Accueil
Envoyer à un ami
Version imprimable
Partager

Site sempre quì ?

Avà chì a timpesta di u « SòquìGate » hè passata, chì e rete suciale si sò calmate (o piuttostu chì sò passate à un'altra pulemica), hè forse venutu u mumentu di riflette una cria, di manera appaciata. Ci site ?



Era un’affare chì duvia accunciassi à l’internu di u stabilimentu, in u dialogu trà insignanti è parenti. Ma hà infiaratu e rete suciale, fattu e prime pagine di i giurnali è finitu à l’assemblea di Corsica. Tuttu què per duie parullete di corsu dette da un zitellu à a chjama d’un insignante (ne simu sempre quì ?).

Cumu serà chì in u 2018, duie parolle d’una lingua muribonda, face nasce timpeste simile ? Ci sò quelli chì a difendenu (troppu spessu in francese…) è quelli chì a disprezzanu (iè, sò numerosi dinù quelli chì ùn ne volenu sente nunda, mancu duie parolle…).

Cumu si pò capisce chì a risposta à duie parolle d'un zitellu chì vulia parlà a so lingua sianu « stà zittu » ?

Forse, pudemu dì chì sta situazione ùn saria accaduta sì...

...e filere bislingue fussinu da veru sviluppate

In u segundariu mancanu l'insignanti bislingui. Parechji posti riservati à l'insignanti bislingui, vale à dì « frezzati » ùn trovanu prufessore. L’insignanti di storia, di matematiche o di SVT capaci d’insignà a so materia in corsu sò rari. In u primariu accade chì quand'elli mancanu ùn sò micca rimpiazzati. È in parechji cullegi ùn ci hè filera bislingua, è in liceu ancu menu. À quandu una vera riflessione pè e filere bislingue ? (chì ogettivi ? chì scopu ? chì finalità ? chì furmazione pè l’insignanti di e materie ?). Ma ùn hè micca a priurità di u ministeru.

...a lingua corsa ùn fussi micca solu un sìmbulu
Hè sempre listessu custatu à ogni nova pulemica : a lingua corsa hè un sìmbulu maltrattatu da e lite pulitiche. À chì a difende, à chì ùn a vole sente. È s`è no circavamu di salvalla, senza fanne un ogettu, un unicu slogan, un mottu ch'ellu si torna à sorte à ogni campagna eletturale ? È s'è no faciamu un puntellu di a sucetà ch'è no vulemu fà, leia trà u mondu latinu, u nostru raportu à l'altri è e nostre radiche, i nostri antichi, u nostru territoriu ? Sunniemu ?

…a lingua corsa fussi di tutti
Dimmula franca : certe volte e filere bislingue servenu à i parenti à ùn mischjà i so zitelli à i stranieri. A sola suluzione per evità quessa : generalizà l'insignamentu bislingu. A lingua corsa per tutti !

...a lingua corsa fussi appena di più parlata... è scritta
Difende u « sò quì » hè bè. Ma perchè dilla in francese ? Nant'à e rete suciale, e chjame à a mubilizazione o i messagi di prutestazione eranu pè a maiò parte scritti... in francese.

…a lingua corsa fussi di più trasmessa
Cù una trasmissione chì tocca mancu 20 % di e famiglie corse (15% parlanu corsu è francese in casa, 2% solu corsu), a lingua corsa ùn anderà tantu luntanu. Ci discitemu ?

…s’ellu ùn si mettissi tuttu in colpu à a scola
Dop'à tanti anni d'inglese, quale a si sente di sprimesi in a lingua di Shakespeare ? A scola sola ùn pò salvà a lingua. Tantu pesu nant'à e spalle di i « profdecorse ». S’ellu ùn ci hè nunda in casa, nunda in carrughju, nunda in a sucetà, perchè tuccheria à a scola di salvà a lingua ? A scola ùn pò fà tuttu.

...ùn si mettissi tuttu à colpa di i giovani
Si vede dinù i vechji rimpruverà i giovani d'ùn parlà a lingua... chì i vechji ùn li anu amparatu. Ah s’elli l’avianu trasmessa appena di più…

...a lingua avessi un'altru statutu
Facultativa, ozzionale = goffa. Si rimpruvereghja à i liceani d'ùn andà à i corsi di corsu. Prupuniteli di sceglie d'andà o nò in corsu di matematiche. Viderete u successu di e materie ozziunale.

...ùn fussi solu di i naziunalisti
U rìsicu saria di fà di a lingua corsa a lingua di i soli naziunalisti. Ma u corsu hè di tutti.


Sò numerosi quelli chì a difendenu, siguri di a so cultura, senza odiu, di manera custruttiva (Praticalingua, Soffiu di lingua, Tempi, Tonu è Timpesta, Parlemu Corsu, Teatru Nustrali, Storia nustrale, I me loca, l'Adecec, U Sciintificuchju, Fiura Mossa...)

Allora circhemu di parlà di lingua corsa senza pulemica, di manera appaciata, pusitiva, senza fanne un sìmbulu, un ogettu di lita, un slogan, un mottu puliticu viotu. Si pò pruvà di falla campà tutti i ghjorni, micca solu quandu l’attualità s’infiara ?

Site sempre quì ?
Site sempre quì ?


Ritrattu Instagram di @seb_clr

u 13 d'Utrovi 2018



1.mandatu da bastiacciu stortu u 26/10/2018 11:15
un c'è nisunnu .. dopu si pienghjera !...

2.mandatu da Fabriziu Albertini u 02/02/2019 03:17
Sò qui

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta