Internet è diaspora corsa

L'avemu digià detta nant'à stu blog, a moda in stu mumentu nant'à u net hè à i siti è reti detti di sucializazione. Ùn ci hè ch'è da vede i siti cum'è copains d'avant, Myspace è quellu chì marchja bè in stu principiu d'annu, Facebook.

Ma si tutti sti siti ponu parè cumplettamente inùtili è sò spessu visti cum'è perdita di tempu, in certi casi ponu dinù esse d'un grand'aiutu. Allora si parla spessu d'internet cum'è un media chì minaccia u ligame suciale (u tempu passatu à surfà hè tempu pigliatu nant'à a vostra vita cutitiana, à parlà cù i vostri vicini, à chjachjarà cù i vostri amichi in caffè...), u web pò dinù esse creadore di ligame suciale. Hè u scopu d'un situ novu, diaspora isulana, chì si primureghja di mette in leia i Corsi spalluzzati appena da per tuttu nant'à u nostru pianeta. L'edea hè semplice, ci hè un forum induve ogni sezzione currisponde à un cuntinente. È i Corsi chì sò nant'à l'isula Tonga, à u Groenland o in a Pampa argentina ponu avè una liccia di scuntrà i so paisani... s'elli ci sò è s'elli anu accessu à internet.

Eccu cum'ella si face a leia di a diaspora corsa à u terzu milleniu... Dunque studienti in erasmus, impiegati di i circuli di ghjocu africani, figlioli di l'emigrazione corsa à Puerto Rico o in Asia, corsi di Parigi, di u Lussemburgu o di China, stu situ hè per voi !

diaspora-isulana.com