Accueil
Envoyer à un ami
Version imprimable
Partager

10 ragioni d'ùn andà micca à u derby

Dapoi una settimana a Corsica hè tocca da una maledizzione nova. U disimpiegu ? L'acculturazione ? A droga ? U grande banditisimu ? Nò, a psicosa di u derby.



10 ragioni d'ùn andà micca à u derby
1. Hà da esse a guerra. Quist'annu a curiosità di u derby ACA - Sporting ùn serà nè Adrian Mutu nè e zappate di Novaes, ma a viulenza. D'altronde, l'organizazione calamitosa di sta partita hè un cumplottu di Frédéric Thiriez, di u prefettu è Pierre Ménès pè ridiculizà i clubs corsi.

2. I Bastiacci anu da invadisce à Aiacciu è sò gattivi. Solu 850 piazze eranu previste pè i Bastiacci, chì furiosi si sò lampati cum'è famiti nant'à i biglietti in vendita. Si sà chì i sustenidori di u Sporting anu un cromosomu di a viulenza è ch'elli sò antropofàgichi. Da leghje : " Nous allons descendre à Ajaccio, encourager notre équipe et nous serons 3 000 ! "

3. L'Aiaccini dinù ùn sò micca bravi. Annerbati da i Bastiacci chì volenu invadisce a so cità pè terrurizalli, i sustenidori rossi è bianchi si sò messi in postu à partesi da Bucugnà cù e so mitragliose. L'Orsi Ribelli anu fattu anch'elli u so cummunicatu per dì ch'elli eranu pronti à riceve i turchini.

4. Ci vole à lampà un "appel au calme". Alain Orsoni ùn averà micca u so Nobel di a pace quist'annu malgradu u so "appel au calme". Corsica Libera hà fattu u soiu. Dominique Bucchini vene di lampà a so chjama.

Pè a prima volta in a storia di a Corsica, avemu ancu una doppia chjama di prefetti !!! Da leghje nant'à CNI : L'appel des deux préfets

Quale serà u prussimu ? André Paccou ? Gilbert Thiel ? Jean-Luc Reichmann ? Félix Baumgartner ? Hannibal Lecter ? Una partita di ballò chì ùn hè ancu stata ghjucata face nasce di più riazzaioni chè u trippiu assassiniu di Castirla. Tuttu và bè.

5. U Sporting hà da perde. Ma quessa, a sapemu digià.

6. Ùn ci hè più piazze. Hè più faciule d'avè una piazza à u Cunsigliu Generale chè dì buscà una piazza pè assiste à u derby.

7. Serà dunque un mischju di Mad Max, Armageddon, La Guerre du feu, Voyage au bout de l'Enfer è Terminator. D'appressu à ciò ch'ellu si pò leghje è sente, quelli chì camperanu dopu à sta sperienza seranu veramente forti. I will surive, o nò ?

8. Ciò chì si passa in e tribune hè u spechju di a sucetà. È a sucetà corsa stà male. Ùn a sapiate micca ? È mancu u puverettu di Pasquale Paoli ùn avia riesciutu à fà l'unione, allora...

9. U futbol ùn hè micca una festa. Si e cumpetizione spurtive era state inventate per avvicinà i populi è prumove a tullerenza è a fratellanza, a saperiamu. Ma ùn hè mai statu u casu. Cunniscite un derby in u mondu induve ùn ci sia rivalità ? Ùn semu nè megliu, nè peghju chè l'altri... simpliciamente.

10. Emile Zuccarelli hà digià appruntatu u so cummunicatu di cundannazione. Cummincerà pè "je condamne avec la plus grande fermeté..." I pienghjuloni fatalisti elli s'approntanu à pienghje "on s'en sortira jamais, Corsica ùn averà mai bè".

Bon, è sì stu derby si passava bè ? Appena di magagna trà i partigiani di e duie squadre, appena d'ingagiamentu nant'à u terrenu... è nunda di più. Ne femu a scumessa ?

u 16 d'Utrovi 2012



1.mandatu da Altu-Taravu u 16/10/2012 08:51
Torna un'altra frasa sta mane "L'union fait la Corse"..... "UNIONE"!? Parlemu bè di un match di football? È di più d'unu derby? Andate parlà à Bastia1905 "d'unione" cù l'orsi ribellu!

2.mandatu da Ulongu u 16/10/2012 10:18
Un macciu di ballò serà forse una di e più grosse cuncentrazione di baulli in Corsica è in altrò ( ind'è noi hè peghju chè u Festiventu o un meeting di l'UMP).
Quand'ellu hè un derby duppiemu a misa.
Doppia ragiò d'ùn andacci micca.

3.mandatu da ghjuva u 16/10/2012 11:00
ie altu-taravu ai raigio certe parlanu d'unione;.... per u ballo!!!! o figliolu chi affarone....e tantu peghju per u restu: populu chi smaricce incu a so cultura a so lingua, impussibilita de cumpra una casuccia inde u so paese, ghjente chi sbarcanu ogni ghjorni....a e vera dopu simu rasisti???? INFINE he vera chi ghje pui impurtante u foot..corci a noi

4.mandatu da amedzumare u 16/10/2012 13:36
11. Tiranu ancu in Aiacciu!!! attenti.

5.mandatu da festistronzi u 16/10/2012 15:46
Un ci hè chi "Zorro" o "batman" pà salva a Corsica (O Corsica Libera)

6.mandatu da stumacatu u 16/10/2012 16:16
"Bon, è sì stu derby si passava bè ?"

Peccatu !!

7.mandatu da stumacatu u 16/10/2012 16:27
Stu derby, troppu mediatisatu, hè una trappula !!

E cume semu tutti asini hà da fà u so effettu...

In tantu, u megliu un saria che Aiacciu vinci sta partita e Bastia a prossima ?!!

Mà, no, semu troppu altieri per esse cerbellatti...

8.mandatu da ANTO u 16/10/2012 19:01
Cio chi mi stona hè ch'una parola nova un sia stata truvata pè "derby" .Di u ballo mi ne impippu sempre listessu derby or not derby .

9.mandatu da Altu-Taravu u 16/10/2012 23:51
E iè, u Sporting hè veramente u Sporting Club di a Corsica parchì ancu i sustenitori di u fondu di l'Altu-Taravu anderanu in tribuna "visteurs"!

10.mandatu da Dume u 17/10/2012 21:37
Forza aiacciu !

11.mandatu da Uniti vinceremu u 17/10/2012 22:30
Eiu mi n impippu perche u sporting ha da vince!!!! Bastia e basta!!

12.mandatu da Linguatorta u 18/10/2012 09:49
Sarebbe ora di pisà appena e cuscenze avà chì i zitelli cum'è più grandi tornanu in i stadi, di grazia ùn li stumachemu micca o ùn li demu micca gattivi esempii. Femu ci piacè demu l'esempiu. Un derbì in L1 hè digià una vittoria

13.mandatu da stumacatu u 18/10/2012 13:37
Per una Linguatorta, parletti bè !!

14.mandatu da stumacatu u 18/10/2012 13:40
Aio o Dumè : " Ajatch"...

Eju sogu di Porto-Vek.

E vo ?

15.mandatu da festistronzi u 19/10/2012 08:12
eiu so di Bachtia o Stumacatu

16.mandatu da Linguazoppa u 19/10/2012 12:08
Bravu o linguitò ! Femu capisce à a nostra giuventù ch'ella ci hè un'antra strada chè quella di u partitu è di u contrapartitu. A cuscenza hè una....

17.mandatu da stumacatu u 19/10/2012 14:34
Fortza Bachtia !!

18.mandatu da Fullettu u 21/10/2012 10:36 (da un teleffuninu)
Hè capita chi s 'hà da passà bè u nostru derby cum'è sempre! Avà ch elli a fessinu finita chì n 'avemu abbastanza di tutte isse chjachjare chì mettenu a pressione à a ghjente ! Forza Corsica!!

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta