Accueil
Envoyer à un ami
Version imprimable
Partager

L'intrenori di u Sporting chì sò stati messi fora

Quandu una squadra ùn hà micca risultati, hè l'intrenore ch'ellu si mette fora, micca i ghjucadori. In a storia di u Sporting, certe volte hà permessu d'avè risultati. È certe volte, nò...



Poveri Makelele è Tholot. Ghjunti in Bastia pieni di sperenza, ùn ci l'averanu fatta. Per passà dop'à Hantz, i dirigenti anu fattu una scumessa, a più luntana di a persunalità di l'anzianu intrenore duie volte campione. Ma Makelele ùn hà mai veramente datu l'impressione ch'ellu era in Bastia.

Aspettendu u nome di quellu chì piglierà a seguita (nant'à e rete suciale hè Antonetti ch'ellu si dumanda...), eccu e storie di l'intrenori chì sò stati messi fora in piena stagione dapoi trenta anni, da Redin à Anziani, passendu pè Lavagne, è Kasperczak.

Certe volte u famosu "choc psychologique" hà viaghjatu. Ma micca sempre...
L'intrenori di u Sporting chì sò stati messi fora

Antoine Redin rimpiazzatu da Alain Moizan, settembre 85

L'intrenori di u Sporting chì sò stati messi fora
Quandu principia a stagione 1985/86, l'epupea in cuppa UEFA è a vittoria in cuppa di Francia sò digià luntanu. À a fine di st'annu infernale u SECB turnerà à truvà a segonda divisione.

À u club ci hè una panicca nera : e casce sò viote, u presidente Vendasi hà demissiunatu, è Furiani hè suspesu per e so trè prime partite. Pè u so primu macciu u Sporting riceve u PSG à... Reims, à un'ora è mezu da Parigi. Hè un scumpientu : disfatta 4 à 2. Pè a segonda ghjurnata i turchini si piglianu una chjiba in Lens (6-0). Dop'à quattru ghjurnate, Bastia conta zeru puntu. Serà difficiule di rimettesine.

Di settembre, dop'à ondeci ghjurnate, hè Alain Moizan chì diventa "intrenore ghjucadore" è chì rimpiazza u poveru Redin. Ma i strazii ùn sò finiti per Bastia...

Alain Moizan rimpiazzatu da... Antoine Redin, ferraghju 86

In un primu tempu Alain Moizan riesce à sorte u Sporting da l'ultime piazze, dop'à un principiu calamitosu. Ma sta stagione serà un viacruci per Bastia.

U club hè sbaiuccatu è durante parechji mesi i ghjucadori micca pagati. Allora toccu l'inguernu, ci vole à vende. Mlynarczyk (purtieru internaziunale pulunese) si ne và à u FC Porto. Lacuesta parte à Monaco è Solsona à u RC Paris. Soler, Squaglia è Cubaynes si ne vanu dinù.

Senza i so più boni ghjucatori, u SECB ùn si ne pò micca sorte. I dirigenti ùn si vedenu più. Dice Moizan : "nous ne voyons plus personne, j'ai l'impression que les dirigeants se cachent". Ùn si sà mancu sì Bastia puderà finisce l'annata. Si parla di liquidazione ghjudizaria. Scrive Victor Sinet : "un homme dans cette histoire, semble tout de même porter une part de responsabilité plus forte que les autres (...) M. François Vendasi." Ambianza...

In fine di contu, Alain Moizan abanduneghja, è hè... Antoine Redin, messu fora di settembre, chì volta di ferraghju. Bastia finiscerà ultimu di a classifica cun 20 punti, è 5 piccule vittorie. Unu di i peghji bilanci di tutti i tempi.

È cum'ellu a dice Redin : "le problème avec la D2, c'est qu'on sait quand on descend, mais on sait pas quand on remonte..." Per noi, ci vulerà à aspettà ott'anni.
Mlynarczyk, Moizan, Meyer in l'anni 80, è digià a passione corsa di u bettone.
Mlynarczyk, Moizan, Meyer in l'anni 80, è digià a passione corsa di u bettone.

Léonce Lavagne rimpiazzatu da Frédéric Antonetti ottobre 1994

U futbol hè veramente inghjustu. Di maghju, Léonce Lavagne era l'ìdule, u leone chì hà fattu vultà u SCB in prima divisione senza mezi cù una squadra chì nimu aspettava. Cinque mesi dopu, tuttu Furiani dumandava a demissione di u poveru Léonce è di u so aghjuntu, u so figliolu Denis...

U principiu ùn era micca catastroficu purtantu (vittorie à Metz è à Nizza). Ma sì u Sporting piglia i punti fora, in Furiani ùn si passa nunda. A squadra hè assai defensiva, e partite d'un annoiu à crepà, a difesa debbule, l'attaccu ùn attacca nunda.

Dop'à una concia à Martigues (5-2) è in casa contr'à Rennes (2-1), u publicu dumanda a demissione di i Lavagne, cuntestati ancu da i ghjucadori. I dirigenti chjamanu un tippu chì nimu cunnosce è chì intrena a riserva, un certu Antonetti. Ellu insiste : "je ne suis pas l'homme de la situation, ce n'est qu'un intérim".

A seguita si passa bè. Pè u so primu macciu vince 2 à 1 à Saint-Etienne (Camadini, Drobnjak). Ci seranu qualchì partita difficiule, ma prestu Antonetti ci la face à scuzzulà u publicu (hè u famosu Bastia - Monaco di 94), è i ghjucadori tornanu à battesi.

Bilanciu : u Sporting si mantene, u spetàculu hè vultatu nant'à u terrenu, è Bastia s'alza ancu in finale di a cuppa di a Lega (macciu arrubbatu contr'à u PSG, una volta di più).
L'intrenori di u Sporting chì sò stati messi fora


Henryk Kasperczak rimpiazzatu da Laurent Fournier, ottobre 98

Micca faciule di vene dop'à Antonetti chì avia purtatu u SCB in cuppa UEFA. A scelta si porta nant'à u pulunese Kasperczak, chì hà intrenatu a squadra naziunale di Tunisia à a cuppa di u mondu 98.

Kasper vene cù u brasilio-tunisianu José Clayton, u numeru dece è cumpatriottu soiu Mariusz Piekarski chì ghjucava à u Brasile cù Romario, un argentinu Andres Grande (chì ùn ghjucherà mai) è u cannuniere internaziunale purtughese Paulo Alves.

Tandu, tutta Bastia si vede ghjucà a Champion's League in fine di stagione. Ma invece, nò. Nant'à u terrenu hè l'angoscia. Furiani s'annoia, i ghjucadori acquisti ùn avanzanu micca, ùn si battenu micca. Dop'à un novu macciacciu (disfatta in Toulouse 2 à 1, nuvesima ghjurnata), Henryk hè messu fora.

Hè l'anzianu ghjucadore di l'OM è di u PSG, Laurent Fournier, chì piglia a seguita.
L'intrenori di u Sporting chì sò stati messi fora

Laurent Fournier rimpiazzatu da José Pasqualetti, aprile 99

Quand'ellu piglia a squadra, Laurent Fournier a dice, a so ambizione hè di finisce aurupeanu. Ma sì i primi risultati sò boni, u Sporting si sprufonda dop'à a treva inguernale.

Da dicembre à aprile, ci hè una bella seria di nove partite senza vittoria (quattru partite pare, cinque disfatte). A venuta di Krupnikovic di ghjennaghju ùn ci face nunda.

In fine di stagione, José Pasqualetti piglia a piazza di Fournier nant'à u bancu allora ch'elle fermanu quattru partite.
Suspesu per u so primu macciu, Fournier ùn pò pusà nant'à u bancu. Hè Jo Bonavita chì piglia l'ordini cù un talkie walkie.
Suspesu per u so primu macciu, Fournier ùn pò pusà nant'à u bancu. Hè Jo Bonavita chì piglia l'ordini cù un talkie walkie.

François Ciccolini rimpiazzatu da Michou Padovani è Eric Durand, aprile 2005

Dop'à dui anni di Gérard Gili, i dirigenti sceglienu a prumuzione interna mettendu u taravesu François Ciccolini nant'à u bancu. Hà u stintu, cunnosce bè u Sporting, hè un furmatore cunnisciutu chì hà ottenutu risultati cù e squadre di giovani.

Si principia a stagione di manera forte. Bastia occupa a terza piazza dop'à sei ghjurnate. Ma cum'è spessu, i macciacci venenu toccu l'inguernu. À u "mercato" s'arregistranu ancu i rinforzi di Karembeu è Cherrad. È pianu pianu, si ne fala in fondu di a classifica.

Dop'à una chjiba in Saint-Etienne (3-0) d'aprile, hè rimpiazzatu da Michou Padovani è Eric Durand. Ma ci sò state gattive scelte di ghjucadori. Chimbonda ci la face à mette a puzza, ci sò i clani ind'è i ghjucadori.

Fermanu sei partite à ghjucà quandu Padovani diventa intrenore. È torna appena ci la face (quattru vittorie, duie disfatte). Pè l'ultima partita, Strasbourg manda Bastia in L2 grazia à Niang scatinatu chì si vole vindicà di i gattivi sustenidori razzisti.

Bastia fala cun 41 punti, un record...
L'intrenori di u Sporting chì sò stati messi fora


Philippe Anziani rimpiazzatu da Michou Padovani, nuvembre 2009, è dopu da Faruk Hadzibegic

L'annata nera per eccellenza cumu u Sporting e sà fà cusì bè.

Philippe Anziani rimpiazza à Bernard Casoni chì più nimu supporta in Furiani. Sta volta torna, u Sporting hà avutu l'ispirazione d'andà à circà à Salim Arrache.

Nant'à u terrenu, pare ch'ellu và. À a terza ghjurnata, Bastia mette una concia à Nîmes. 6 à 1 Cun trè buts di Gaffory, unu d'André, d'Adenon è di Niangbo. Ma dopu vene a trafalata.

Durante dui mesi u SCB ùn vince più una partita. Dop'à dece ghjurnate, u Sporting occupa l'ultima piazza. E tribune si viotanu è A Piazzetta si dumanda : Cumu fà per salvà u Sporting ?

Philippe Anziani, susia officiale di John Malkovich
Philippe Anziani, susia officiale di John Malkovich

U restu di a stagione hè un filmu :

Jo Bonavita annunzia ch'ellu piglia a so ritirata, manch'ellu ùn supporta più stu club chì fatica à tuttu u mondu.

I sustenidori, cù u CSB, cuntestanu di più in più i dirigenti.

Mehdi Meniri hè licenziatu per avè... minatu un sustenidore bastiacciu dop'à una partita in cuppa in Marignane (cù eliminazione di u Sporting ben'intesu).

A settimana dopu, Salim Arrache parte, dichjarendu à L'Equipe : "je ne me sens pas en sécurité à Bastia."

Charles Capia diventa presidente di u Sporting. Prima misura : mette fora à Anziani, rimpiazzatu da Michou Padovani.

Ma in fine di contu, Charles Capia ùn stà micca. Firmerà cum'è u presidente u più rapidu di a storia di u Sporting (una settimana).

Principiu nuvembre, a tribuna sud d'Armand Cesari brusgia in a notte. Ùn si saperà mai nunda.


U 4 dicembre, dop'à una nova disfatta in Furiani contr'à Clermont, ci sò incidenti in e tribune è a baracca in tribuna Est piccia. Noi, scrivemu chì u Sporting hè mortu...

Pocu dopu, una squadra nova di dirigenti ripiglia u club. Faruk Hadzibegic hè sceltu cum'è intrenore.

Averà u meritu di creà una mossa ingiru à ellu è un'unione sacrata. Face vene parechji ghjucadori : Pentecôte, Periatambée, Robail, Lorenzi. A squadra si rilancia, Faruk mubilizeghja i sustenidori, Furiani torna à truvà a voce.

Ma di ferraghju una scunfitta in casa contr'à Dijon (3-4) allora chì u Sporting avia riesciutu à vultà in a partita, plasticheghja u murale di tutti (but à u 91u minutu, Novaes chì si ferisce...).

Pentecôte ci la face à fà sunnià l'accaniti, ma ùn basterà micca.

E settimane à vene sò eroiche. U SCB vince un derby impurtante in Aiacciu, è una partita à porte chjose in Furiani contr'à Strasbourg, cù un but à l'ultimu minutu di Pentecôte è 300 sustenitori fora sott'à a piogia (hè u famosu "y a qu'ici qu'on voit ça" di Ghisolfi). Surrealistu.

U finale hè tremendu, cù una partita decisiva di maghju contr'à Vannes. U populu sanu ci crede è Furiani hè caldu caldu. Ma u mese di maghju ùn porta micca furtuna à a Corsica. In un'ambianza infernale, Bastia perde u macciu ch'ellu ùn ci vole micca à perde (1-2) è cundanna u club à a falata. Pare incredibile : Bastia volta à u livellu amatore è ghjucherà in National.

Ma cunniscite a seguita. Nant'à i cunsiglii di Paul Marchioni, i dirigenti facenu vene un certu Frédéric Hantz. Bastia ùn pò micca more.
L'intrenori di u Sporting chì sò stati messi fora


u 3 di Nuvembre 2014



1.mandatu da luntanu u 06/11/2014 13:19
MANITAS hè mortu , mi dispice di più chè a scunfitta di l'intrenori di u SCB

Novu cumentu :