Eccu u merchandising puliticu

Dapoi una settimana, eccu i t-shirts chì si ponu truvà in i cummerci bastiacci è aiaccini.

Esiste a cuppa "slim" è ancu a versione per donne. Nantu, si ponu leghje slogans cum'è "I LOVE U FRONTE" o "I LOVE PADDUC", 'Pride of PRG" o ancu "Jean-Claude Guazzelli is fun" è "Jérôme Polverini is sexy".

Spiega u capi d'impresa ch'ellu conta bè prufittà di a frenesia di l'annata eletturale à vene : "ùn semu ancu ch'è à principiu, ma si cummencia forte ! I Giacubbisti sò mutivati cum'è mai, hè bon segnu !"

Allora, qualessi sò i t-shirts chì anu u più successu ? "Per avà si vendenu bè i clàssichi : i love zuccarelli, Ange Santini is god, Nicolas Alfonsi is goff' è IN THE CLAN WE TRUST. Ma dinù quelli di i duri è quelli di i mous. Ci sò assai donne chì mi dumandanu u t-shirt di Gilles Simeoni. In quant'à i t-shirts bunapartisti, sò i turisti chì i mi compranu."

È quelli chì si vendenu u menu ? "Pensu ch'ùn feraghju più t-shirts cun Antoine Sindali, hè un veru fiascu ùn ne vendu manc'unu ! Ùn mi parlate di Pierre Chaubon non più..."

I prugetti ? "Aghju assai clienti chì mi dumandanu s'elli anu t-shirts anti-Jean-Christophe Angelini, ùn capiscu micca perchè ma pensu ch'o m'aghju da lancià in stu business !"

A campagna ùn face ch'è principià...