Méprisance, bravitude... Tù dinù, inventa una parolla nova !

Una campagna eletturale fatiga assai. Durante un meeting, Nicolas Sarkozy hà inventatu una parolla : la méprisance.

È si noi dinù, inventavamu parolle nove ?

Fratellanzassi : Fattu d'esse "fratè". Sì pò esse "fratè" cù un cuginu, cù a so surella, è ùn esse micca "fratè" cù u so fratellu. Esempiu : "André Paccou s'hè fratellanzatu cun Alain Orsoni".

Impezzificatu : Fattu d'esse "in pezzi" dop'à una grossa sborgna. Esempiu : "avà ch'aghju betu quattru buttiglie di Johnnie, sò impezzificatu è à mumenti aghju da rende".

Pumataghjizà : Azzione di diventà un pumataghju. Per via di a crisa, numerosi sò i Corsi à pumataghjizassi. Sinònimu : batte a closcia.

Prefettizassi : Significheghja u fattu per un Corsu di diventà antipàticu è rispettosu di e regule. Per esempiu, u tippu chì ùn vole fà l'apperitivu perchè "tu comprends, un verre d'alcool représente 40 grammes d'alcool dans le sang" li si pò dì : "buh, chì t'accade ? Ti sì prefettizatu o chè ?"

Disneylandizà : S'impiega per e millaie di Corsi chì tutti l'anni vanu à scopre a cultura à Disneyland, senza vulà vede altre cose. U Louvre, Orsay è Beaubourg, hè troppu cumplicatu.

Duppontaignantizà: Fattu di piglià a faccia sticchita di Dupont-Aignan.


Avà tocca à voi d'inventane d'altre.