Un Certificatu per a Lingua Corsa

Cosa hè un certificatu?
L'idea hè di ricunosce e cumpetenze linguaghjaghje è culturale di e ghjente, cum'ella si face digià incù l'altre lingue. Esistenu u TOEFL o u TOEIC per l'inglese ma dinù u CLES per e lingue eurupee.

E cumpetenze di u lucutore sò valutate secondu criterii belli definiti da u quadru eurupeu cumunu di e lingue. U Certificatu di Lingua Corsa si scrive in u filu di a dimarchja iniziata da l'Università chì hà da apre u CLES, Certificatu di Lingua per l'Insignamentu Superiore. Serà a sola lingua "regiunale" à accimà tamantu livellu di certificazione.

Un certificatu da chì fà?
A creazione di u certificatu permetterà attempu una ricuniscenza di a cumpetenza linguistica individuale è di a lingua, di modu generale. Oghje, quale hè chì scrive a so cumpetenza cursofona nant'à u CV? Ancu s'omu a vulia fà, venia male postu chì valutazione ufficiale ùn ci n'era. Oramai, diventa pussibule.

E reazzione di l'imprese?
Ferma un puntu d'interrugazione. Chì serà a reazzione di u settore privatu? A farà à ghjucà a carta di a cursufunia? È i sindicati, a faranu à aghjustà a so rivendicazione di cursisazione imprecisa è incerta di l'impieghi ver di una cursufunisazione bella definita? Hè quessa a sfida a più impurtante per a lingua. Avà, unepochi d'arnesi ci sò. Basta à aduprà li, à mette e mani in pasta.

Da a scenarisazione à a funzione ecunomica...
Cusì, pare ch'ella s'elabureghji una lingua capace à campà oghje, capace à dì tuttu, à parlà, à stuzzicà ci tutti, ancu i capi d'impresa! Pianu pianu, si face una via. Da l'aghja stretta di a scenarisazione culturale à a vita ecunomica, venerà faciule u passu? O serà più grande chè l'infurcatura?

Sò Corsu! Aghju u certificatu!
Altra funzione impurtante di u certificatu, quella identitaria. Megliu chè u mottu uttantescu "Sò Corsu, ne sò fieru" turnatu "Sò Corsu, aghju l'autocollant", u certificatu fonda l'identità, micca solu nant'à una brama o una chjama ma nant'à una vulintà. È s'ella serà quessa a cursitudine oghjinca?