Accueil
Envoyer à un ami
Version imprimable
Partager

« Per un impiegu creatu in un centru cummerciale, sò 3 à 5 impieghi distrutti in altrò »

Tutti i ghjorni in l'infurmazione corse si sente parlà di « développement », è si ghjustificheghjanu i prugetti dicendu chì « ça va créer des emplois ». È s'ellu s'hè custruitu assai st'ultimi anni, sì u paisaghju corsu hà mutatu di manera prufonda (micca sempre in bè), a situazione ecunomica di a Corsica hè sempre pessima. Allora avemu dumandatu u so parè à Sébastien Celeri, architettu in Bastia. Parlemu appena d'urbanizazione, d'agricultura è di sviluppu.



A Piazzetta : In un'intervista à Corse-Matin, dicie ch'elli sò i prumutori chì anu a maestria di u sviluppu. Perchè ?

Sébastien Celeri : Perchè per custruì a cità ci vole per forza chì à l’iniziative di i prumutori sia assuciata un'implicazione forte è una maestria di u fundiariu da i puteri publichi. Trà u prumutore è a cumuna, manca un intermediu, « l’aménageur ». U rollu di sta struttura hè d'avè ghjustamente a maestria di u fundiariu è di sparte i terreni sicondu principi chì sianu cuerenti incù a pulitica lucale di a cità. In somma, cumprà i terreni, cuncipisce strade è i spazi publichi, è po vende i terreni à i prumutori chì anu l’obligazione d'integrà e so custruzzione in un « projet d’ensemble », in una logica chì deve rispettà l’interessu publicu nanzu à l’interessi privati. Per avà sò sempre l’interessi privatì chi priduminanu.

Da leghje :


Chì hè « l'étalement urbain » ?

Hè u fattu di custruì cunsumendu un massimu di spaziu, sopr'à tuttu in e periferie di e cità. Si multiplicanu i « lotissements », e strade, e zone cummerciale fora di e cità, spessu à u prighjudiziu di e terre agrìcule. Stu fenomenu crea impurtanti disiquilibri in u funziunamentu di e cità, perchè sò dinù multiplicati i spiazzamenti in vittura frà casa e locu di travagliu. Oghje ci vole à vultà à principi di densificazione urbana. Vole dì custruì di manera cumpatta, incù case più appicciccate, cunsumendu duque menu spaziu. Un vole micca dì custruisce « des barres », i nostri paesi sò un esempiu perfettu di densificazione…
Califurnia ? Seine-et-Marne ? Nò, Corsica...
Califurnia ? Seine-et-Marne ? Nò, Corsica...

Ma purtantu a Corsica hà bisognu d'alloghji nò ?

Iè, ma u prublemu un hè micca u fattu di a quantità, hè una quistione di qualità di sti novi alloghji da custruì. Si pò custruì assai ma si deve custruì megliu, tenendu in contu ancu u fattu chì in a qualità di vita entranu e custruzzioni ma ancu i spazi chì ùn sò micca custruiti, spazi publichi, giardini, spazi naturali, agriculi…

In stu mumentu si parla assai d'agricultura urbana, di giardini spartuti... Ci credi tù à quessa ?

À u cuntrariu d'altri lochi, in Corsica avemu cunservatu a leia incù a natura, ancu in e cità cum’è Aiacciu è Bastia. Allora chì oghje avemu una cuncezzione d'una natura salvatica è mai tocca da l’omu, stu fenomenu ci permette di ritruvà a leia incù ciò chì hè veramente a natura in Corsica : un ortu, una natura pruduttiva, a terra chì nutrisce a ghjente. È in più, ci permette ancu di ritruvà novi lochi è spazii cullettivi induve a leia suciale si face incù l’attività è a spartera.

« Per un impiegu creatu in un centru cummerciale, sò 3 à 5 impieghi distrutti in altrò »

Oghje e periferie di Bastia è d'Aiacciu si sviluppanu assai. E cumune di a piaghja crescenu dinù. Trovi chì l'urbanizazione hè pensata male ? Perchè ?

L’urbanizazione hè pensata male, megliu, un hè micca pensata. Allora chì l’urbanisimu deve risultà d’un prughjettu à scala di u territoriu, di un'unità, oghje tuttu hè fattu à pezzi è à buccò. Vultemu à ciò ch'è no diciamu prima, nant’à u fattu chì sò l’enti privati chì anu a maestria… Ma stà per cambià oghje, incù l’elaburazione di novi ducumenti di pianificazione (cume puderia esse u Padduc…), ch’ùn sò micca perfetti mà chì anu u meritu d’esiste è di dimustrà chì a riflessione si sviluppa oghje à a scala ghjusta.

Parli di l'esempiu di « Plan de Campagne ». In chè ùn hè micca un mudellu ? Purtantu sò numerosi quelli chì dicenu ch'ellu hà da « creà impieghi »...

Oghje avemu da sorte di stu principiu di « monoattività », vale à dì zone solu cummerciale, industriale o d'alloghji… Al dilà di a « mixité », a mischjità suciale, si deve parlà di mischjità funziunale. E nove zone d’urbanizazione devenu integrà tutte e funzione di manera à diventà veramente « quartieri », è più « zone ».
Per ciò chì tocca à e zone cummerciale, hè ghjusta di dì chì a custruzione d’un supermercatu hà da creà impieghi. Ma per un impiegu creatu in ste zone, sò 3 à 5 impieghi distrutti in altrò (agricultori è pruduttori lucali, cummercianti di u centru di e cità…). St’ argumentu ùn vale nunda.
U fiascu di stu mudellu di sviluppu hè statu dimustratu dapoi parechji anni in altrò. Ind’è noi cuntinuvemu nant’à sta via, ùn si vole micca capì chì e cunseguenze sò dramatiche nant’à u pianu urbanisticu, ecunomicu è eculogicu, sapendu chì, oltre l’industria di u bastimentu, sò questi hypermercati chì ci portanu una parte maiò di rifiuti rispunsevuli di ste « crisi » ch'è no cunniscimu bè…


Situ internet : ca-architectes.fr
Nant'à Twitter : @caarchitetti

« Per un impiegu creatu in un centru cummerciale, sò 3 à 5 impieghi distrutti in altrò »

Publicatu u 03/10/2016
Aghjurnatu u 26/01/2017

u 26 di Ghjenaghju 2017



1.mandatu da estrimei u 07/10/2016 08:10
bellu scrittu !
l'infurmazione , ancu spiritosa , per dà forza a u cuntrastu demucràticu nustrale :mi pare ch'ella hè a nova stravva à precà à a Piazzetta .

Novu cumentu :



Seguitateci nant'à Facebook



Abbunatevi à a newsletter

Circà nant'à A Piazzetta