Quale serà u primu candidatu à scusassi per Ponte Novu ?

In l'anni 80 Jean-Marie Le Pen dicia à prupostu di i naziunalisti corsi : "c'est la trique qu'il faut à ces gens là" dopu ch'elli avessinu impeditu un meeting di u FN in Corsica.

Cù 35% di voti naziunalisti à l'ultime elezzioni, avà ci vole à "fà corsu". L'UMP vole "regiunalizassi" (sic) è avà si canta u Diu vi salvi Regina à a fine di i meetings.

Tantu peghju s'elli ùn a pensanu micca, s'elli ùn anu fattu nunda per a lingua corsa, avà ci vole à piglià i voti.

Hè dinù l'avisu di Marine Le Pen. Ùn ci pò pate, ma u tempu d'una dumenicata hè venuta à muntacci a sega. Allora hà resu omagiu à "les valeurs ancestrales" di i Corsi chjamatu i naziunalisti à vutà per ella.

Purtantu, si definisce cum'è "jacobine" è hè difficiule di fà più centralisatrice chè ella. Pensa è caca in francese, ma i voti di i naziunalisti corsi l'interessanu.

Hè stata chjara : "le bilinguisme c'est extrêmement grave" avia dettu nant'à France 5. Di a lingua corsa ùn ne vole sente puzza è d'evuluzione istituziunale ancu menu. A Corsica hè francese, puntu è basta.

Ma di siguru, cum'ella hà passatu u Diu vi salvi Regina à a fine, si piglierà bè unepochi di voti. Chè o vratè ?