Finale Bastia - PSG : 48 ore in Parigi

Gare de Lyon, 1 ora di u dopu meziornu. Ghjunghjenu per treni i Bastiacci chì anu pigliatu u battellu. D'altri turchini sò quì per aspettalli, ma sò menu simpàtichi quessi.

Champs Elysées, 2 ore : Si sentenu i primi mughji è si vedenu e prime bandere corse. Schjattanu i primu fòrgani. Un gruppu di turisti giappunesi corre per piglià u metrò, sbiancati.

Ile de la Cité, 2 ore : Passagiu obligatoriu nant'à u Quai de la Corse.

Rue de Rivoli, 4 ore : E loghje di a via cummerciante parigina ribombanu di u « Quandu seremu... » è d'altri canti nant'à l'aria di a musica d'Intervilles.

Versu Bastille, 5 ore : Certi attaccanu l'apperitivu. Ma quì ùn semu micca in i caffè di Corti è u patrone ùn mette mai a soia.

Place des Vosges, 5 ore, Street fighter 1 : Ci hè un musicante chì sona cù una arpa in carrughju. Quand'elli passanu i bastiacci, si mette à fà e prime note di a Marseillaise. « C'est bon je m'excuse, ne me faîtes pas mal, ça coûte cher une harpe ».

Champs Elysées, 6 ore : S'hè vistu à Yves Calvi vicinu da i studios d'Europe 1. Parte un « o Yves Calvitie ! » . Bon.

Notre Dame, 7 ore : Bella panicca in cità. Certi sustenidori corsi si volenu mette à u Vélib'. I pulizzeri parenu appena stressati. Purtantu l'ambianza hè bona è ognunu hà u surrisu.

Quartieru Latinu, 9 ore : I turisti americani piglianu ritratti di i turisti corsi chì si pigliavanu in ritrattu cù a bandera corsa appiccicata à u comptoir.

Bastille, 10 ore : Dop'à cinqu'ore d'apperitivu, un bar rue de Lappe hè custrettu di passà 18 volte à fila « Sò Elli ». I cunsummatori chì si lagnanu sò messi fora da u patrone.

Saint-Germain-des-Prés, 10 ore : Nasce un « Ici c'est Pôôôris ! » vicinu di un pub pienu di Bastiacci. Li rispondenu vechji mughji antichi è schjatta un grossu fòrganu. Ùn si senteranu più i parigini di a serata.

Saint-Michel, 11 ore : Trè vechji cù e so barette turchine stanu impalaficcati à fidighjà un gruppu chì balla u smurf nant'à a piazza. Riazzione d'un prupianincu "cheta cheta ! Quissi sò tonti da ligà !"

Saint-Michel, mezanotte : Un omu mette un calciu à un taxi chì ùn hà micca vulsutu pigliallu. Nascenu i pattoni. In fatti, a vittura ùn era micca un taxi.

2 ore di mane : Ci sò quelli chì sceglienu e serate corse organizate in parechji lochi di a capitale è quelli chì vanu à chjinassi chì a ghjurnata serà longa.

Champs Elysées, 4 ore di mane : Si vede un elettu lancià un "uniti" in una buatta. Micca nomi.

Orly, Roissy, Gare de Lyon... : Dapoi l'alba, sò centinaie è centinaie di Corsi chì sbarcanu cun sciarpe, bandere è mughji. A spressione chì i media ripetenu tutta a ghjurnata hè "un véritable pont aérien entre la Corse et le continent".

Ne parla dinù La Gazzetta dello Sport :

Beaubourg, meziornu, Street Fighter 2 : Un « mime de rue » hè scuzzulatu da una squadra di u Valincu o di u Taravu, ùn si sà micca veramente.

St Michel, 1 ora : Un turistu alemanu mustacciutu chì pare appena Thiriez hè trattatu di « gaulois » da un gruppu di giovani.

Les Halles, 1 ora : Appuntamentu di i sustenidori Place Joachim Du Bellay. Parechje attività sò previste : mughji, canti, bandere, fumìgeni, apperitivu. Parte una prucessiò è un « Avè Bastia ».

2 ore : Sbarcanu i CRS chì purtantu ùn eranu micca invitati. Facenu a distribuzione di lacrimògeni. Un cummerciante di bombò hà a so ora di gloria nant'à BFL è iTélé : « j'ai cru que j'allais mourir ».

Iè, ma era spaventatu da i CRS, micca da i Bastiacci.

N'avemu parlatu eri : Corsi in Parigi : "No go zone" on tour

È oghje, ne parla u situ Arrêt sur image : Supporters de Bastia contre CRS : le marchand de bonbons et la fumée .

