Accueil
Envoyer à un ami
Version imprimable
Partager

L'Hermione : U battellu di l’indipendenza

L’Hermione piglierà portu in Bastia istu vènneri u 27 d’aprile pè trè ghjorni di vìsite è di varie animazione ; issa famosa rèplica chì hà muratu a so petricella à l’edifiziu di a libertà di i pòpuli.




A custruzzione di l’Hermione

L’Hermione, figura di a mitulugia greca hè messu in cantiere in u 1778 inde l’arsenale di Rochefort, si hè tandu in piena guerra d’indipendenza americana è i cantieri navali francesi passanu pè esse i migliori di u mondu. A fregata hè lanciata in u 1779 è vènenu compii i travaglii in 11 mesi.

Eccu vi appuntu una tela rializata in u 1788 da Rossel de Cercy chì cummemureghja a vittoria di Louisbourg à u Canada.


Caratterìstiche di quellu battellone

L’Hermione hè una fregata ; vale à dì un bastimentu più ligeru è più manighjevule ch’è u vascellu. Cullegatu à una esquadra, ghjova da apristrada o puru di affollu pè i vascelli in dirotta durante e battaglie. Impiegata sola, hè aduprata pè fà crucere è a guerra à u cummerciu nemicu, o in tempu di pace pè fà missione scentìfiche o di splurazione.

Ghjera un battellone di 1 166 tunnellate , cu una lunghura tutale di 66 m, una largura 11,5 m. Pò imbarcà sinu à 316 omi. Conta trè maghji è a so velatura copre più di 2 200 m2 chì li permette di accimà una vitezza di 14,5 nodi (13 nodi pè a rèplica).

Hè armata da 34 cannoni chì 26 tiranu palle di 12 libre (Eccu perchè era chjamata « fregata di 12) è 8 cannoni di 6 libre.


La Fayette

L'Hermione : U battellu di l’indipendenza

"Pour que vive la liberté, il faudra toujours que des hommes se lèvent et secouent l’indifférence ou la résignation".

Di ghjennaghju di u 1779, Gilbert Motier gentilomu francese fattu da marchese di La Fayette volta da l’Amèrica (Georgetown inde u meziornu di a Carulina) induv’ellu s’era ingagiatu da vulintariu pè serve a cagione di l’insurgents.

Cun tesori di diplumazia a ci fece à scunvince à u rè Lavighju XVI è u so statu-maghjore di porghje un aiutu militare è finanziaria à e truppe di Georges Washington.

Di marzu di u 1780, imbarca ellu cù l’Hermione è ghjunghjerà à salvamentu 38 ghjorni dopu in Boston eramu tandu u 28 d’aprile di a listessa’annata. Annunzia in piena guerra a ghjunta di rinforzi chì feranu capalzà l’equìlibriu di e forze cun vittorie assignalate inde a cala di Chesapeake (5 di settembre di u 1781) eppo in Yorktown (19 d’ottobre di u 1781).

Da a gloria à u sprufondu

L’Hermione averà u so pocu è tantu à arricà inde a liberazione di e 13 culunie, u 7 di ghjugnu di u 1780 à u livante di Long Island, inde a cala ammintata prima da sopra, accugliò dinù in u so senu u 4 di maghju di u 1781 u Cungressu americanu !

U 20 di settembre di u 1793 (Annu I di a Repùblica) cumandata da un echippaggiu pocu aggalabatu, à pena isciuta da a foce di a Loire, a fregata si sfracelleghja contru à i scoglii versu u largu di Croisic, nantu à u pianòttulu di Four.

Una campagna di scavi archeulògichi intraprese in u 2005 permette di ruguarà varii ogetti cum’è u so timone è un’àncura di quattru metri di longura di un pesu di una tunnellata è mezu.

L'Hermione : U battellu di l’indipendenza

A rinàscita

Dipoi u mese di lugliu di u 1997, l’Associu Hermione-La Fayette s’hè impegnata in a scummessa scema di turnà à custruisce quellu battellone.

