Accueil
Envoyer à un ami
Version imprimable
Partager

Sorte Fidel, entra Raùl

Fidel Castro hà fattu sapè ch'ellu avia dà lascià u putere, è tenesi dispostu pè u populu cubanu, formula usuale pè significà chì u so fratellucciu Raùl sarebbe di sicuru u so successore. È forse per quessa ne parlemu à u passatu.



fidel castro, cuba
fidel castro, cuba
Mà più ch'un omu chì si ritira, a partenza prugrammata di Castro rapresenta a fine d'un'epica sana. Qualessi sò l'omi sempre vivi chì ponu fassi valè d'avè stampatu l'ultimi sessant'anni ? Era u sìmbulu di tutti i paradossi di ciò ch'è i storichi anu chjamatu a Guerra Freta. I populi di u Terzu Mondu avianu vistu chì e putenze mundiale eranu à l'affanu dopu à 1945, è circavanu di sfruttà a situazione pè fà cresce i so diritti, e più largamente a so libertà.

A rivoluzione cubana palisò à Ernesto Guevara, ben'intesa, ma sopr'à tuttu à u Lider Maximo. Dopu sti fatti, parechji intellettuali in Auropa ebbinu fede in l'idee di sta rivoluzione e Castro fù stimatu cum'è un'omu d'avvene. Ma prestu si incappò incù a realtà pulitica di l'anni sessanta : I Stati Uniti impunianu quellu blocus, mentre chi l'Unione Suvietica lasciava corre i Cubani.

Franchemu a crunulugia di u putere castrista è racugliemu solu unipoche linee nantu à u fattu ellu stessu, a partenza di Castro. Per certi, si ne và unu di i pessimi dittattori di a segonda parte di u vintesimu seculu ; per d'altri, hè un eroe, o ancu un dirigente chì hà pruvatu di curà u so populu cum'ellu pudia, è di mantene l'ideali di cio ch'è si chjama u sucialisimu rivoluziunariu, di pettu à tutti i cambii pulitichi è ecunomichi ind'u mondu.

In Francia u dibattitu ci pare staccassi in dui. Sicura, si sentenu di più quelli chì li preganu bon'viaghju è ventu in puppa, cuntenti di sbarazzàssine, dendu à chì nè vole lezzione di demucrazia, ma smentichendu chì i Cubani anu quantunque prufittatu di l'educazione è di un sistema di salute ottimu, micca cum'è in certi paesi amichi di a Francia, induve i capizzoni si manghjanu tuttu incù a benedizzione di u guvernu francese, mentre chì i disgraziati famiti sò sempre di più numarosi, in Africa per esempiu.

A rivoluzione hà permessu à certi populi di gode di a libertà cusì bramata. Cosa diventa a rivoluzione quand'ella hè finita e chì nimu ùn vi aiuta ? Cosa diventa l'idea stessa di un putere rivoluziunariu dopu cinquant'anni ? Ci hè stata a sprufundata di u Communisimu, u blocus, e prove d'assassiniu di l'Americani, a mundializazione, ecc. Allora diceremu chì a fiura di Castro pone u prublema di u prezzu di a libertà. I primi à ghjudicà seranu davveru i Cubani.

u 20 di Farraghju 2008
BOBZOMBIE


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta