Un ghjornu, ùn puderemu più bagnacci in u Mediterraniu

È sì u fattu di ciuttassi in u mare Mediterraniu diventerà un lussu chì i vostri figliulini ùn puderanu fà ?

Un raportu di u senatore Courtaud chì u Mare Nostru hè in una situazione inchietante.

Più ch'è u riscaldamentu climàticu, hè l'urbanizazione è a frequentazione troppu forte di u liturale chì minaccia l'ambiu. In 30 anni, a pupulazione in bor' di mare hè crisciuta di 50%, senza chì l'infrastrutture di trattamentu di l'acque brutte seguitinu. Peghju : sta pupulazione duveria cresce di 41% à l'orizonte 2025.

È ùn parlemu mancu di a pressione turìstica...

D'altre inchieste avianu dimustratu chì i pesci eranu pieni di materie plàstiche è ch'elli ci sò pienu di piccule partìcule chìmiche, resti di creme pè u sole è di medicine...

Tuttu quessa hè di siguru un dannu pè a biodiversità di u mare. Quand'ellu si sà chì u Mediterraniu hè à metà chjosu è ch'ellu ci vole un seculu pè rinnuvellà l'acque, ci hè da trimà per l'avvene.

Ma bon, tantu ch'ellu face prò à l'ecunumia, chì l'urbanizazione è u turìsimu mal pensati di tutte e manere "iè ma capisci, ça va créer des emplois", tuttu và bè...