Poveru Pasquale Paoli

Dapoi sta settimana, Aiacciu hà a so statua di Pasquale Paoli. Scusate, di "Pascal" Paoli. Hè cusì ch'ellu hè scrittu nantu (da vede nant'à CNI).

Ma à vede tutti i castichi ch'ella hà scuntratu sta povera statua, ci hè da dumandassi s'ellu ùn ci hè micca una maledizzione. Cumu sì u spiritu di Napuliò ùn vulia sente parlà di Pasquà.

Prima ci hè stata l'inaugurazione mancata da Valls. A statua duvia esse messa in u palazzu di ghjustizia, ma l'affari ùn si sò fatti. Prublemi tennichi ci anu dettu... Veramente ? A statua era dunque SDF.

Ma ùn hè micca finita. Durante u so viaghju in Corsica, a statua hè... cascata per istrada è ci hè vulsutu à falla vultà ind'è u scultore.

Forse serà una spiegazione à u so aspettu "gobbu" ?

Dapoi a publicazione di u ritrattu, nant'à a pagina Facebook di A Piazzetta hè lanciatu u cuncorsu di a sumiglia di a statua. À chì dice Bouddha, à chì dice Mao Zedong, à chì dice Maître Yoda.

In generale, e statue nove ùn piacenu mai. Ma custì pare ch'ella face veramente l'unanimità contr'à ella. Poveru Pasquale.

È voi, chì ne pensate ?