Bona festa à tutti i vicini è ancu à l'altri

"I vicini sò i cucini" dicia un vechju pruverbiu corsu di u seculu passatu, à l'epica induve a ghjente si parlava sempre. Significava l'impurtanza di e leie è di l'aiutu trà di vicini, cunsiderati cum'è fendu parte di a famiglia.

Ma era à a prestoria. Oghje, ch'ellu sia in paese, in cità o in lotissement, leia suciale ci n'hè pocu è micca.

Ancu di grazia, pè luttà contr'à l'individualisimu hè nata in u 1999 l'idea di a fête des voisins. L'orìgine di sta festa si trova in Parigi, induve pochi sò quelli à scambià duie parolle, è ancu menu un bichjeru. Allora una volta à l'annu, ognunu fala una buttiglia di Banga, un jambon Herta è un pacchettu di Pepitos è si face bomba.

L'idea hè siguramente generosa... ma ùn ci vole micca à inchietassi chì sta festa esistessi ancu ind'è noi ? In Bastia è in Aiacciu, face qualchì annu ch'ella piglia.

Ci vulerà à felicitassi di sta suciabilità nova, ancu s'ella hè artifiziale ? O inchietassi di purtà ind'è noi stu mudellu pariginu ? Hè u segnu di u fiascu maiò di a nostra sucetà, quessa a sapiamu.

Ma si puderia forse truvà altre cose ch'è quessa. E feste tradiziunali corse si morenu, è noi ci lampemu in a "fête des voisins". Ùn ci hè ch'è da vede u riccu prugramma in Bastia (da vede in Corse-Matin) : omancu dece (!) appuntamenti sò previsti.

Ci hè veramente un prublema...