Accueil
Envoyer à un ami
Version imprimable
Partager

A Piazzetta hà dece anni !

Ùn vulemu cascà in l'autocongratulazione, ma quantunque semu appena fieri di festighjà i dece anni di A Piazzetta. Cummencia à fà assai. Allora di siguru ùn hè micca stata sempre faciule. Ci hè più ripusante ch'è di sceglie d'animà di manera regulare un situ internet è publicà un giurnale gràtisi à 100% in lingua corsa. Eppuru, dece anni dopu simu quì !



Dicembre 2007 : u lanciamentu

U blog A Piazzetta hè creatu tandu nant'à a piattaforma Webzinemaker. Si presenta tandu cum'è « un blog induv'ellu si parla di tuttu in lingua corsa, da Britney Spears à Jean-François Bernardini, da Corsica Sera à Jack Bauer... »

Bon d'accordu, ùn c'era nunda di rivuluziunariu. Santu Casanova dicia à pocu pressu listessu quand'ellu hà creatu A Tramuntana... in u 1896. Ma dece anni fà, eranu pochi i siti è i giurnali in lingua corsa chì ùn trattavanu nè di paese, nè di tradizioni, nè di puesia. È quessa ci paria assai.

U primu articulu, publicatu u 27 di dicembre di u 2007
A Piazzetta hà dece anni !

Stu novu blog pigliava a seguita d'un forum di discussione di sustenidori di u SC Bastia (Ultras Bastiacci). Si parlava appena d'attualità, appena di futbol, è si circava di fà scrive cummenti à i lettori nant'à stu spaziu. Ma l'annu 2007 vidia a crescita d'influenza di Facebook, mentre chì i forum pigliavanu a falata. Hè cusì chì u situ hè statu lanciatu, à tempu à a pagina Facebook chì hà ghjuvatu assai per fallu cunnosce.

A Piazzetta hà dece anni !

Ferraghju 2009, u giurnalettu
Un'annu dopu à u lanciamentu di u blog, nasce l'idea di fà un giurnalettu. In e grande cità, tutti i ghjorni sò centinaie à leghje i cutitiani gràtisi, cum'è Métro o 20 minutes. Tandu anu u ventu in poppa. Hè cusì, in Parigi, ch'ella hè nata l'idea. Tuccà un letturatu più grande passerà dunque pè u giurnale spachjatu di rigalu. U numeru zeru esce di ferraghju di u 2009. Hè stampatu in Corsica è Paulu Felice Colombani ne face a prima macchetta. Hè finanzatu grazia à u premiu Ghjovani in mossa, a Corsica Ferries è l'Università di Corsica.

A paruzione ùn hè micca regulare. Tutti i dui o trè mesi ? A Piazzetta esiteghja. A distribuzione ùn hè micca semplice. Ma l'affari sò lanciati.

A Piazzetta hà dece anni !

Dicembre 2009, nant'à zmartfonu
A prima appiegazione in lingua corsa, a duvemu à a sucetà DuoApps chì a ci rigala (tandu Dumenicu Siacci è Francescu Santoni). Hè a prima appiegazione in lingua corsa.
A Piazzetta hà dece anni !

Agostu 2013, u premiu Grossu Minutu
Per una volta ch'è no ricevimu un premiu. Hè a cunsecrazione pè A Piazzetta riceve in i Prelli d'Alisgiani u famosu pulendaghju. Hè sempre megliu ch'è di riceve un calciu in culu.

Dicembre 2015, A Piazzetta studiata à a scola
Articuli di A Piazzetta sò ripigliati da u Canopé di Corsica (anzianu CRDP) chì publicheghja manuali pè u cullegiu è u liceu (Isula Mondi, À via di a lingua, 50 ducumenti...).

Micca solu a magagna...
A Piazzetta era u solu media scherzosu in u 2007. Oghje ùn si contanu più i conti scherzosi nant'à e rete suciale, senza parlà di l'omi pulitichi chì ùn si privanu di praticà a magagna in e so cummunicazione. Forse, hè venuta l'ora di diversificassi ? Di prupone d'altri cuntenuti ? Cusì avemu pruvatu à fà...

Hè nata una Google Map di i chjassi (certi pocu cunnisciuti...) di Bastia, chì prova à fà scopre a cità d'un'altra manera, è à purtà un sguardu differente nant'à i quartieri di Montesoru è Lupinu.
A Piazzetta hà dece anni !

Grazia à Francescu Diani, à l'estate 2014 nasce l'idea d'un prugettu intornu à l'affissi pulitichi di l'anni 1970 è 1980. L'Associu Lingua Scritta porta u prugettu. Una squadra si custituisce in giru à Andria Fazi. Nasce cusì Guarda Fratellu.
A Piazzetta hà dece anni !

U libru hè editatu ind'è Albiana.
A Piazzetta hà dece anni !

È oghje allora ?
Cunnessioni ci n'hè più di 45.000 à mese.
Ghjunghjemu à più d'un milione di pagine viste à l'annu.
Cun 33 numeri stampati à 14.000 esemplarii, facenu 462.000 esemplarii di A Piazzetta chì sò stati spachjati.
Prufittemune pè ringrazià i nostri 250 abunnati fidi chì ci sustenenu (paganu quantunque pè riceve un giurnale gràtisi...). À tutti, mille volte grazie !
È site più di 23.000 fans nant'à Facebook, più di 13.000 à seguitacci nant'à Twitter, più di 4.000 nant'à Instagram...

Pè i dece anni avemu preparatu un numeru doppiu.
A Piazzetta hà dece anni !

Ma dumane ?
Sì A Piazzetta hè sempre ghjudicata utile, s'ella piace, s'elli ci sò sempre lettori è sustegni, l'aventura cuntinuverà. O micca ?
A Piazzetta hà dece anni !

u 19 di Dicembre 2017
PPC



1.mandatu da batistu u 22/12/2017 15:17
Grazie per sti dece anni, vi pregu longa vita almenu per 100 anni.
Forza A PIAZZETTA

2.mandatu da Ghjuvà u 24/12/2017 19:13
Vi auguru un felice anniversariu, longa vita per A Piazzetta

3.mandatu da Ghjacumu 49 u 29/12/2017 19:34
Bona sera, tant’auguri di felicita per i 10 ani diA Piazzeta e longa vita

4.mandatu da Ghjunghjiticcia u 06/01/2018 08:22
Mi n'invengu sempri di u ghjornu ch'aghju dittu à u prufessori di corsu chì A Piazzetta era a ma bibbia. Vi dicu anch'eiu: Longa vita à A Piazzetta.

5.mandatu da saetta u 10/01/2018 19:19
Paci e saluta à tutti e spergu chi no fisteremmu i vint’anni cuntinuati cusì👍👍👍.

Novu cumentu :