Accueil
Envoyer à un ami
Version imprimable
Partager

20 curiusità intornu à Bastia

Bastia Bastia, cità d’incanti, bracanata è cumplessa chì face cumbasgià à modu serenu a so cuntradizzione cunsecutiva, Terra Vechja è Terrenò, un portu è una Bastita, un pass’è veni cuntìnuu trà apertura è chjuditura, una metàffura filata trà l’ancu à vede è l’ancu à dì.
20 curiusità cum’è un invitu à scopre sta cità, trà ombre è lume, chì fece tantu sunnià pueti è viaghjadori in cerca in lu so intrecciu di i carrughji di scopre secreti nancu palesi. Ch’ella ci sia cuncessa di dedicà st’artìculu mìseru à a squatra di l’Almanaccu di Bastia pè a so làscita.



20 curiusità intornu à Bastia
Ritrattu : Armand Luciani

« D’aranci, ulivi è vigne incurunata,
Sù l’onde, azurre à paru d’u so celu
Sorge Bastia, racolta in biancu velu,
Siccumu una spusata ;
È surride à e trè belle,
Chì a guardanu cun faccia innamurata
. »

(Vattelapesca)

1. San Sarsoriu

20 curiusità intornu à Bastia
Sottu à u stradone chì và versu u paisolu di Suerta, ci si scopre a cappella San Sarsoriu chì venerìa u so nome di a sfurmazione pupulare di « San Lussòriu », santu di u Vu sèculu. Giuvellu ùnicu di l’architettura rumànica bastiaccia, sta pìccula cappella hè fatta d’una navata sola, chì si compie cù un’àbside meza tondula. Hè stata custruita trà i sèculi XI è XII.

2. Paese Grecu

À u locu chjamatu « u Cutone », à u nordu di Tighjime, nant’à un sciappale, ci sò e ruvìne d’un vechju paese medievale : Paese Grecu (o Paese Vechju). Issu paese hè cumpostu da una sessantina di case, d’una cisterna, di canaletti, è ancu d’una torra di difesa, à 468 metri d’altitùdine. À sente à u stòricu Anton Pietro Filippini, in « Istoria di Corsica », a custruzzione di i castelli di Montebellu, u Cutone è Petrabugnu datarìa di l’ XImu sèculu è sarìa l’òpera d’Asco Ortofossano, Signore balaninu, oppostu à u Signore di Furiani.
20 curiusità intornu à Bastia

3. L'Affreschi di a Casa Castagnola

Tiremucci dui passi versu E Terrazze (oghje "rue des terrasses"), chì s’alza a Casa Castagnola.

Alzata à u XVIu sèculu, cunnisciuta soprattuttu per via di u stalvatoghju ligatu à u so fruntone ("Col Tempo"), agrotta ella affreschi magnifichi chì adòrnanu l’esciale, ci dice Michel Edouard Nigaglioni : "Les voûtes sont recouvertes du plus ancien décor peint profane actuellement conservé à Bastia. Datant du tout début du XVIIe siècle, il comporte des scènes et des motifs ornementaux s'inscrivant dans le style maniériste et de la Renaissance italienne" (Corse-Matin 31 di lugliu di u 2016).
20 curiusità intornu à Bastia

4. A casa è a Funtana di u boia

Persunagiu sbanditu, disprezzatu è à le volte timutu, u boia chjamatu tandu Maestro di giustizia ci venia da fora, hè per quessa ch'ellu era allughjatu inde un’usteria sopra à Suerta (Più tardi, stava in u fondu di Terrenò) quandu ch’ellu avia da uffizià in Bastia. Si dicia ancu chì u boia andava à a funtana vicina pè nettà l’arnesi chì ghjuvavanu à a so funesta faccenda.
20 curiusità intornu à Bastia

5. U Monte

Altra curiusità chì face da leia cù quella passata, u Monte chì ribomba oghje di i scàccani zitelleschi è chì era sinu à u 1859 u locu induv’elle si facianu… l’esecuzione capitale. U cundannatu era affiancatu da a Cunfraterna di a Misericordia detta dinù di a Bona Morte chì altra curiusità era annidicata inde u sinemà Le Studio oghjincu.

Illustrazione : U Monte in u libru Bastia, regards sur son passé (Berger-Levrault, 1983)
20 curiusità intornu à Bastia

6. A Chjappa

Stu nome cumplessu, insegna di prima u primu mercatu di Terrenò cullucatu in cima di A Ripa. U nome li vene da a chjappa, sinonimu di lastra, petra piana è liscia induve ci si spunia a ropa.
Ci conta Ghjermana de Zerbi un usu ligatu strettu à quellu toponimu : « per casticà i cummercianti falliti, apposta o à disgrazia, li si impuniva di calà e braghe, indavanti à tutti, trè dumeniche à fila è di minà di culatte nantu à una petra, u lastrone quellu di Terranova, la pietra dello scandalo o dell'infàmia, in Fiurenza. Cusì chì "andà di culu in chjappa" diventò sinònimu di esse un cummerciante arruvinatu ».
Ritrattu Flickr / francois.sorrentino
Ritrattu Flickr / francois.sorrentino

7. Funtana di u Cavallu Rossu

Si trova di fronte à l'entrata di a Citatella, à cantu à u panatteru Carlotti. Hè stata alzata in u 1596. San Ghjorghju, patrone di Ghjenuva, c’era figuratu nantu à u so cavallu chì da i nasali di a cavalcatura scurria l’acqua. Vene u nome di sta funtana da u Santu è da sapè dinù chì u cavallottu era un’anziana munete ghjenuvese (Banca di San Ghjorghju).

Venerà riaccunciata inde l’anni 1776 è in u 1863 è cambierà propiu di fisiunimia sottu à u Secondu Imperu sinu à diventà un’acquale à u principiu di u XXu sèculu.
20 curiusità intornu à Bastia

8. A Barriè

A Barriè (dettu dinù l'Octroi, in francese) era un locu paghente pè quelli chì ghjunghjianu in Bastia cù a ropa. Istituita in u 1815 hè stata for di usu in u 1946, ci n’era parechji in Bastia a gabella (U Colle) inde a valle di u Fangu, sopra à u Cunventu di Sant’Untò cù u listessu usu.

9. San Ruccucciu

Inde u locu chjamatu E Strette, ci si pò sempre vede una statuletta di San Roccu, vicina vicina à e vechje scuderie di a giandarmeria di a caserna di San Ghjisè. Quì c’era a vechja cappella San Ruccucciu chì hà datu u so nome à a cullata chì cunduce sinamente à E Forche. E Forche (Litt = fourches, potence, gibet) induv’ella era impiccata a ghjente, è vene in leia cù a spressione bastiaccia : « andà sù e forche » chì e forche (si capisce percò) èranu sempre luntanu da e cità.
20 curiusità intornu à Bastia


10. Bassu Rilievu San Roccu / Carrughju di E Terrazze

Turnemu à vede a Casa Castagnola. Istu cartucciu dedicatu à San Roccu si trova nant'à una facciata di u casale.

San Roccu hè invucatu per francà a pesta. U cartucciu ci rammenta chì u quartieru di Terra Vechja hè statu risparmiatu per via di l’intercessione di stu santu in u 1569 à l’incrociu cù e Terrazze. Da ringrazià à San Roccu alzonu un uratoriu turnatu sedia di a Cunfraterna eponima in u 1588.
20 curiusità intornu à Bastia

10. Aghje è palmenti d’Agliani

Iè Bastia era posta à vigneti, è prova si n’hè chì d’ottobre in Bastia si vindimiava u vinu aglianincu, chì era servutu à nantu à i tavulini scelti è assaghjatu da l’amatori, à sente à elli averia avutu un gustu « d’iode è di frutti salvatichi di a machja ». Ùn ci stunerà manc’à pena di ritruvà ci cànave, palmenti, aghje, forni à parte da A Vela sinu à e cunfine furianacce.
20 curiusità intornu à Bastia

