Accueil
Envoyer à un ami
Version imprimable
Partager

Ghjunghje a Squadra Corsa... è Kostadinov

Marti u 31 di maghju a Squadra Corsa hè di ritornu. Pè a prima volta di a so storia, ghjoca contr'à un grande paese auropeanu, 46esimu mundiale : a Bulgaria. In più di quessa, ci serà un certu Emil Kostadinov, unu di i più grandi ghjucadori corsi di tutti i tempi.



Ghjunghje a Squadra Corsa... è Kostadinov
Prima, ci hè a squadra corsa. U gruppu hè statu publicatu nant'à u situ officiale è a selezzione di Ludovic Giuly face digià assai parlà.

Dopu, ci hè a Bulgaria, primu paese in u top 50 mundiale di a FIFA hà ghjucà contr'à a Corsica. Avà, saperemu s'è no avemu u livellu pè ghjucà l'eliminatorii di l'Euro.

Ci hè dinù Lothar Matthäus, selezziunadore di a Bulgaria, capitanu di a Mannschaft campione di u mondu in u 1990, anzianu ballone d'oru è ex-legenda mundiale chì hà ghjucatu sin'à 40 anni (!) per u so paese.

Ma sopr'à tuttu, ci serà un certu Emil Kostadinov. A legenda d'Emil Kostadinov cummencia u 17 nuvembre 1993 in Parigi. A Francia riceve a Bulgaria à u Parcu di i Principi pè l'ultima ghjurnata di i qualificativi di a World Cup 94. Facenu ottu anni chì i Francesi ùn si sò più qualificati pè u mundiale. A generazione di Papin, Ginola è Cantona intrenata da Gérard Houiller ci crede forte : basta d'un puntu, un picculu match nul è i Francesi vanu in America. A Bulgaria ùn hè micca male non più. Ci sò Stoitchkov, Penev, Letchkov o ancuTrifon Ivanov.

A partita hè goffa, si sente chì i Bleus sò impauriti. U macciu nanzu, avia persu contr'à Israël in l'ultime segonde. Cantona signa una prima rete. 1 à 0 pè a Francia, a qualificazione hè acquistata è Thierry Roland face u maccu in diretta : "Cette fois, c'est in ze pocket mon p'tit Jean-Mimi. Vous avez réservé quel hôtel à Los Angeles ?". Durante a pausa, Michel Platini sustene chì a Francia anderà in finale di a cuppa di u mondu.

Ma nant'à a strada di Bernard Lama è d'Alain Roche, ci hè un certu Emil. Una prima rete nanz'à a pausa rimette e squadre à parità. A Francia hè sempre qualificata ma Thierry Roland face menu u fieru.

I minuti passanu è i Francesi ùn ci la facenu à mette una segonda rete salvatrice. Semu vicini da a fine. U Parc cummencia à cantà... Fermanu 20 segonde quandu ci hè un coup-franc in forma di corner pè a Francia in u campu bulgaru. Hè finita, ùn si vede micca cumu ponu mancà a qualificazione. Ma Ginola face n'importa chè è dà u ballò à i Bulgari (hè u famosu "exocet", dixit Gérard Houiller...). A ricuperazione hè rapida, i francesi sò insischiti.

Fermanu mancu dece segonde. Penev lampa u ballò in furia in davanti è hè Emil chì u chjappa. Emmanuel Petit u fideghja passà. Alain Roche pare un vechju di a CNRO, Laurent Blanc ùn serve à nunda è circhemu sempre à Desailly. Kostadinov manda l'assaltu è s'inficca trà i difensori bleus. Hà fattu soia a frasa di Muhamed Ali : vulà cum'è a farfalla è pugne cum'è a vespa.

U cronòmetru di TF1 affissa 44:58 quandu Kostadinov prepara u so missile. À 44:59 Bernard Lama hè in terra è ùn hà vistu nunda. À 45:00 a Francia sana si piglia una piulata in capu. Segondu but di Kostadinov è eliminazione di a Francia.

Tuttu ciò chì Thierry Roland trova à dì hè "Ololololololololo...". Nisun francese ùn ghjucherà a prussima cuppa di u mondui. Christian Jeanpierre pienghje è Roger Zabel hà messu un calciu in un pannellu publicitariu di Cacolac. U futbol francese hè un campu di ruvine. À duie segonde di a fine, a Francia era sempre qualificata.

Hè cusì grossu chì nimu ci crede : Top Foot avia digià esciutu u so nùmeru cù a parolla "Qualifiés !" in cuprendula. Stu giurnale ùn surterà mai più.

Emil Kostadinov ùn hè micca un geniu, hè u diu.

Corsica - Bulgaria
Marti u 31 di maghju in Timizzolu, à 8 ore è mezu di sera.
Piazze : 5 è 10 €

Ghjunghje a Squadra Corsa... è Kostadinov

Ghjunghje a Squadra Corsa... è Kostadinov

Ghjunghje a Squadra Corsa... è Kostadinov


u 26 di Maghju 2011
U Sgaiuffu



1.mandatu da KÜG u 26/05/2011 10:11
Mi si pare chi u giurnale "Libé" avessi titulatu u lindumane: "La France qualifiée pour la coupe du monde 98"

2.mandatu da Ghjuvan'Marcu u 26/05/2011 11:13
Issu ghjornu aghju saltatu cum'è un cabrettu briacu. "Pan dans l'Emil" Chi bellu pezzu di storia, ancu megliu chi l'affare di u mundiale 2010.

3.mandatu da ginola u 26/05/2011 11:43
Tutt'in Timizzolu per festighja u nostru diu !

4.mandatu da ANTO u 26/05/2011 13:14
Kostadinoff hè una casata véramente corsa ,forse niulinca o alisgianinca ?

5.mandatu da Tux u 26/05/2011 17:40
@Anto : mi ne futtu di u nome. Pasqua è una casata corsa. Piè corsu chè Rocca Serra hè sficile à trovà. È ùn parlu mancu di Patrick Fiori…

A sapete s'ellu ci sara una nova edizione di a Corsica Football Cup?

6.mandatu da o scrianzat'malalevat' u 26/05/2011 21:42
da qui à pocu anderemu ancu à fàlli i cannelloni à Kostadinov, s'ella vi garba.
sè tandu a Francia hà persu, li stà bè, mà 'ssu connu si po stà in paese soiu.

7.mandatu da Grossu panzutu u 27/05/2011 11:16
Kostadinof Gloria a te!!!

Novu cumentu :