Dopu à a 'dictée di Pivot', eccu a 'dictée di Bastelica'

Ma chì s'hè passatu in u capu di u ghjudice Bonifassi ?

Vuluntà di pruvà metode nove di a ghjustizia ? Vuluntà di ristabilisce infine a ghjustizia in a sottumessa pieve di Cavru ?

O allora, oziu ? Tuntia ? Prova di fichage d'un paese sanu ?

A "dictée di Bastelica; hà stunatu à tutti è pruvuchjeghja tante interrugazioni.

Ci vole à dì chì sta volta, anu fattu forte. Pocu casting ! Personne anziane, certe chì eranu morte, un cecu...

Una quindecina di gendarmi sò stati mubilizati pè l'operazione. Ma cosa vulianu truvà di cusì impurtante in Bastelica !

Sempliciamente per ritruvà l'autore di lettere anonime, ligate à una tentativa d'attentatu cù... un'apparechju chì ùn pudia saltà.

Hè vera chì ssa storia di paese meritava siguramente tanti mezi. Hè a sorte di a Corsica chì ne dipende. Piccula desillusione : ùn mancava ch'è u GIGN.

In tantu d'aspettà a cunclusione di l'inchiesta chì serà siguramente passiunante, sugerimu à u ghjudice Bonifassi d'interessassi à i numerosi affari d'assassinii mai risolti, à quelli di racket, di droga, di grande banditisimu chì sò a rimigna di a Corsica.