Amazon è u trasportu rigalatu

Hè una quistione di primura. À l'iniziu, sta lege Lang avia per scopu di sparghje à u più i libri di tutte e mamme. Invece oghje ch'è oghje, pare ch'ella abbia d'altre cunsequenze nant'à l'impieghi di i librarii più chè nant'à a spartera di a cultura.

Hè a nostra manera di cuncepisce st'idea di "prezzu fissu di u libru" chì vene interrugata.

St'ultimi anni, i librarii sò stati tocchi da a cuncurrenza nant'à Internet di parechji siti frà quali u più putente : Amazon. Hè vera chì hè più praticu di cummandà un libru via Internet chè di falà in carrughju à visticà u libru ch'è no'circhemu à mezu à tanti altri. Omancu nant'à Amazon, sapemu subitu subitu s'ellu ci hè, quantu costa è quandu l'avemu da riceve. Ma u vantaghju maiò d'Amazon hè chì sti libri sò à listessu prezzu chè in e librarie.

S'è sta lege sarà interpretata in appellu cum'è in a prima decisione di ghjustizia, hè a strategia sana di u gruppu è l'interessu di stu cummerciu culturale nant'à Internet chì veneranu rimessi in causa. À l'ultimu, sò l'impieghi di i nostri librarii corsi chì saranu forse salvati?