Accueil
Envoyer à un ami
Version imprimable
Partager

U discorsu nant’à l’identità : trà idealisazione è pruvucazione

Pocu azzuffu nò trà a Bistuca è i lettori di A piazzetta ! Ancu eiu diceraghju a meia nant’à e quistione poste da u nostru cullaburatore…



bandera, testa mora, focu, identità, corsica, corse, culture, cultura,
bandera, testa mora, focu, identità, corsica, corse, culture, cultura,
A caccia, u simbulu di a Corsica campagnola

Prima, nant’à u fondu, chì male ci serà à caccià si ne incù i cacciadori ? A spressione hè libera. Eppuru, s’è li si pò rimpruverà à certi d’esse carnazzeri, a maiurità di i cacciatori pare ch’ella fussi assai primurosa di a difesa di l’ambiu. Eppò, chì male ci serà à andà ogni dumenicata à scuntrà à l’altri paisani, da fà a battuta, nanzu di manghjà si un buccone inseme ? Di fatti, ùn hè quessu u prublema per a Bistuca. U peghju, hè di sente li rachjà di a caccia. Ancu più chè u disimpiegu è a malatia, ùn hè vera chì e discursate di i cacciatori sò un casticu maiò per a sucetà ? Un cunsigliu per a Bistuca. Postu chì sì à l’oziu a dumenica matina, guarda puru à Téléfoot nant’à TF1 o a messa religiosa di France 2 ! Natale Rochiccioli ti dicerebbe forse : « S’è t’ai un ortu, fà puru u zappingu. S’è sì panzutu, fà puru u futtingu ! »…

Da a critica à u disprezzu

L’anu detta certi in i so cummenti. U disprezzu di a Bistuca per i cacciatori s’assumiglia assai à quellu di i Parigini contr’à i Ch’tis o quellu di i pinzuti in pettu à i Corsi. Hè stu disprezzu liatu à una furmulazione sgalabbata, quasi quasi pretenziunuta chì spiace à a ghjente. Per contu meo, à caccighjà, ùn ci sò mai statu. Soca serà per via di u mo versu d’eculugista bastiacciu ? Ma à i cacciatori, al di là di a so funzione suciale, li ricunnoscu quantunque una funzione ambientale, à prò di u circondu. Ùn sò elli chì sbattenu a machja ? Chì a tenenu pulita ? Chì, per fà la à l’accorta, tenenu vivi i nostri lochi…

Classificazione di e discursate è di e ghjente

Soca a Bistuca di a caccia ùn ne parla mai. Averà d’altri penseri, d’un più altu valore ! U fattu di creà una ierarchia di i temi accustati in e discursate di e ghjente per fà ne una classificazione suciale, s’assumiglia assai à l’intullerenza, à u settarisimu. Si sò custituiti cusì u spiritu universalista, u discorsu etnocentrista è, dimmu la franca è chjara, l’azzione culunialista. À chì si sfoca ghjuchendu à u ballò, à chì a face à a caccia, à chì in cantina, à chì si cappia in Furiani… Qualessa sia a manera di sfucà si, ciò chì impreme hè ch’ella rispetti l’altre ghjente.

L’aghje santificate da l’identità…

U secondu articulu messu in causa da i nostri lettori purtava nant’à a quistione di i temi sacri ch’omu sarebbe ubligatu à santificà : a lingua, a terra, a caccia, u paese, a famiglia… Pensu chì di sacralisazione, n’hà bisognu ogni sucetà. Pigliu per esempiu a storia. L’eroi di Ponte Novu, ùn sò tutti santi per noi ? È l’impiccati di u Niolu ? È Pasquale Paoli ? In u filu di ste ripresentazione custì, l’insignamentu di a storia si face in funzione d’un prughjettu puliticu cuntempuraneu. Clovis è Charlemagne, a sapimu chì sò fole, ma sò à u fundamentu di a custruzzione di u Statu-nazione francese. Avianu bisognu d’una mitulugia republicana. Hè listessa per a Corsica. Avemu bisognu di a « fola di l’identità », per ripiglià e parolle di Ghjacumu Thiers. Hè u nostru levame, u nostru liame dinù.

A mimoria cullettiva : ramintà si è dimenticà si

In più di cunosce a storia, anderaghju ancu più luntanu, dicendu, incù Ernest Renan, chì avemu bisognu di scurdà ci di certi pezzi di a storia. Ùn diceraghju micca quì ciò chì ci vole à dimenticà postu chì, ghjustu à puntu, ci vole à piattà li… Piglieraghju solu l’esempiu di a resistenza in Corsica. I naziunalisti è l’omi di manca si ricurderanu più vulinteri di Ghjuvanni Nicoli chè di Fred Scamaroni, u gaullista. In quantu à i razzisti, di i maruccani chì sò morti in Teghjime, a mi pensu chì sta passata, a cacceranu da i libri di storia. Tenite un antru esempiu… Dite mi perchè sti libri dicenu chì a prima cità francesa à esse si liberata hè Sainte-Mère l’Eglise è micca Aiacciu ? Hè una bucia chì ghjove à a custruzzione di a mimoria cullettiva di i Francesi. Hè una bona chì Aiacciu si fussi liberata ma Aiacciu, ùn hè micca propriu a Francia… Allora casca male per l’onore di i Galli, “nos ancêtres”… Chè ?

Pruvucazione o realisimu ?

Eppuru, di realisimu, n’hà bisognu ogni sucetà per pudè si sviluppà. E bucie, e si cuntava Hitler, quandu chjosu chjosu in u so bunker, cridia sempre ch’ellu pudia cunquistà u mezu mondu… Quandu s’hè avvistu di a realità, era troppu tardi. Tantu megliu vi diceraghju ! Ma noi altri Corsi, seremu abbastanza cuscenti di a realità di a nostra sucetà ? Di e volte, quandu un duttore dice à un malatu ch’ellu hà u cancaru, invece di piglià e medicine, si techja di bucie. Si conta una fola più bella chè a realità. Credenu certi chì duie erbicelle li puderanu salvà di modu più dolce è fattivu chè a scimiuterapia…

Intantu, a Bistuca, invece di fà in u realisimu, face in a pruvucazione. S’ella li piace?

u 16 d'Aprile 2008
Ahmed Zumar



1.mandatu da GWM u 18/04/2008 11:57
tamantu "Up" pè st'articulu. Bravu Ahmed !

Leghjite puru à Mircea Eliade, 'U mitu di l'eternu ritornu', induve si parla di u pensà è di u passatu mitichi. Ié, u sacratu, n'avemu bisognu.

2.mandatu da Bistuca u 18/04/2008 12:23
Cosa vole di a parulla "bistuca"?

3.mandatu da def u 18/04/2008 19:11
A bistuca, ghjè una spezia di ragnu (araignée)

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta