Accueil
Envoyer à un ami
Version imprimable
Partager

SOS patrimoniu corsu in perdizione

Durante anni è anni, i Corsi anu pensatu ch'elli ùn avianu nè storia, nè patrimoniu, nè siti archeulogichi. U so passatu ùn avia nisun interessu. Ma s'elli ci sò stati prugressi, ci hè da dumandassi si a cuscenza di u patrimoniu hà veramente avanzatu. Siti abandunati, distrutti o arruvinati, si ne conta à buzeffu in Corsica. Tamanta strage !




A prima università di Corsica

Quessa pò ci piace à amintalla ! Quand'ellu si parla di l'opera di Pasquale Paoli, chì fiertà d'affirmà chì l'università di Corsica hè stata aperta in u 1765, è chjosa dop'à a battaglia di Ponte Novu. Ma quale sà induve si truvavanu i so lucali ? Ùn eranu micca à u Palazzu Naziunale (locu di putere), ma in un casale piazza Paoli, chjamatu "Casa Rossi".

Si pò vede quì :
SOS patrimoniu corsu in perdizione

Disgraziatamente, u casale hè statu lampatu in pianu in l'anni 1970, è ùn hè statu salvatu nunda. Si vede sempre nant'à e carte pustale antiche :
SOS patrimoniu corsu in perdizione

Oghje, ùn ci hè mancu una placca per mintuvà l'impurtanza storica di stu locu. È cum'è un sìmbulu, a prima università di Corsica hè diventata... un parking cù un locu pè rumenzule.
SOS patrimoniu corsu in perdizione

U cunventu d'Orezza

Altu locu di a nostra storia, stu cunventu di u XVu seculu hà vistu parechje cunsulte. A più famosa, in u 1735, dichjarava a Corsica indipendente. Arruvinatu durante a segonda guerra mundiale, più nunda ùn pò parà a so trafalata. Una petizione lanciata in u 2012 lampava un SOS. Dapoi, cuntinuveghja di sprufundassi.
Ritrattu : Wikimedia Commons / Pierre Bona
Ritrattu : Wikimedia Commons / Pierre Bona


U situ di Paddaghju

A sapete chì hè in Corsica ch'ellu si trova u situ di u Mediterraniu induv'ellu ci hè u più stàntare ? Ci n'hè più di 250. Ci vole à andà in Paddaghju (scrittu à quandu "Palaghju", à quandu "Pagliaju") vicinu di Tizzà, nant'à a cumuna di Sartè. U locu hè abandunatu cumplettu. È certi megaliti ùn si vedenu più, sò piattati sott'à i muchji è aspettanu...
Ritrattu : A Piazzetta
Ritrattu : A Piazzetta

Eccu l'entrata di a più grande infilarata di stantare di u Mediterraniu :
Ritrattu : A Piazzetta
Ritrattu : A Piazzetta

Una bella casa ghjenuvese in Furiani

Sta bella casa campagnola, testimone di a messa in valore di i duminii agriculi in piaghja si trova in bor'di strada. 500 anni di storia chì si ne falanu in ruvina...
Ritrattu : Pimento
Ritrattu : Pimento

Sin'à pocu tempu fà, era sempre arritta è bella. Hà ghjuvatu à illustrà un articulu di "Le Mémorial des Corses".
SOS patrimoniu corsu in perdizione

U cunventu di Boziu

Quessu dinù hà vistu un'episodiu di a storia corsa. In u 1757, Matra è i so partigiani anu intrappulatu à Paoli chì s'hè chjosu in u cunventu. Riesce à salvassi grazia à l'aiutu di e truppe di Cervoni di Suveria, venutu pè succorelu. Hè quì chì Matra serà tombu. Oghje i muri minaccianu è u tettu hè apertu...
Ritrattu : Via Stella
Ritrattu : Via Stella

San Tumasgiu di Pastureccia... plasticata

A cappella rumànica di San Tumasgiu di Pastureccia (cumuna di Castellu di Rustinu) hà duie particularità. Prima pè e so bellissime pitture à l'affrescu, spiegate in detagliu nant'à u blog d'Elisabeth Pardon.

L'altra particularità hè ch'ella manca una parte di a cappella, chì hè stata distrutta da... i Munumenti Storichi in l'anni 1920. Eccu ciò ch'ellu si pò leghje, sempre nant'à u listessu blog :

"A l'origine la nef unique de cette chapelle mesurait 14,30m et la porte occidentale devait être de belles proportions, si l'on en juge par les éléments de l'archivolte qui nous restent. En 1925, la charpente s'écroule et l'on appelle les Monuments Historiques au chevet de ce monument remarquable. L'architecte de l'administration des MH décide, cela parait incroyable ! non pas de reconstruire la charpente à l'identique, mais de ne préserver que la partie de la chapelle comportant un décor... Il détruit donc allègrement un tiers de l'édifice - parait-il qu'il aurait même utilisé les explosifs pour aller plus vite (mémoire orale des anciens du village), les murs se révélant trop solides pour la barre à mine !"