Puntellu di u patrimoniu marìtimu mundiale, issa rèplica compia in u 2014, l’Hermione urganizeghja dipoi u 2015 viaghji marìtimi à scale secondu temi chì cambianu ogni annu.

Quist’annu u so viaghju veranincu vilighjerà da Rochefort pè andà marina longu à a coste spagnole, marucane è francese. Dopu à Pasaia, Portimao, Tanger, Barcelona è Tulò inalberà vele è bandera pè issa Bastia u 27 d’aprile.

Ogni scalu pocu impreme u locu alletta un mondu scemu, si veca da sottu :



Visità L'Hermione in corsu

Durante e so varie scale, l’Hermione prupone vìsite à molu cù i membri di l’echippaggiu chì sò vestuti di modu tradiziunale è varie animazione. Pè u so scalu corsu, fù dinù prupostu da a cità di Bastia a pussibilità di visità a fregata in lingua corsa, peccatu peccatu in un amè sò state vindute e 300 piazze.

Ci serà dinù manera di assutiglià e so cunniscenze stòriche cù Michel Vergé-Franceschi chì ammenterà a marina paulina è cù Antoine-Marie Graziani chì parlerà di leia stretta chì adunia Paoli è La Fayette.

Ci serà dinù da dì nantu à e prublemàtiche ambientale oghjinche chì culpiscenu u mare Mediterraniu cù François Galgani.


Da appruntà a vostra visita in corsu

Pè appruntà a vostra vìsita in lingua nustrale, vi prupunimu qualchì parolla ghjuvative intornu à a parlata marinaresca :


- Gaillard d’avant : castellu ghjuvava da vigilia à a prua di l’imbarcazione - Gabier : gabbieru marinare in càrica di a velatura, di l’attrazzi è di e manuvre di l’imbarcazione è di l’àncure – Les canots : i canotti o barchetta - Les cloches : e campane pè puntellà ogni tempu, sònanu ogni mez’ora, prima inde l’Hermione c’era una ciccona chì annunziava a messa o u rimusciu (branle-bas) - Les canons : I cannoni, u canone storicu di l’Hermione fù pescatu in fondu di a Charente, sarebbe statu un mudellu di 12 sia 2 tunnellate !
- Mâture : L’arburatura vale à dì l’inseme di i maghji à cumpone u battellu, l’Hermione pussede trè maghji quatrati
- Mât de beaupré : Maghju di prua
- Gréement : attrazzi vale à dì l’inseme di u materiale cullucatu nantu à ponte chì permette a so propulsione cù a forza di u ventu.
L’Hermione pussede 17 vele pè un’àrea di 2200 m2. Sta velatura hè stata ricustituita cù u linu trattatu ; da sculunnà durante u so scalu issa varietà :
voiles d’étai : e vela di stragu
voiles carrées : o vela quatrata
voile perroquet : u vilacciu
grand-voile : a vela maestra
Le foc : a bullacca
Petite voile : u parucchettu
Hunier : a vela di gabbia
Artimon : l’ artimone

U schifu bastiacciu

Bellu più mudestu ma interessante assai, si veca da sottu un abbozzu di Roger Miniconi nantu à u schifu bastiacciu, ist’ùltimu mette in rialzu a so ricchezza patrimuniale è lessicale.

D’altronde s’ella vi calza à sapè ne di più nantu à a barcella aghjaccina, u gozzu sanfiurenzincu è altre paranzelle, v’invitemu à leghje senz ‘altru u Novu Atlante Linguisticu è Etnograficu di a Corsica, vulume 2, Le lexique de la mer ch’ellu hà ammanitu cù M-J. Dalbera-Stefanaggi.


u 21 d'Aprile 2018
Rumanu Giorgi



1.mandatu da Fabrizio Albertini u 27/04/2018 17:24
l'Hermione hè ghjunta a Bastia.

2.mandatu da JM Filippi u 29/04/2018 13:35
Chì n’emu da futte di stu battellu? A libertà à modu pinzutu : ok per l’altri ma nunda per i Corsi. È quelli di a merria brave scimie.

Novu cumentu :