Libertà pè i Papa Noël impiccati

Bon, dimmula franca, hè a moda ma hè piuttostu goffu. In l'orrore di e decurazioni di Natale, hè ellu u capimachja.

Ellu, hè u "Babbu Natale impiccatu". Face qualchì annu ch'ellu si vede, appena da per tuttu in e nostre cità è ancu in i paesi.

U corciu, cum'è s'ellu ùn avia abbastanza cusì, stu vechjone. In più di travaglià cum'è un dannatu a notte di Natale, in più di suppurtà u fretu, u tempacciu è a neve, in più di suppurtà i zitellacci scuntenti di i so rigali eccu ch'elli u volenu impiccà.

À i purtelli, à i balconi, nant'à i tetti è sott'à i ponti, da per tuttu avemu listessa impressione. Pare chì Babbu Natale s'hè impiccatu.

Serà ch'ellu travagliava ind'è Orange ?
Forse ellu dinù ùn suppurtava più e cadenze infernali di travagliu, e minacce di licenziamentu, di delucalizazione. Forse avia un patrone arrugante è inumanu ? Serà per via di a riforma di e ritirate ? A paura di a cumpetizione, d'ùn tene u colpu, di a cuncurenza d'un mondu sempre più duru ?

Almenu ch'ellu sia a paura di fassi cumprà da Veolia...

Alè, lascemulu stà stu poveru Babbu Natale. Da quì à un annu, li canteremu torna a Paghjella di l'impiccati di e decurazioni di Natale.