Alice ùn canterà più "wou-hou" !

E storie d'amore finiscenu sempre male, quessa a sapiamu. Per Vanessa Hessler s'hè finita ancu cù un licenziamentu.

Sapete, Vanessa Hessler hè sta bionda tamanta chì passava in a pubbaccia pè a cumpagnia Alice, cù una canzona chì vi pichja e cerbelle.

A so colpa hè stata d'avè difesu u so ex, un certu Muatassim Kadhafi, figliolu di Muammar. L'attrice è mudella italo-americana pienghje a morte di u so preferitu : "Non posso credere che sia vero. E’ tutto molto triste” hà dichjaratu à un giurnale talianu.

Ci vole à dì chì e so parolle sò state appena strane : "Ce sont des gens très simples, comme vous et moi". Bon.

Hè vera, avà tuttu u mondu magagna a zitella perchè ch'ella hà una cuncipitura appena strana di a simplicità. Muatassim Kadhafi hè quellu chì avia fattu vene à Beyoncé pè u so anniversariu contr'à un milione di dòllari. Cugnumatu "u duttore", Kadhafi Junior avia a so propia armata è hè statu suspettatu d'avè preparatu un putsch... contr'à u so babbu. Ma hè forse perchè avia betu troppu, ci dice L'Express.

È le pene di l'amore, Nun le sà ch'à chì le prova dice una paghjella.

Oghje a tinta Vanessa, hà persu u so travagliu pè ste parolle, pè u so amore pè un Kadhafi. Hè propiu duru stu mondu...