Notre-Dame, 2 ore : Scambiu d'amabilità trà un tippu in survêt di u PSG è unu cù una maglia « Nouvelles Frontières » di Jurietti. À « terroriste », « paysan » è « va garder tes chèvres le Corse » risponde una seria di « collabò », « retourne dans ton immeuble » è « tu es un esclave des qataris ». Hè firmatu surpresu da st'ultima pruposta.

3 ore, stazione di Saint-Michel è di Châtelet-Les Halles : u turchinu hè magiuritariu. I Bastiacci piglianu à bon'ora a direzzione di Saint-Denis. I Parigini chì collanu in u RER facenu u musu.

4 ore, Saint-Denis : E rame di u RER arreganu decine è decine d'accaniti in u San Diunisu. U sole è u caldu di a vigilia anu lasciatu a piazza à un tempacciu grisgiu è fretu, appena cum'è quellu di a finale di u 2002. Glups.

5 ore, Saint-Denis : Per avà ùn si vedenu ch'è i turchini. Appuntamentu di i 1905.

Elli dinù sò quì.

5 ore è mezu : Piccula cazzuttata trà anziani di Boulogne è d'Auteuil.

I Bastiacci entranu in u Stade de France. Nisun incidente da signalà.

6 ore : Unepochi di chjocchi pilati venenu à cantà « Français vous êtes, Français vous resterez » davant'à l'entrate di e tribune bastiacce. Si feranu lampà fora da i CRS.

I stessi CRS chì caricheghjanu i Corsi, ùn si sà veramente perchè.

S'empie pianu pianu u settore bastiacciu. In u nostru bloc, una stadiera chì vole fà pusà i spettatori spazienteghja : « vous n'avez pas le droit de rester dans les escaliers, vous avez une place, allez vous asseoir ». A cummedia dura una mezora. Tuttu u mondu hè arrittu, a stadiera hè smarrita.

Per quelli chì anu a sete, ci sò « Les désoiffeurs ». Trà « l'homme orchestre » è « l'homme-sandwich ». I corci, quantunque.

Cummencia u prugramma infernale di a cerimonia di a LFP : battaglia di DJ, battaglia di « décibels », « match gag », cuncorsu di tiri nant'à u terrenu, musica à tappu, curegrafia goffa.

Ùn manca più ch'è Guy Lux, u Père Fouras è Lorie.

Ancu France Football a dice : "Des danseurs contemporains, des chorégraphies douteuses, de pauvres décors… Les spectateurs sont forcés de subir une cérémonie d’avant-match creuse et insipide. Franchement, du fond du cœur, il faut vraiment cesser cela. Ça n’intéresse personne. La tension du stade mêlée aux chants des virages suffit à planter le décor de la rencontre."

Di siguru, hè a strategia di a LFP per impedisce l'ambianza di cullà è i canti di piglià a suprana. A morte di u futbol pupulare...

Ci seranu quantunque qualchì bon mumentu, cum'è quellu induve sò passati i canti corsi.

Bon d'accordu, era durante a "battaglia di DJ", à mezu à i mughji di u speaker ("faites du bruit Bastia !"). Orrìbile.

È in faccia ? Pochi affari. Dapoi u pianu Le Proux chì hà messu fora di u Parc i gruppi ultras, ùn ci hè più ambianza è animazione. A disneylandizazione di e tribune. Chì tristezza per quelli chì anu cunnisciutu l'ambianza di nanzu.

A scrive Le Parisien : "Si une finale devait se gagner aux bruits de ses supporteurs, alors Bastia aurait un des palmarès les plus fournis de France. Hier, le peuple corse a dominé Paris dans le match très anecdotique des tribunes."

9 ore si sera : Principia a partita. Và bè, a sapemu ch'elli sò più forti. Semu cullati per fà sente a nostra voce, per mustrà ch'è no semu sempre quì. Hè quessa a nostra vittoria.

Ci serà a storia di u protocolu. Per paura di passà à a risa, Thiriez ùn fala à salutà i ghjucadori. Scandalu. Numerosi sò i giurnalisti è cummentadori à falle falà cutrate nant'à u presidente di a LFP.

Thiriez si ridiculizeghja davanti à a Francia sana.

9 ore è 19 : L'àrbitru fischja penalty è espulsa à Squillaci. Fine di a partita.

11 ore di sera : Un tippu in loges cerca d'arrubà un striscione bastiacciu. Si riceve unepochi di colpi da e parti di e tribune d'insù è d'inghjò è scappa à piattassi.

Per dicci à vedeci, i Parigi cantanu duie volte a Marseillaise. In risposta nasce un « on est pas français » (cantu chì vene d'esse inventatu).

Nisun incidente durante a surtita di i 30.000 Corsi, cume l'aspettavanu certi.