Accueil
Envoyer à un ami
Version imprimable
Partager

I nùmeri pè ghjucà à china

Un lettore ci hà dumandatu i numeri pè ghjucà à china. Eccu quelli chì sò stati ricacciati da L'Almanaccu Bastiacciu. À voi di truvanne d'altri, o d'inventalli !



Da leghje in L'Almanaccu Bastiacciu

1 . Unu. Ùnghjimilu... u pane, o Mà !
L'ancinu
U primu di mille
U più chjucu

2. Dui. U cuppiolu
A pullezza

3. Trè. Voli fà l'amore cun mè
L'arechje di u topu
L'arechje di Tittu

4. Quattru. U cappellu di u cumissaru

5. Cinque. A lèsina
A lesinaccia di Ziu Tittu

6. Sei. Ch'ùn hè nove !
Un puntu inghjò

7. Sette. A pippa
A zappa
A disgrazia di u pòvar'omu

8. Ottu. Un bellu cirottu
U gobbu
A zucca di San Roccu

9. Nove. À tè e chjòppule è à mè l'ovu

10. Dece. Ochjone
E grocce
U guerciu
I nùmeri pè ghjucà à china

11. Òndeci. E schinche di Messè
E gambe di u piuvanu

12. Dòdeci. A duzina
L'apòstuli

13. Trèdeci. U cundannatu ( = Ghjuda)
U puntu di u diàvule

14. Quattòrdeci. L'omu forte
U rè

15. Quìndeci. Santa maria
A zitella.

16. Sèdeci. San Roccu

17. Dicessette. A disgrazia

18. Diciottu. U fangottu
U to culu hè cottu

19. Dicennove. U dirruchjatu

20. Vinti. U prezzu di u vinu
U prezzu di l'oliu

21. Vintunu. U cuscrittu

22. Vintidui. E pullezze (= a pulizza)

23. Vintitrè. Di a scagliola, tricchi è tracchi è tù sì fora

24. Vintiquattru. L'avemarìa
San Bàrtuli

25. Vinticinque. Natale

26. Vintisei. Sant'Anna

27. Vintisette. E to calzette.

28. Vintottu. Sant'Agustinu

29. Vintinove. A gallina hà fattu l'ove


I nùmeri pè ghjucà à china
30. Trenta. Un mese
A pullezza canta

31. Trentunu. U sgiò Ghjuliu
L'ultimu di u mese

32. Trentadui. Entràtemi in culu tramindui

33. Trentatrè. L'età di Cristu
E furmìcule

34. Trentaquattru. Attenti à u latru
U nivone

35. Trentacinque. A forza di l'omu

36. Trentasei. Trentasei berrette rosse in piazza d'Omessa

37. Trentasette. Puzza di calzette
Belli scarpetti.

38. Trentottu. U to nasacciu tortu
L'artiglierìa

39. Trentanove. Aghju fattu un ovu

40. Quaranta. L'annu di a disgrazia

41. Quarantunu. Quattru è po unu

42. Quarantadui. Basgiàtevi tutt'è dui

43. Quarantatrè. L'amore hè rè

44. Quarantaquattru. Quaracquàcquà !

45. Quarantacinque. U saccu gira

46. Quarantasei. Sò ghjunti l'Ebrei

47. Quarantasette. L'hai da sente u 47 !

48. Quarantottu. U to culu hè cottu

49. Quarantanove. Di Pasqua si mànghjanu l'ove

50. Cinquanta. Mezu sèculu

51. Cinquantunu. Sta mane sò dighjunu

52. Cinquantadui. Sì sola o site dui ?

53. Cinquantatrè. L'arechje di u rè.
Zia Ceccè

54. Cinquantaquattru. Mi ne sciaccu quattru

55. Cinquantacinque. Cinquanta schinche
E furlanette

56. Cinquantasei. Cinquanta sedie

57. Cinquantasette. Quellu chì tene u sacchettu

58. Cinquantottu. U to saccu sia viotu

59. Cinquantanove. Pittittu hà fattu l'ovu

60. Sessanta. Tù scia santa

61. Sessantunu. À chì hè techju à chì hè dighjunu

62. Sessantadui. Senza dùbbitu

63. Sessantatrè. A surella di Sesè

64. Sessantaquattru. Si sò messi in quattru.

65. Sessantacinque. U riposu

66. Sessantasei. E lèsine
E paghjulette di i Lucchesi

67. Sessantasette. Caccia e to barrette

68. Sessantottu. Tuttu l'annu à collu tortu

69. Sessantanove. Fù di maghju chì si piense
Colla è fala pè u paese


70. Settanta. A guerra

71. Settantunu. Faci per ognunu

72. Settantadui. Zappette ne aghju duie

73. Settantatrè. Basgiàtevi tutt'è trè

74. Settantaquattru. Site sette è simu quattru

75. Settantacinque. Trè quarti di centu

76. Settantasei. Ohimè!
Pòvar'à mè !

77. Settantasette. E zappette
I spusini

78. Settantottu. Ti deraghju u votu

79. Settantanove. Stà quì chì piove !

80. Ottanta. L'amore canta

81. Ottantunu. U rompidighjunu

82. Ottantadui. L'età di U Babbu

83. Ottantatrè. L'amore cun mè
L'età di u rè

84. Ottantaquattru. Senza paracqua
U caccavellu hà un cappellu

85. Ottantacinque. L'annu chì corre

86. Ottantasei. O le mio cose

87. Ottantasette.Vechje barbette

88. Ottantottu. E pastoghje
E zucche di Carlone

89. Ottantanove. Stà quì è ùn ti move

90. Novanta. U Più vechju
Arcibabbone! - Ghjè ind'u cascione! rispòndenu l'altri

u 2ndu d'Aprile 2011
U Webmaestru



1.mandatu da orsucciu u 02/04/2011 20:21
Saria statu bè di spiecà ci parchì issi numari t'ani issa significazioni, chì eu à a china, ùn ci aghju mai ghjucatu! Forsi sara u casu pà d'altri

2.mandatu da estrimei u 02/04/2011 20:35
aghjustà duie parulle au numeru ch'he chjamatu, he una manera d'assicurà chi stu numeru he ghjustu.
quand'omu riempie una linea si face china , quand'omu riempie un chertone si face tombulla.
s'annunzia "a unu " quand'om'aspetta un numeru per vince.
s'annunzia "a tre "quand'elli mancanu tre numeri per fà tombullà.
e quand'elle si vincianu l'ellezzioni, in Corti si cantava (secondu u pertitu) :
he tombulla
he tombulla
e tombulla serà
contr'a lu pertitellu (o pertitone)
un si ci po luttà

3.mandatu da ANTO u 03/04/2011 08:09
Eu a parola : "china" a scriveresti "quina" chi a radica d'issa parola hè "quintu"(5) in latinu.
So dinu , pé i dieci primi numeri , i nomi chi si dannu ghjucandu a a mora !

4.mandatu da ticchiticchi u 03/04/2011 11:27
ondeci : gambe di prete
vinti dui: e pullezze
trenta, quaranta : a gallina canta
cinquanta : u ritornu di l'età
settanta sette: e duie zappe
ottanta : caccaru hè in America

5.mandatu da LISU u 03/04/2011 14:33
novanta ...... u vecchiagoné
sessanta nové.....volta hé gira
trenta tré.....u dutoré
ondeci.... l'anché di striquinetta

6.mandatu da estrimei u 03/04/2011 16:01
o ANTO ,
se tu scrivi :quina a prununzia serà cuina .
e un si dice micca cuina ma china .
per contu meu , do a primura a u parlà nantu a a raica (radica).
un ci scurdemu chi a nostra lingua era parlata , quelli chi a scrivianu s'appughjavanu nantu a u talianu e ...u frencese . oghje ci so regulle chi a stabbiliscenu, ma so fatte da pocu

7.mandatu da Imperium u 03/04/2011 17:21
17 a disgrazia di Zalana..............

8.mandatu da orsucciu u 03/04/2011 18:05
à Ringrazià vi O estrimè è Antò!

9.mandatu da ticchiticchi u 03/04/2011 19:20
Cinque: l'amore vince

10.mandatu da Laura u 07/04/2011 10:37
Ottu: u to culu hè cottu !

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta