Accueil
Envoyer à un ami
Version imprimable
Partager

Ma da induve vene u nome di "Vix" ?

Quale, trà A Ghisunaccia è Sulinzara, ùn s'hè mai postu a dumanda di l'orìgine di stu stranu nome di locu ?



Ma da induve vene u nome di "Vix" ?

Visitate u Fiumorbu : a so anima ribella, i so paesi innalpellati, u castellu di Cuvasina, è Vix. "Vix" ? Ma perchè stu nome chì face soffre e nostre orechje è i nostri ochji ?

Quand'omu passa pè a piaghja fiumurbaccia, si traverserà a lucalità di "Vix", nant'à a cumuna di Vintìsari.

Perchè stu nome bàrbaru cù stu X chì ùn esiste micca in corsu ?
Ma da induve vene u nome di "Vix" ?

Certi anu vulsutu vede un'orìgine rumana, cù una parolla latina ma a spiegazione ùn vale.
Per d'altri saria un'abreviazione, cum'è per "Tox" chì u nome corsu hè Tòcchisu. Hè cusì chì u nostru Vix hè statu "currettu" in "Vìcchisi"... Ma quì dinù l'affare ùn và. U nome corsu di u locu hè L'Alzitella.

Allora chì serà venutu à perdesi in Fiumorbu, stu stranu nome di locu ?

Avemu pensatu chì a risposta pudia vene da l'industrializazione di l'isula, à u principiu di u seculu XX.

Nanzu à a guerra di u 14, una sucetà hè creata per sfruttà e fureste di u Fiumorbu. Si chjama "Société Civile d'Isolaccio et de Serra". L'intrapresa si sviluppa, è in l'anni 30 cambia di nome per diventà a FORTEF, vale à dì "Forêts - Terres et Forces du Fiumorbo".

L'usina principale hè stallata in L'Agnatellu, nant'à a cumuna di Prunelli di Fiumorbu.

Ma da induve vene u nome di "Vix" ?


Si cunterà sin'à 800 impiegati (!) in u 1935. Da leghje nant'à a basa Mérimée di u ministeru di a cultura è u situ di a M3C.

Ma da induve vene u nome di "Vix" ?

Da l'usina muderna di u Fiumorbu surtianu 10 mobuli à ghjornu.

Tandu, pudiate ancu cumprà un lettu fattu di legnu di e nostre fureste...
Ma da induve vene u nome di "Vix" ?


Ma a segonda guerra mundiale spazzerà sta prova d'industrializazione...

È u raportu cun Vix allora ?

U ci spieganu Marie-Flore è u ben di Jean-Raphaël Cervoni in u libru Prononcez Tòcchisu (ed. Anima Corsa) :

"Lors de la création de la FORTEF, cet organisme qui devait dans les années 30 exploiter les forêts et les terres du Fiumorbu, un ingénieur, François Vix, se fit bâtir une maison sur la commune de Vintisari, à un endroit encore vierge de toutes constructions. Bientôt, peu à peu, d'autres particuliers vinrent s'agréger autour de lui et naquit un nouveau hameau"


Messa à ghjornu :

A storia hè bella ma... a realità hè altra. Ancu di grazia chì A Piazzetta hà lettori passiunati chì ci anu insignatu chì u nome esistia bellu nanzu.

U catastru vechju, dettu "Napuleònicu", ammenta u nome di locu "Vix", nant'à cumuna di Vintìsari. Si pò vede nant'à i piani (sezzione A "dite de Covasina", fogliu numeru 9). Ci hè ancu un "Vix Sottano" (fogliu 6).

Sti ducumenti sò stati fatti in u... 1863. Vole dì chì a storia di u François Vix di a Fortef hè una fake news. Un feccu, cum'ellu si dice in corsu.




Invece, nunda nant'à u Plan Terrier, fattu à a fine di u seculu XVIII.

U nome di "Vix" serà natu dopu ? O serà ancu di più anticu ? Pè ora, ùn si sà.

O Francescu Vix, s'è tù ai esistitu in veru, fà puru cennu chì semu persi.

È u misteru di u nome u più stranu di Corsica ferma sanu...



Articulu publicatu u 13 di ghjennaghju di u 2019
Aghjurnatu u 18 di ghjennaghju di u 2019

u 13 di Ghjenaghju 2019


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta