Accueil
Envoyer à un ami
Version imprimable
Partager

I clubs di futbol smarriti, è quelli chì sò vultati

Ùn hè eternu nunda, sopr'à tuttu micca in futbol. I clubs chì anu cunnisciutu a trafalata per ragione finanziarie si spartenu in duie categurie. Quelli chì sò vultati in furia, è quelli chì ùn si sò mai più visti à u primu pianu.



I clubs chì sò vultati :

Napuli :
A trafalata, l'hà cunnisciuta ancu u club di Maradona. In u 2004, e debbite di l'anzianu club di Maradona s'alzanu à più di 60 milioni d'€.

I clubs di futbol smarriti, è quelli chì sò vultati

Mandatu in terza divisione, u club di Napuli scambia d'identità per purtà l'orribile nome di « Napoli Soccer ». Hè a doppia pena. Sterà dui anni in purgatoriu. Torna à truvà a serie B in u 2006 in listessu tempu ch'è u so nome storicu (Società Sportiva Calcio Napoli) è a serie A l'annu dopu.

C'era appena d'ambianza à u San Paolo pè u ritornu in serie B in u 2006 :


A Fiorentina :
22 milioni d'€ di debbite in u 2002. I fiurentini piglianu l'ascensore di a falata pè riparte in quarta divisione. A sucetà cambia di nome per chjamassi « Florentia Viola ». Sott'à u cummandu di Pietro Vierchowod, a squadra finisce prima. L'annu dopu ritrova u so nome « AC Fiorentina », è surpresa, si ritrova direttamente prumossa in... serie B (purtantu senza l'aiutu di Luc Dayan). Ritrova a serie A a stagione dopu.
I clubs di futbol smarriti, è quelli chì sò vultati

Strasbourg :
U club alsassianu hè statu cumpagnu di u SCB pè a falata in National di maghju 2010. Mentre chì u Sporting cunnosce u successu cun Hantz, u Racing hè dichjaratu in fallimentu è piglia a strada di a quinta divisione (CFA2 in 2011-12). Ùn ci sterà tantu. U club cunnosce a cullata dui annu à filu. L'annu di National hè più cumplicatu. Strasbourg si ritrova in i clubs chì falanu ma hè « piscatu » è pò riparte in terza divisione. L'annu dopu finisce campione. A dinamica hè lanciata. Pè u so ritornu in L2 in a stagione 2016-17, Strasbourg hè campione è face u so ritornu in L1. Sei anni dop'à l'infernu di u CFA2.


Parma :
Ridite di e debbite di u Sporting ? Chì ci vulerà dì di quelle di Parma, chì s'alzavanu à 218 milioni d'€ in u 2015. I gialli è turchini chì anu cunnisciutu e cime di u futbol auropeu è i più grandi ghjucadori di u cuntinente si ritrovanu in quarta divisione.

Ma à ogni stagione i parmigiani sò turnati à cullà. È anu riesciutu una prova : 3 anni dop'à u fallimentu, sò di ritornu in serie A.


Quelli chì ùn si ne sò mai rimessi...

Racing Club de Paris :
30 stagioni in prima divisione, 1 titulu di campione di Francia, 5cuppe è tanti grandi ghjucadori : Enzo Francescoli, Luis Fernandez, Pierre Littbarski, Rabah Madjer, David Ginola...

S'hè chjamatu un tempu « Matra Racing » quandu u grande patrone Lagardère avia decisu d'investisceci i so soldi. Ma quand'ellu si ne và in u 1989, u club piglia a falata. St'ex-grandissimu club di a storia di u ballò francese ghjoca oghje in l'anonimatu di a DH parigina... Trista.
I clubs di futbol smarriti, è quelli chì sò vultati

L'AS Cannes :
22 stagioni in prima divisione, u più grande centru di furmazione di Francia è tanti pistelli di u ballò cum'è Zidane, Micoud, Frey, Vieira, Boksic... Tuttu què per scunfiniscesi oghje à Gémenos è Aubagne. Semu fratelli di straziu.
I clubs di futbol smarriti, è quelli chì sò vultati

U Sporting Club di Toulon :
12 stagione in prima divisione, un publicu fidu, un stadiu caldu, una storia à u nivellu prufessiunale (Delio Onnis, Rolland Courbis, David Ginola, Pascal Olmeta, Leo Rodriguez, Joseph-Antoine Bell...), è dapoi u 1993, più nunda. Dop'à un girettu sin'à a DH, u club oghje hè in N2.
I clubs di futbol smarriti, è quelli chì sò vultati

Martigues :
20 anni di prufessiunalisimu, 3 anni in prima divisione, è tante partite contr'à u
Sporting in l'anni 80 è 90 (quelli chì anu seguitatu à Bastia tandu si n'arricordanu di e
partite à Francis Turcan). Face più di quindeci anni ch'ellu ùn si ne sente più parlà. Oghje
s'annoia in N2.
I clubs di futbol smarriti, è quelli chì sò vultati

Gueugnon :
Trè punti in cumunu trà u SC Bastia è u FC Gueugnon : Tony Vairelles, e partite di suspensione ghjucate à u stadiu Jean Laville, è a trafalata sin'à u N3.
I clubs di futbol smarriti, è quelli chì sò vultati

FC Wimbledon :
Vi lagnate di i dirigenti corsi ? Andate à vede l'inglesi. U FC Wimbledon hè un club piuttostu mezanu ma onestu di u campiunatu inglese. Fundatu in u 1889, s'hè fattu cunnosce pè u so « crazy gang » in l'anni 80-90 cun John Fashanu è u macellu di Vinnie Jones (record d'espulsione dop'à 3 seconde di ghjocu).

I clubs di futbol smarriti, è quelli chì sò vultati

Ma à u principiu di l'anni 2000, u so presidente decide di... cambià di locu. U club smubuleghja in a cità nova di Milton Keynes, à 100 chilometri di Wimbledon (imaginate u Sporting trasfurmassi in un estate in Sporting di Baleone). Iè, hè pussibule in Inghilterra. In crisa nera, i sustenidori creanu un club novu,
l'AFC Wimbledon chì parte à u livellu amatore (imaginate i Socios rifundà u SECB chì parteria in PHC...). Oghje anu a so rivincita, l'AFC Wimbledon hà raghjuntu Milton Keynes in terza divisione. Sò veramente tonti st'Inglesi.

È Bastia ?

U Sporting hè un club di futbol fundatu in u 1905 da un sguizzeru è chì hà una longa storia fatta di strazii è di gloria. 52 anni di prufessiunalisimu, 34 stagione passate in prima divisione, una cuppa di Francia è una finale di cuppa d'Auropa. Una strage in u 1992, è una rinascita miraculosa.

È dopu à un tufone di 31 milioni d'€, più nunda. O guasi : a quinta divisione è e partite contr'à u Gallia Lucciana, Villefranche è Bastelicaccia.

È dumane ? Al dilà di e perfurmanze spurtive, ci hè da interrugassi nant'à a piazza ch'ellu pò avè un club cum'è Bastia in u futbol mudernu. U mondu prufessiunale hè quellu di i soldi, di u sport mundializatu, induve u ballò ùn hè micca un sport ma una marcanzia cum'è un'altra. In stu mondu quì i stadii sò senza anima, a passione è u publicu pupulare sò alluntanati. Allora chì piazza per Bastia quì nentru ?
I clubs di futbol smarriti, è quelli chì sò vultati

u 23 di Ghjenaghju 2019



1.mandatu da Antoine Toma u 25/01/2019 12:51
Bellu articulu ! Oghje u SCB pò rinasce torna. Ùn hè micca statu in uttesimu di finale di a Coppa di Francia dapoi 11 anni ! Ma avete raggiò. U futbol hà troppu cambiatu.

2.mandatu da Fabriziu Albertini u 02/02/2019 03:19
Forza Bastia

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta