Accueil
Envoyer à un ami
Version imprimable
Partager

S’hè spenta a voce di Petru Mari

Era una voce indimenticabile, una voce chì ci hà accumpagnatu dapoi anni è anni. Ci pare ch’è no l’appiamu sempre intesa, è cridiamu di sentela sempre. Petru Mari avia 71 anni.



S’hè spenta a voce di Petru Mari

Petru Mari era arradicatu à a so terra è à u so paese di Ficaghja. In u 1979, avia creatu cù una squadra di castagnicciaghji u giurnale “A Fiaccula di a Castagniccia”.

Era in i tempi quandu si sunniava sempre d’una rinascita di i nostri paesi.
S’hè spenta a voce di Petru Mari

V’arricurdate di u so testu (scrittu cun Paulufelice Nasica) A Passione di e castagne ?

À RCFM a so voce cusì particulare ci hà accumpagnatu in tante emissione, da i nutiziali à A Ghjustra Paisana.

Ma Petru Mari ci hà insignatu chì esse arradicatu à a so terra ùn impedia micca d’esse apertu nant’à u mondu.

In u 1986 publicheghja Scritti d’altrò (edizione Scola Corsa), una traduzzione di testi d’Italo Calvino, Woody Allen è John Steinbeck (ùn vi pare nunda ?) in lingua corsa.

Petru Mari hè quellu chì hà vulsutu apre e fruntiere di a radiu cù l’emissione Kantara è Mediterradio.

Eppò c’era u Petru Mari spiritosu. Quellu chì sapia manighjà a magagna è e parolle cum’è nimu. In u 1990 participeghja à u cuncorsu di nuvelle Rise da impennà (La Marge). In u 1995 ghjunghjerà Diodoru di Sicilia, e stonde d’un osservadore (A Messagera). Ci arricurdemu di l’emissioni I Scrianzati è l’oroscopu.

Eppo ci serà Masai, a so famosa cronaca cutitiana nant'à RCFM induv’ellu purterà u scherzu à un altissimu livellu. Serà publicata una racolta (Masai, Albiana 2009).



Noi, eramu fans dapoi u principiu, è hè inutile di dì chì l'opera di Petru Mari hè stata impurtante pè A Piazzetta.

Ma sta duminicata Petru Mari ci hà fattu un’ultima magagna, allora ch’ellu li firmava tantu à fà. Oramai a so voce, u so scherzu, u so spiritu ci mancheranu tantu.

u 22 d'Utrovi 2018
U Webmaestru


Novu cumentu :