì hè oghje, affrancassi di a duminazione maschile hè sempre un travaglione. A vuciata corre sempre (in lu Paese Mundiale) quand'una donna si pesa pè vindicà i so diritti : eri, strega, infanticidia, surpatrice, diavulella; oghje, dunnaccia o puttanone.

Ramentemuci ciò chì Edmond Simeoni, chì ùn temia e streghe, scrivia in la so Lettre aux femmes corses : « Je suis persuadé que la société politique, profondément machiste, ampute l’île d’un capital humain riche de potentialités importantes et la prive d’un atout majeur. »

Ma a rombu di cantà è di luttà...



u 30 di Ghjenaghju 2019
Zenbucucciu


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta