Fatti d’America: ripensà i dritti pulitichi

Parlemu prima di e dichjarazione di dritti muderne, aduttate per ghjuvà di limite à u putere. Ci pudemu dubbità chì quelle ùn sò nate in Francia un gran’ ghjornu di u 1789, ma ùn si sà forse micca à chì puntu l’Americani eranu in avanzu. Femu casu: dichjarazione di dritti ci n’era à buzeffu ind’è u Medievu (a Magna Carta inglese di u 1215 hè a più famosa), ma si trattava soprattuttu di ricunnosce privilegi particulari, à tali nobili, à tale cità, à tale curpurazione, ecc. E dichjarazione muderne, elle, sò puntellate nant’à l’uguaglianza è i dritti individuali.

Ne pudemu forse vede e prime traccie ind’è l’Ordini fundamentali di u Connecticut di u 14 di ghjennaghju di u 1639, chì sò una vera Custituzione scritta (ancu s’ella hè assai corta di pettu à e Custituzione muderne). Eppuru stu testu quì tocca soprattuttu à l’urganizazione di i puteri; in termini di dritti, l’essenziale era chì tutti l’omi liberi chì campavanu nant'à u territoriu fussinu in gradu d’eleghje à tutti quelli ch’occuppanu funzione pulitiche è publiche, è in gradu di prisintassi à quelle funzione. Ci si truvava dunque u principiu di citadinanza, è l’esigenza di sintunia trà populu è guvernu. Eccu unu strattu:

“Duve un populu hè adunitu, a parolla divina cummanda chì, per mantene a pace è l’unione di stu populu, ci sia un guvernu urganizatu è degnu, fundatu sicondu à Diu per urdinà è decide di l’affari di u populu in ogni stagione è ogni uccasione; ghjè per quessa chè noi c’assuciemu è c’adunimu per furmà un Statu publicu o una Republica”

Ancu più stunente hè u Corpus di e Libertà di u Massachusetts, di u 1641. Ci si trova quì un centu di libertà pruclamate, trà e quale i dritti è e libertà di e donne, di i zitelli, di i servi, di i strangeri è ancu di l’animali!

Cusì hè bella capita chì i rivuluziunarii anu apprufittatu di una bella tradizione di pinsamentu puliticu... ma l’anu dinò sappiuta sviluppà. A prima dichjarazione di dritti rivuluziunaria, quella di Virginia, aduttata u 12 ghjugnu di u 1776, hè una nova tappa. Ghjè bella corta (16 articuli) per esse più sulenna, è soprattuttu fucalizata nant’à a suvranità di u populu, l’indipendenza di i puteri (esecutivu, legislativu è giudiziariu), è i dritti ghjudicati i più impurtanti (libertà di l’elezzione, di a stampa, di riligione, etcc.).

U populu devia esse a surgente di tutti i puteri, ma hè stata subbitu sclusa a demucrazia diretta, nant’à u mudellu anticu, soprattuttu per mutivu d’impussibilità pratica. S’uppunianu tandu demucrazia è republica: a prima, quella di l’Ateniani è di Rousseau, era quella induve u populu vota direttamente a lege, è ghjera riservata à e piccule cumunità; a siconda, induve sò i raprisentanti eletti da u populu chì votanu a lege, pudia esiste ancu ind’è i più grandi Stati.

Ma quantunque, a raprisentazione di u populu hè stata cuncepita di modu bellu più esigente da l’Americani. Si leghje ind’è a Dichjarazione di Virginia chì tutti quelli ch’occuppanu funzione publiche sò rispunsevuli in ogni mumentu davant’à u populu. Ghjè cusì chì a Camara di i Raprisentanti sarà eletta solu per dui anni, ch’ognunu pudessi esse prestu sustituitu da u populu.

S’accerta dinò chì l’eletti devenu raprisentà cuncretamente a sucetà. Sicondu à Adams, un assemblea di raprisentanti “deve esse in più chjucu u ritrattu esattu di l’inseme di u populu”. Nanzi a Rivuluzione, in America a maiurità di l’omi vutava digià (invece ch’in Ingliterra eranu più o menu 20%), ma e cundizione d’impositu funu abbassate per generalizà u drittu di votu. In u 1777, u Vermont hè u primu Statu americanu à cunsacrà u drittu di votu universale per l’omi.

Eppuru per certi ùn bastava. L’uppunenti à a Custituzione di u 1787 dicianu chì sarianu sempre i listessi à esse eletti, è ch’ella avia da nasce un “aristucrazia naturale” puntellata nant’à e classe suciale è più ricche, è incapace di capisce i prublemi di u populu. Dunque prupunianu chì l’elezzione fussinu urganizate di manera à raprisentà ogni grande categuria suciale. I partigiani di a Custituzione accertavanu elli chì u populu era abbastanza astutu per sceglie eletti chì l’assumigliarianu, è ch’in casu peghju l’eletti senza primura di u populu sarianu prestu rinviati. St’ultimi quì anu vintu ancu quella partita, ma qual’hè chì sà ciò ch’ella saria oghje a demucrazia s’elli avessinu persu?

Da leghje : Fatti d’America: nascita di un Statu è di una nazione