Accueil
Envoyer à un ami
Version imprimable
Partager

Pierre-Jo Ferrali : "scrive in corsu hè una forma di sadomasuchisimu"

Hè surtitu « Austina », u segondu rumanzu di Pierre-Jo Ferrali (edizione Albiana). Ne avemu prufitattu per cuntrastà cun ellu di u so libru è di u sguardu senza cuncessione ch'ellu porta nant'à a sucetà corsa.



Pierre-Joseph Ferrali, 44 anni, hè insignante di lingua è cultura corsa. Hà publicatu un libru di traduzzione di canzone di Georges Brassens (Brassens, puemi è canzone, ed. Colonna, 2008), una racolta di nuvelle (Davanti à u focu chì more, ed. Colonna, 2010). U so primu rumanzu si chjama Fintantu chì l’erba crescerà... (Albiana, 2014), traduttu in francese sott'à u titulu Aussi longtemps que l’herbe poussera (sempre ind'è Albiana). Eccu dunque à Austina, u so segondu rumanzu.

Di chè tratta « Austina », u to ultimu rumanzu ?
Simu à u principiu di u 1962 nantu à l’immense stese di u Tanganyika, attuale Tanzania, induve u duttore Princivalle hè cunfruttatu à una terribule epidemia chì tocca e zitellette d’una pensione per urfanelle. Pianu pianu, a cuntagione si sparghje à un territoriu assai più largu. Nascenu pianu pianu tutti i sintomi di un’isteria cullettiva chì affanna a so ragione di medicu è al di là, d’omu. Dopu à stu longu viaghju, si ne volta in Corsica. Hè tandu ch’ellu hà da fà a cunniscenza di Vitale Cortina è d’Austina. Cusì, passerà l’annata in l’intreccime di sti destini, in l’effervescenza d’una giuventù corsa in brama di felicità, in e desillusione, in u crepacore di l’assenza, in e sbucciate di a guerra d’Algeria, in u spaventu di u drama di u monte Renosu. Eppuru, senza u curagiu ch’ellu li porghje l’amore, ùn mi serebbi micca accanitu à fà avanzà cusì luntanu i mo persunagi à traversu u rumanzu. U portanu in elli, u ricevenu è u danu tutti, ognunu à a so manera. Mi piace à pensà à Camus quand’ellu dice ch’ellu ci hè solu sfurtuna à ùn esse micca tenutu caru ma ch’ella ci hè tamanta disgrazia à ùn tene caru è chì noi tutti oghje, murimu di sta disgrazia.

Pierre-Jo Ferrali : "scrive in corsu hè una forma di sadomasuchisimu"

Perchè parlà di sta catastrofa, più d’un mezu seculu dopu ?
55 anni sò passati dipoi chì u Boeing Stratoliner di a cumpagnia Air Nautic, traspurtendu e squadre feminile è maschile di u Basket Ball Club di Bastia hà pichjatu a muntagna di u Renosu à 2 300 metri d’altitudine. L’accidente face 25 morti. Ghjuvanotti in l’innucenza di a so età. Si pò forse parlà quì d’una testimunianza contru à u scordu, una spezia di duvere di memoria cum’ella a dicia René Casamatta ch’o aghju intervistu, durante e mo prime investigazione. Ùn a sò mancu troppu. Quandu aghju scontru qualchì famiglia di vittime, ci era sempre un dulore tamantu. È mi dai l’occasione quì di sprime li tutta a mo ricunniscenza per avè accettatu di scuntrà mi è di rivene nantu à sta catastrofa. Ma ci vole ch’o sippi chjaru nantu à stu puntu : ùn aghju micca fattu in stu libru, un travagliu di storicu o di ghjurnalistu. « Austina » hè un rumanzu, una fizzione, un’opera di literatura ; in a mo scrittura, parlu di mè. Mi sò interrugatu nantu à sta tragedia in ricoccu cù quella di Furiani, in 5 di maghju 92. Risunenza particulare per mè postu ch’o sò cascatu quellu pessimu ghjornu. È dipoi, ùn aghju mai pussutu liberà a parolla nantu à tuttu què. Di sicuru, a suffrenza ùn si sguassa, ci hè dinù una vera paura d’affruntà stu passatu è quale hè chì a sà, una resignazione, un’accettazione suciale, cunsensuale, culturale, psichiatrica, à ùn guardà i versanti bughjicosi di a nostra sucetà.

Chì s'hè passatu in Furiani u 5 di maghju 1992 ?
Tamanta quistione… Ci toccherà à risponde ci un ghjornu, costi ciò ch’ella costi.

Perchè hè cusì difficiule di risponde à sta dumanda ?
À traversu u drama spaventosu di Furiani, hè tutta a sucetà corsa chì si hè sprufundata. A viulenza pulitica di i ceppi famigliali di manca è di diritta chì si sò trasmessi u putere, d’una parte, è a viulenza ceca di a guerra trà naziunalisti in principiu di l’anni 90, anu inciuttatu l’isula in una spezia di terrore. Cumu si ponu misurà oghje e cunsequenze di st’annate di piombu ind’è i Corsi chì sò stati pigliati trà u ferru di u morsu ? U sangue hè corsu, a paura s’hè installata dapertuttu. Ripetu ciò ch’o t’aghju dettu, ci vulerà assulutamente à pruvà di schjarisce sti mumenti terribuli di a storia recente di a Corsica per pudè cunnosce a pace. Hè un passeghju ubligatoriu, dulurosu di sicuru, ma ùn ci ne pudemu micca francà.

Hè u to quartu libru in corsu, u to segondu rumanzu. Perchè scrive in lingua corsa oghje ? Un attu militante ?
Attu militante ? Voli ride o chè ! Nunda chè u nome, mi face ghjunghje u vomitu ! Pensu ch’ellu ci vole à esse cumplettamente scemi per scrive in corsu. S’ella ti piace à piglià i colpi, à sente u disprezzu d’uni pochi, l’indifferenza di tutti, a cumpassione di certi, allora iè, scrive in corsu hè una forma di sadomasuchisimu, senza coghju nè latticciu, quessa sì. Eppuru, quandu tengu stu libru in manu, ch’o vecu sta bella cuprendula è soprattuttu quandu scontru qualchì lettore ancu più liatoghju chè mè è chì mi strida « Bravu ! », tandu mi dicu ch’o possu esse in armunia cù mè stessu. Scrive hè un unore, scrive in corsu dumanda appena di più di vuluntà, ma vale forse sempre u colpu. Dopu, a ricunniscenza, sai…

Ti senti l'erede di u Riacquistu ?
Arresta e to cunnerie, quì vengu di rende mi addossu. Sò più vicinu à un Hermann Hesse quand’ellu scrive Siddhartha (1922) o Le Loup des Steppes (1927) chè di n’importa chì autore di stu bollibolli fumicante di l’anni settanta in Corsica, ancu s’o l’aghju letti. È quelli chì dicenu ch’o sò un erede di st’affare quì, ùn anu di sicuru micca lettu i mo libri. Ùn n’aghju primura s’ellu hè sempre oghje un fondu di cumerciu per certi ! Duie canzunette, rumanzi è teatru infangati in a rivendicazione d’un « noi » incuscente, nantu à u mudellu di l’archetippu di Carl Jung, è basta. S’ella hè tutta què sta famosa lascita culturale per e generazione à vene di giovani corsi, disgraziati !!!

Sì gattivu custì...
Sò assai severu ma ùn credu manc’appena un’età d’oru di u Riacquistu. Quand’è tù apri a porta d’una libreria in Bastia, dumanda per vede un libru di u filusofu Jean-Toussaint Desanti. Quale hè chì u leghje ? Un ghjornu, frugnicava senza truvà un titulu di Pier Paolo Pasolini è dumandu à l’impiegata. Mi ritrovu cù ella davanti à a scanceria è tandu mi dice : « Sò tutti quì » ! Cerca è cerca, ùn vedia nunda. D’un colpu, mi sò accorsu ch’ella mi fecia vede i libri d’un autore finlandese, Arto Paasilinna. Hè dettu tuttu. Iè, tamanta lascita. Parlendu di què, mi face pensà à Nicolas Giudici è à stu titulu angusciosu, Le crépuscule des Corses. Tombu anch’ellu, di listessa manera chè Pasolini. Hè forse una lettura di u mo rumanzu Austina, una riflessione amara nantu à una sucetà malata.

Malata di chè ?
Tuttu u male vene da u rinunciamentu à pudè pensà, à custruisce un ragiunamentu abbastanza forte per resiste à a pressione di u cundiziunamentu di l’opinione publica in e demucrazie uccidentale. L’elaburazione è l’urganizazione di sta prupaganda, in riferenza à i travagli di Edward Bernays, si face à traversu a manipulazione cuscente è intelligente di l’opinione. Un’idea chì pare toia, un argumentu chì pare alzatu da a to riflessione, un cumpurtamentu chì pare u fruttu di a to vuluntà, ùn hè in realità chè u risultatu d’un travagliu prufondu chjamatu a fabrica di u cunsentimentu (The Engineering of consent), messu in piazza da l’apparechju puliticu è da i so dirigenti. I medii di massa, (a televisione, a radiu, i ghjurnali, u cinema, Internet, rete suciale…), permettenu oghje di sparghje à una vitezza scema sti messaghji chjappi senza stacciu da u to cerbellu è in quantità tremenda. Possu ancu rivene à Pasolini quand’ellu dicia chì a sucetà di cunsumazione hà pussutu ottene ciò ch’ellu ùn hà riesciutu à fà un regime autoritariu : acculturazione è unifurmizazione di e mentalità. Ùn simu più capace di piglià appena di distanza di pettu à u fracassu ingiru à noi. E dinastie pulitiche si ne trafalanu oghje in l’isula ma ùn hè chè per fà ne nasce d’altre. « U putere frusta quelli chì ùn ne anu », hà dettu un ghjornu Giulio Andreotti. Ùn mi scurderaghju mai di ste fiure fendu vede avucati sciaccamanà in publicu l’assassiniu d’un omu. Ùn si passava micca in una luntana dittatura d’America Suttana ma in Corti in 1993, cù quella pessima ghjustificazione di leghjittima difesa preventiva. Simu fieri di stringhje a manu di pulitichenti ambiziosi, di sustene eletti cundannati per affari particularmente oscuri è chì sò prutetti da un’immunità parlamentare qualunque, d’impiastrà un bigliettinu di votu è sottumette si à un sistemu feudale mudernizatu è adattatu à a vita attuale. È sempre quì, sta manipulazione di a ghjente. Averemu forse da quì à pocu omi è donne curagiosi è talentuosi chì puderanu spazzà stu mullizzeghju ma per avà, a sucetà corsa hè muribonda.

Postu chì a sucetà corsa hè muribonda, ch'è no avemu difficultà di parlà di ciò chì s'hè passatu in l'anni 90, ùn tocca à a fizzione di trattà di quessa ?
Ne sò scunvintu ! Purtantu, ci vole à prupone fizzione chì sippinu contra mudelli à e forme di viulenza chè no cunniscimu. Vene à dì chì u fattu di ripruduce in literatura, per ciò chì mi cuncerna, un'opera chì sippi troppu vicinu à una realità senza veste la d’una dimensione estetica è puetica ùn purterebbi chè un soprapiù d’alienazione. Sò di sicuru à u serviziu di a verità ma sò dinù accumpagnatu da u mo arte. È l’artistu deve in permanenza inventà forme nove per tuccà un publicu. Avà, nunda ùn m’impedisce di creà qualcosa chì scumodi, chì mettessi u lettore in una pusizione scunfurtevule per pruvucà una reazzione è u principiu d’un quistiunamentu. Scrittori, musichenti, dramaturghi, futugrafi, cineasti, artisti in u sensu u più largu è u più altu, anu stu duvere. È s’ella ùn hè pronta à riceve st’opere a sucetà, pocu impreme. Finiscu cù Pasolini chì dicia bè : « Scandalizà hè un dirittu, esse scandalizati hè un piacè è u ricusu d’esse scandalizati hè un’attitudine muralista ».
L’arte à u serviziu di a verità è di… a libertà.

u 10 d'Utrovi 2017
Intervista realizata da PPC



1.mandatu da For di strada u 10/10/2017 19:57
Cridia ch'era abbandunata A Piazzetta ma tantu ch'è vo scriverete articuli cusì chì escenu da u suminatu, serete sempre indispensevuli. Sti pochi tempi, aviate sminticatu u vostru contrapesu puliticu, sò felice di turnà à vedelu (ancu cusì pocu).

2.mandatu da opovarano' u 12/10/2017 10:52
Mi dispiaci d'ùn essa mancu stampa d'accunsentu incù l'amicu Ferrali. Incausà u Riacquistu d'essa culpevuli di a malatia di a sucità corsa saria com'è dì chì Marx hè rispunsevuli di i crimini di Salin è di i dittaturi cumunisti in lu mondu sanu.
U gattivu usu di un'idiulugia o di una mossa hè un fiascu duvutu à a dibbulezza è à l'alienazioni umana micca à i vizii di a ditta idiulugia.
Pà u restu, vargugna à quiddi chì prufittani, è sò mori. Ma ùn la vedani mancu chì li si pari d'essa eroi.

3.mandatu da opovarano' u 12/10/2017 22:36
scuseti, di Stalin, capita
o Petru Ghjasè, ùn imbulighjà tuttu

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta