Mandà i nostri pulitichi in Bèlgica ?

I Bèlgichi ùn sanu più chì fà pè sprime u so addisperu. Anu lanciatu a so Rivuluzione di i pomi fritti pè festighjà u 249esimu ghjornu d'un paese senza guvernu. U record di l'Iraccu hè battutu. Infine, custì dinù ci hè dibattitu trà Walloni è Flamandi. Ancu custì, ùn sò micca d'accordu nant'à a manera di cuntà.

Ma u risultatu hè u listessu. Dapoi tantu tempu senza guvernu, futte veramente male in Auropa. Allora certi preferiscenu ridene è ci sò state parechje manifestazioni è iniziative di i Bèlgichi : greva di a barba, greva di u sessu...

Noi dinù, pudemu fà qualcosa per aiutalli. Quantu n'avemu omi pulitichi, merri, cunsiglieri generali, candidati fiascati ch'ùn dumandanu ch'è quessa, ghjunghje à u putere ? O piuttostu "accéder aux responsabilités" cum'elli a dicenu ?

Perchè micca pruponeli un "pack" d'omi pulitichi corsi disimpiegati, da mette à capu di a Bèlgica ? À l'anziana squadra chì era à capu di l'esecutivu di a CTC li manca u travagliu.

Ange Santini, Camille de Rocca Serra, Jérôme Polverini, Antoine Giorgi o Jean-Pierre Leccia puderianu purtà e so cumpetenze à stu grande paese. In più di quessa, quallà nisun rìsicu d'esse imbestiatu cù e storie di residenze segundarie è di bettunizazione di u liturale.

À manca è ind'è i naziunalisti dinù, ùn sò i candidati chì mancanu. Allora perchè micca ?