"Cosa ci capisci tù à u ballò ?"

Cusi m'ha dettu u me maritu dopu a partita contra Rennes. Cusi hè nata a baruffa in casa.

"Dimmi o merdosu, ùn eri ancu natu ch´eru dighjà in Furiani ! Sò nata in lu 78 eiu ! E pò, ùn aghju aspittatu à tè pà sustene u Sporting o u Gaz ! Aghju ancu sustenutu a JSA ! Iè, quella JSA di Khazri ; l'aghju vistu nasce eiu à Whabi !

Hè vera, ùn possu micca passà i me ghjurnati à leghje l'Equipe, à fighjulà u Canal Football Club o annantu à Camperemu parchi, eiu, tempu ùn ne aghju !
Ma sai, anch´eiu possu imparà à l'ammente tutti i sciffri, tutti i statistichi. Anch´eiu possu parlà di una partita di u 1983. Anch´eiu possu parlà ore sani di un macciacciu cù i me amichi. E allora ? Farà di mè un spezialistu di u ballò ? Innò di sicuru...

Sapia chi, pà mè, ci sò livelli sfarenti di spezialisti. Mentre chì tù parli di u Sporting dicendu "noi", mentre chì tù vai in Furiani, mughji, leghji, analiseghji i prupositi di Hantz, sai tuttu di u "mercato", eiu tengu i zitelli, ùn dicu nunda quandu ci vole à pagà l'abbunamentu, ùn dicu nunda quandu quellu abbunamentu ùn serve è chì "noi" andemu à ghjucà in Gueugnon o à "huis clos"... Ti rigalu un "maillot porté" pà Natale, vocu a sera in Décathlon à cumprati un calzone contra u fretu chi face in "Sainté"...

Allora stà mi à sente, è quessa vale pà tutti i to amichi di Camperemu chì criticheghjanu i donni : esisteria Cahu senza a so mamma ? Hè solu u figliulinu di Pierre Cahuzac ? Nò, hè soprattuttu u figliolu di a so mamma ! Vale à dì, di una donna !

Forse, à u ballò ùn ci capiscu nunda, ma mi pare chi facciu un sforzu tamantu pà capisce l'impurtante pà tè, ùn hè vera ?

Avà, và ti ni in "Sainté", mi farà appena di vacanzi ! Ancu assai ch´ellu ci hè stu ballò..."

Chì hè u ballò pà voi ? U piacè è a tranquilità quandu u vostru maritu parte ? Un remake di " Kramer contre Kramer ?"

Toute ressemblance avec des personnes ou des faits existant ou ayant existé n'est que pure coïncidence.