Quessa, hè fatta.
Ritrattu : https://sites.google.com/site/araborient99
Ritrattu : https://sites.google.com/site/araborient99

U situ prestoricu di Monte Rivincu... bumbardatu da l'armata

Vi lascemu circà a legenda di u situ di u Monte Rivincu, in l'Agriate. Pudemu ralegracci chì e bellissime stazzone (dolmen) di a Casa di l'Orcu è a Casa di l'Orca sò stati acquisti da u Cunservatoriu di u Liturale. Tantu megliu chì durante anni è anni, e stazzone anu ghjuvatu di... sibule pè l'esercizii di tiri di l'armata.
Ritrattu : http://elizabethpardon.hautetfort.com
Ritrattu : http://elizabethpardon.hautetfort.com

Avete lettu bè : i munumenti di u neuliticu ghjuvavanu di sibula pè i tiri di l'armata. Logica nò ?

Oghje hè prevista un'operazione di pulizia di u situ di Monte Rivincu.
Ritrattu : http://elizabethpardon.hautetfort.com
Ritrattu : http://elizabethpardon.hautetfort.com

Una bella casa in petra in Petranegra trasfurmata in... parking ?

In Petranegra ci hè una bella casa in petre in bor'di strada.
Ritrattu : A Piazzetta
Ritrattu : A Piazzetta

Un prugettu di a municipalità prevede di lampalla in pianu per custruisce un... parking. Eccu ciò ch'ellu dicia u giurnale di a municipalità :

Una petizione hè nata nant'à u net per circà di salvalla. Ùn ci serà veramente micca d'altre suluzione per mette e vitture ?

Per sapenne di più, ci hè a pagina Facebook Aiutu Petra Negra è a petizione in linea.

Nant'à i muri di a citatella di Bastia, sò messi... parpaings

Pensate ch'ella hà avanzatu a cuscenza di u patrimoniu ? Fidighjate à Bastia, induve u prugettu di custruzzione di u futuru liceu maritimu scambia a citatella. È nant'à e muraglie ghjenuvese di u XVu seculu, sò stati messi i... parpaings.

Bastia, "ville d'art et d'histoire". Veramente ?
Ritrattu : A Piazzetta
Ritrattu : A Piazzetta

Per infurmazione e muraglie di a citatella sò classate à i munumenti stòrichi.


A torra ghjenuvese di Vignale

In Ghisunaccia c'era una torra ghjenuvese. Era in gattivu statu (cum'è tante), è si ne falava. Invece di circà di rifalla, o omancu di lascialla in statu, hè stata cumplettamente lampata in pianu una vintina d'anni fà.

Normale. Ritrattu : http://ericamiel.free.fr/vignale.htm
SOS patrimoniu corsu in perdizione

A destruzzione di l'ottellu Ile de Beauté in Bastia

Custruitu in l'anni 1930, l'albergu "Ile de Beauté" hè una curiosità è una di e bellezze di Bastia.
SOS patrimoniu corsu in perdizione

À l'abandonu dapoi anni è anni, u so prugettu di riabilitazione, paria esse una bona nutizia. Sin'à ch'ellu sorti in a stampa u prugettu architetturale. Hè prevista a destruzzione di l'albergu cù a ricustituzione di a so facciata. Tuttu què per fà una residenza di lussu...

A pulemica si face in giru à i prezzi di l'appartamenti. Ma per l'estetica ? Nunda...

SOS patrimoniu corsu in perdizione
In Roma un dettu dice "ciò chì i Barbari ùn anu fattu, i Barberini anu riesciutu à falla". I Barberini eranu una grande famiglia rumana. U so rapresentante u più famosu era u papa Urbanu VIII, chì hà vandalizatu u Panteonu : avia fattu caccià tuttu u bronzu di u l'anticu tempiu rumanu (chì avia tenutu duiemila anni...) per utilizallu in altrò.


E stàntare chì si sguassanu

In u 2011, Corse-Matin publicava un articulu intitulatu "Les menhirs de Cauria menacés par le lichen et l'érosion ".

Ancu u situ di a CTC a dice :

"Les monuments semblent indestructibles. Pourtant, l’érosion interroge : quel legs aux générations futures ? Les reliefs disparaissent. Dépose et conservation urgentes. Lichens, racines, acidité de l’eau, ravinement, superpositions, mouvements du sol, animaux et humains exercent des dommages…"

Quessa, hè detta.
SOS patrimoniu corsu in perdizione













u 27 d'Aostu 2017



1.mandatu da Antò u 28/08/2017 08:25
U cunventu San Francescu in Bastia

2.mandatu da Antoine Toma u 14/09/2017 11:17
A ringraziavvi A Piazzetta pè ammentà tutti sti fatti storichi è aiutà à u priservamentu di u nostru patrimoniu.

Novu cumentu :