10. Catini

Si sà chì sinu à a fine di a Guerra di u 40, i Palazzi bastiacci eranu sulchighjati à cundutti chì permettianu di viutacci i so catini. Ci permette di cuntà vi un stalvatoghju di u 45 quandu chì i G.I scalonu per issa Bastia, si stunonu di a presenza di sti cundutti, è quandu elli ebbinu capitu zirlò u so stupore : « Wah, Bastiacci, beaucoup acrobates ! »
20 curiusità intornu à Bastia

11. Burlamondu di u Cimbalu (Casa Abbati)

Scompia da un bumbardamentu americanu in u 44, avia datu u Palazzu Abbati - dettu U Cìmbalu - u so nome à u quartieru à l’entre nordu di San Ghjisè, chì a so forma evucava un cimbalu (clavecin), c’era dinù un cartucciu induve c’era scrittu : « Che t’importa a te, coglion, sè così volle il padron ? » risposta murdente à a ghjente chì si ridia di l’architettura di u casale.
A pittura in burlamondu oghjinca hè stata fatta in u 1998 da u pittore Ghjuvanpaulu Mattei è ammenta u fiore di a storia bastiaccia da Viale, Galeazzini, Vezzani, Luccioni è tant’altri e sapereste ritruvà tutti ?
20 curiusità intornu à Bastia

12. Cappella è Ponte à San Martinu in Petra Rossa

Si sà pocu affari à nantu à sti dui siti assignalati cullucati in Petra Rossa, u ponte di a Petra Rossa dinù chjamatu di San Martinu chì facia cullegà e parte di Suerta (San Sarsoriu) è a cappella San Martinu. Battì Raffalli ci dice chì sinu à l’anni 50 i vignaghjoli aglianinchi si ritruvàvanu una volta à l’annu l’11 di nuvembre da unurà u so santu patrone.
20 curiusità intornu à Bastia

13. U Baullaghju di Carrughju Drittu

Vicinu à u sacratu di San Carlu, ci si pò rimarcà un baullu vechju incugnatu inde u muru, di u 4 Carrughju Drittu.
20 curiusità intornu à Bastia

Sarebbe stata l’insegna di un artisgianu baullaghju istallatu à u principiu di u XXu sèculu. Sti baulli, èranu sìmbuli di u viaghjà pè sti bastiacci chì s’avvinghjianu u mondu è per noi un invitu à sunnià d’altre sponde.
20 curiusità intornu à Bastia

14. U Forte di Munserrà... è e torre di Bastia

Oltre l’accinta di Terrenò, da u 1375 à u 1596, dete u Guvernatore ghjenuvese à a Cità di Bastia una cullana di forti cullucati nantu à l’alture di a Cità è chjamati à prutege la, c’era frà altri : A Turretta, A Croce, Munserrà, San Gaitanu, Straforellu è Riccipellu. Oltre i furtini, c’eranu dinù torre A Campana è Toga, Petrabugna, A Vètrice, A Falcunaghja.
U forte di Munserrà fù alzatu in u 1736 à nantu à u paese distruttu di Belgudè.

A torra di A Vètrice, vicina di Cardu (ritrattu Pierre Bona)

A torra di Falcunaghja, sopr'à u fiume di Lupinu

15. A Bibbiuteca Caraffa

Versu u 1680, u carrughju Drì era l’arteria cumerciante a più impurtante di a cità. Antone Bastianu Caraffa, riccu nutàbile, fece l’acquistu di un terrenu vicinu vicinu à a casa Petroni è adopra st’ùltima da basamentu pè l’edificazione di lussuosi appartamenti. Manu à manu u casale venerà ingrandatu è arricchitu sinu à u XIXu sèculu è a creazione di u so giardinu. A Sala maggiore agrotta una bibbiuteca di 15 000 libri riligati è 10 000 trapuntati.
20 curiusità intornu à Bastia

16. U Cristu Negru

Dedicatu à a Nunziata, l’oratoriu di a Cunfraterna Santa Croce hè statu alzatu in u 1543 nantu à un piazzale chì appartenia à a Basìlica di San Ghjuvanni di u Lateranu, a catedrale di u Papa. In u 1600, l’edifiziu hè ricustruitu inde e so prupurzione oghjinche . Accoglie l’oratoriu a cappella di u Santìssimu Crucifissu di i Miràculi, dettu u Cristu Negru chì saria statu ritrovu à gallu da dui piscadori bastiacci Camugli è Giuliani.
20 curiusità intornu à Bastia

17. Vilayet Saint Dominique

Aimé Sisco era un ingenieru d’urigine bastiaccia chì participò à a custruzzione di u Canale di Suez (1859-1869). Ind’è u casone ch’ellu fece custruì in Cardu si ritròvanu unipochi di ricordi di u so sughjornu in Egittu : ch’ella sia nant’à e pitture murale di u casamentu principale o ind’è l’urnamentu di a cappella. In leia cun l’elementi d’architettura d’ispirazione medievale tale a torra merlata, fàcenu di stu casone una testimunianza inattesa, à mezu à a campagna bastiaccia, di u stile eclètticu à a moda da l’anni 1860 sin’à l’anni 1920.
20 curiusità intornu à Bastia

18. U cunventu San Francescu

I travagli principionu in u 1521 sottu à u papatu di Ghjuliu u segondu, era u più grande di l’ìsula è pudia accoglie sinu à centu frati detti i zucculanti, l’inaugurazione fù u primu cunventu franciscanu di Bastia. U Crunista Giovanni Banchero scrive ellu : « A chjesa di San Francescu di i Fratelli minori, po avè da scumpete cù e più belle d’Italia ».
Locu di curiosità, agruttava u cunventu un sutteraniu chì li permettia di cullegà a marina à i tempi d’assalti, s’insuperbia dinù di avè a bibbiuteca a più maiò di l’isula !

Ritrattu : Armand Luciani
20 curiusità intornu à Bastia

19. I cappelli vescuvili

20 curiusità intornu à Bastia
In u 1570, a sedia di u viscuvatu di Mariana hè tramutata in Bastia. Trà u 1604 è u 1619 si face da una chjesola Santa Maria della Consolazione, una catedrale maestosa. Frà e numerose òpere d’arte chì l’adòrnanu : l’altare maiò in màrmaru polìcromu, l’òrganu di a casa Serassi in Bèrgamu o u gruppu prucessiunare di a Vèrgine fattu da l’orèfice ghjenuvese Gaetano Macchi.
Da rimirà dinù i sette berettini vescuvili chì rammentanu a storia di sette veschi bastiacci morti durante u so episcupatu è sepolti inde l’arca di a catedrale.

20. A Madunnetta

L’accuncera di a cala di Portu Cardu da i Genuvesi princìpia à u sèculu XVII cù a creazione d’un molu. Inde a so nichjula di u molu custruitu in u 1661, una statula di a Vergine Maria rammenta a devuzione ch’elli avianu i piscadori è i marinari, devuzione antica insegnate da e trè date 1671, 1861, 1952, a benedizzione di e barche nove si facia custì.
Ripiglia l’icunugrafia di a Madonna della Misericordia di u santuariu mariale di Savona.
20 curiusità intornu à Bastia





u 2ndu di Farraghju 2019
Rumanu



1.mandatu da Pescetti u 03/02/2019 17:43
Bonghjornu, articulu assai interessante... cume sempre d’alltronde, è vulia sapè se pudiu avè di più precisioni annant’à u Riccipellu.... locu induve sò cresciuta... Senzo mai sapè l’origine di issu nome.
Mille grazie torna una volta per u vostru travagliu

2.mandatu da Giacomoni u 01/03/2019 11:45
Riccipellu o Recipellu da u latinu « recipere », riceve (recevoir, accueillir, reprendre) ? Si truverà u fattu storicu anticu (in raportu cù a guerra osinnò cun l’ospite, a ricezzione) per avè datu ‘ssu nome à ‘ssu locu ?

Luigi G.

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta