Accueil
Envoyer à un ami
Version imprimable
Partager

U 27 di ferraghju di u 1967 : A Corsica batte a Francia

C'era megliu ch'è l'ottu di dicembre cum'è data per a Festa di a Nazione. Quarant'ottu anni fà, una piccula selezzione corsa si ne ghjucava à a risa a Francia di Just Fontaine.



U 27 di ferraghju di u 1967 : A Corsica batte a Francia
Una sola volta in a storia ci hè statu una partita di ballò chì hà vistu opponesi a Corsica à a Francia. Dop'à u scumpientu di u 1967, a FFF ùn hà mai più circatu à i Corsi d'organizà una rivincita.

Per quessa, ci vole à ringrazià à Just Fontaine. U cannuniere di u mundiale 1958 hè diventatu selezziunadore di l'Equipe de France. In stu principiu d'annu 1967, hà una bunissima idea : organizà partite contr'à e regione di Francia.

A Corsica hè scelta pè a prima partita. I Bleus preparanu una partita impurtante u mese prussimu, contr'à a Rumenia è Just Fontaine l'avia detta :

"J'ai choisi la sélection corse parce que leur jeu de battants s'apparente à celui des Roumains".

Hè cusì ch'ellu tuccherà à Pierre Sinibaldi di direge una squadra corsa. Dicessette ghjucadori corsi sò cunvucati. Ùn hè micca semplice, hè Just Fontaine chì decide di u sistema di ghjocu di i Corsi, chì devenu ghjucà in u listessu schema tàtticu ch'è a Rumenia.

"Mais attention ! Je veux des vrais Corses et non une sélection des meilleurs joueurs de l'île !"

U 27 di ferraghju di u 1967 : A Corsica batte a Francia
Ducumentu : corsefootball.fr

17 ghjucadori

I veri Corsi si ritrovanu dunque a vigilia di a partita in Marseglia. Dicessette ghjucadori sò ritenuti.

Cinque ghjocanu à u SEC Bastia, tandu in D2 : Orsatti, Vincenti, Cornu, Sansonetti, Gandolfi, Vescovali.
Quattru sò à l'ACA, chì finiscerà campione di Francia di D2 : Marcialis, Pietri, Peretti, Vanucci.
Dui à u GFCA, in CFA (terza divisione) : Pariggi, Alfonsi.
Dui à Bordeaux : Peri è Leonetti.
Dui à l'OGC Nizza : Marchetti è Serra.
Unu à u Stade de Paris : Rustichelli.
È unu d'Aix : Rossi.

Pierre Sinibaldi ùn hà tantu bisognu di mutivalli. Dice à i so ghjucadori :

"Nous nous connaissons à peine, mais l'essentiel est bien que le même sang coule en nous. Vous avez été choisis en raison de vos qualités légendaires qui sont le tempérament, l'ambition et l'orgueil. Je n'ai pas à vous dire ce qu'on espère de vous. Etant donné qu'il y va aussi de l'intérêt de l'équipe de France, mettez le paquet, allez-y à fond."

A squadra

U 27 di ferraghju di u 1967 : A Corsica batte a Francia
Arritti, da manca à diritta : Sinibaldi, Vincenti, Vescovali, Orsatti, Miss France (!), Rossi, Pariggi, Gandolfi, è Jacky Padovani (iè ! quellu di u cunsigliu generale !).

Inculipippuliti, da manca à diritta : Peri, Marcialis, Serra, Sansonetti, Alfonsi.

A chjiba

È i ghjucadori l'anu statu à sente. A Corsica ghjucava cusì :

Orsatti (rimpiazzatu da Marchetti, 45u) - Rossi, Pariggi, Peri, Gandolfi - Alfonsi, Vincenti - Serra, Sansonetti, Marcialis (è dopu Camadini, 45e), Vescovali.

À u segondu minutu, Serra chì ghjoca da u latu dirittu centra pè Sansonetti, chì face trimà a rete una prima volta. 1 à 0.

U segondu colpu di mazza venerà in u cinquantasettesimu minutu. Vescovali dà u ballò à Serra, chì batte u purtiere francese chì s'era troppu avanzatu. 2 à 0 !

I numerosi corsi chì eranu in e tribune ghjocanu à a risa i Bleus è cantanu "laissez-les marquer..."

Finisce cusì. I Francesi chì s'aspettavanu à una partitella simpatica, un picculu intrenamentu, sortenu vergugnosi. È Just Fontaine n'hà vistu abbastanza. L'idea di fà partite contr'à d'altre selezzione regiunale hè abbandunata.

U 27 di ferraghju di u 1967 : A Corsica batte a Francia


A maiò parte di i ghjucadori venenu dunque da u SECB è l'ACA, chì sò tandu in D2 (l'ACA cullerà in D1 à a fine di a stagione, u SECB l'annu dopu), è da u GFCA, chì ghjoca in CFA (terza divisione).

Ritratti : corsefootball.fr

U 27 di ferraghju di u 1967 : A Corsica batte a Francia

U 27 di ferraghju di u 1967 : A Corsica batte a Francia

U 27 di ferraghju di u 1967 : A Corsica batte a Francia

Ricuperazione pulitica ? Micca.

Per ciò chì serà di a recuperazione pulitica, ùn ne circate, ùn ci ne serà micca. In u 1967 a rivindicazione naziunalista principia pian pianinu. U FRC (Front Régionaliste Corse) hè statu creatu da i studienti corsi di Parigi. È l'ARC (Action Régionaliste Corse) vene di nasce. U naziunalisimu ùn esiste micca (si parla tandu di "regiunalisimu"...), ma i Corsi cummencianu à interrugassi nant'à a sorte di u so populu.

D'altronde, si sente in i prupositi di Vittoriu Sinet, giurnalistu à France Football è futuru militante di l'ARC, chì qualcosa hè in traccia di nasce... Hè dinù ellu chì hè statu à l'orìgine di e prime selezzione corse, in u 1962 è u 1963.

Ducumentu à leghje nant'à corsefootball.fr

U 27 di ferraghju di u 1967 : A Corsica batte a Francia

Allora, à quandu a rivincita ?


Articulu messu in linea u 18/01/2016

u 27 di Farraghju 2017



1.mandatu da Antoine Toma u 27/02/2015 09:57
Iè, vulimu a rivincita ! !

2.mandatu da sardu u 27/02/2015 10:36 (da un teleffuninu)
Ié, Bastia-Psg!!

3.mandatu da gengis-cane u 27/02/2015 12:47
Georges Benedetti don't approove.

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta